Piah khik kajap bruk ngak tui jalan diuk rai hu ilamo, salamat, patak pataom dalam dom bruk ngak hadei Tet Nguyen dan Ula Naih saong Raya Bal Pataih thun 2025, Thu tuong Rajaei bahrau tabiak harak pandar dom bhum palei brei khik kajap salamat, siam mekre, kali kalih, ngak tui jalan diuk rai hu ilamo, samu haong ilamo meng kal di bangsa saong adat cambat siam gheih di bol bhap rahra dom bhum palei. Dom labik pablei salih, yitvu brei mboh cambaih laih yaom kaom, oh dui katung saong kateik geik yaom, kateik geik tuai damuai blei pandap, ngak catang dom bruk pambak tame inem mek, harei raya, adat cambat piah duah jien suan hukum, ngak bruk je yang mebang oh daok lagaih, me-in mbia…Abih tih urang jakar, cong chuc, vien chuc, urang ngak bruk ngak tui njauk dom hukum, tacei ba ka bruk peih ngak, hu mbaok tame dom harei raya.

Tet Nguyen dan meng baoh, gah yulit Bhum taneran kraong Cuu Long mboh hu biak rilo tuai damuai mai tame dom bhum palei, abih di nyu lac Kiên Giang taduan raok labaih 471 ribau mbang tuai damuai, tagok jaik 20% dut saong tukvak ini thun dahlau. Đồng Tháp dalam 9 harei padeih Tet, taduan raok labaih 300 ribau mbang tuai damuai. Kuhria abih tih jien mek tame meng bruk yulit labaih 46 ti dong. Di An Giang, dom labik jarah rivang saong ma-in dalam tinh pachreih hu 771.000 mbang tuai mai. Tỉnh Vĩnh Long jeng taduan hu labaih 75.000 mbang tuai damuai. Jien mek tame abih tih labaih 38 ti dong.  

Piah daong urang kathaot, UB Bhap bini tinh Dong Nai mbaoh tangin ka bruk daong jien ndien yaok bilan ka baoh sang kathaot haong baoh sang mbang tui sarak xa hoi dalam tinh. Tui nan yaok baoh sang hu daong 61,5 ribau ndong  sa bilan. UB Bhap bini tinh jao ka So Lao dong, Thuong binh saong Xa hoi dang ngak, pambuak haong dom jabat, labik hu pambuak piah ngak bruk pasang iek bruk ngak tui sarak daong jien ndien ngan haong baoh sang kathaot saong baoh sang mbang tui sarak xa hoi dalam tinh.

Urak ini, jaik abih bruk pablei salih online jeng yau darak pasar di Ban raya HCM hu peih pambang saong ngak bruk gilac veik yau dahlau. Tui nan, halau kaya pabak ka urang blei pandar yaok harei di dom labik  oh tok ralo, bo daok hu palei tui danak dak pachreih urang blei piah ba mbuan lagaih ka bhap bini blei pandar. Tui So Cong thuong Ban raya HCM,  piah duh ka darak pasar dahlau, dalam saong hadei Tet Ula Naih 2025, dom po ngak mbang pablei salih praong hu tame Danak dak Pablei khik yaom kaom darak pasar Ban raya HCM kuhria caga phun jien labaih 22.000 ti dong; dalam nan, labaih 8.000 ti dong piah blei caga dahlau kaya mbang, pandap pandar yaok harei.

Dalam bilan 2 ini, di Palei Ilamo - Yulit dom bangsa Viet Nam, di Ha Noi, hu rah tabiak rilo danak dak ilamo. Tui nan dalam danak dak bilan 2 “Sambo bar Pataih grauk di Taneh ia” hu yaih khan, padang dom danak dak harei raya siam gheih, kadha me-in bhap bini naih gheih, dom pandap mbang bhap bini saong dom janih pandap kaya karei di yaok bangsa. Labaih 100 bhap bini di 16 bangsa: Nùng, Tày, Dao, Mông, Mường, Lào, Thái, Khơ Mú, Tà Ôi, Ba Na, Xơ Đăng, Gia Rai, Cơ Tu, Raglai, Ê Đê, Khmer hu mbaok tame Danak dak ba mai dom bruk siam gheih.

Tong thong Mỹ Donald Trump kham merat brei padeih mek kak jien je pandap blei tame meng Mexico saong Canađa dalam sa bilan. Bruk brei padeih padeih mek kak jien je hadei tuk dua taneh ia nan njauk hatau gauk  pakhang bruk khik iek salamat tapen negar piah ngak tui bruk ba tabiak di ong Donald Trump pacang cakak urang langiu negar tame suan hukum saong matuy tame Mỹ. Yau nan min, Mỹ daok mek jien je 10% ngan haong pandap Trung Quốc. Tong thong Mỹ  mboh lac meyah Trung Quốc oh padeih pajeng ba phen-ta-nin tame Mỹ, ye taneh ia ini njauk kak jien je glong jang. 

Japon daok srap gap raok sa mbang langik biak la-ar oh ka bhian mboh, ba tui tuyet laik ralo abih dut haong meng dahlau mai. Njauk caik hatai sangka, di dom labik yau ban Obihiro saong labik Mblang kapal Ahaok par Obihiro, tok kuhria dalam mon 12 tapa tuyet kapal dut iek hu tagok tal 112cm. Jabat Kuhria langik tasik pandar rahra caik hatai caga haong bruk tuyet laik kapal, mbuan rah tabiak rabuk tuyet saong riyak glaong, phun jaleih saong tuyet glut jaleih. Meng akaok thun tal ini, di Japon hu tal 7 urang metai, 91 urang njauk rambuac kalam, patau tuyet meng angaok laik trun…

Tuk dom sang bac di Australia jaik raok sinh vien tame thun bac birau 2025 jeng lac tuk jien pah sang daok ka sinh vien pak ini tagok glong having akok. Di ban Sydney urak ini yaom sang daok ka sinh vien pah tagok takik abih lac labaih 35% dut saong thun 2019. Yaom pah sang tagok glong having akaok ba tal sinh vien dunya dak harei dak kan kandah jang dalam tuk nan bruk ngak jeng kaok trun takik tukvak veik saong oh hu taduan jien daong dam dara 330 AUD sa adit  yau sinh vien Australia./.