Taduan panuac da-a di Thủ tướng taneh ia Cộng hòa Dân chủ bhap bini Lào Sonexay Siphandon (Xỏn-xay Xi-phần-đon), mesup 11/1, Thủ tướng Rajaei Phạm Minh Chính haong kapul urang ngak praong pakat glaong Việt Nam tagok jalan tapa ravang Lào, gam dang akaok mbang nyaom ka 45 UB 2 rajaei Việt Nam - Lào saong tamat “ Thun jum pataom hữu nghị Việt Nam – Lào, Lào - Việt Nam 2022” meng harei 11–12/1/2023. Mbang tapa ravang Lào di Thủ tướng Phạm Minh Chính rah tabiak dalam tuk talei pambuak bruk abih gah di Việt Nam saong Lào daok tagok siam, khang kajap, saong daok hu ngak brei kajap jang, glaong jang.

Akaok negar Nguyễn Xuân Phúc hu nao rivang Darak Tết anit ranam pabak ka urang kan kathaot, hu mbaok di danak dak “Tết anit ranam”; jao sang anit ranam, alin pandap ka uranaih, urang taong cap ikan, sang kan kathaot, sang gaok kan kandah, urang njauk jru mek kalik kruac di huyện Hòn Đất, tỉnh Kiên Giang. “Tết anit ranam" Xuân sak tapai thun 2023 di tỉnh Kiên Giang hu peih tabiak meng harei 1 - 16/1; dalam nan, tukvak tabung glaong meng harei 6 - 15/1, alin 20.000 paok pandap ka sang kan kathaot, sang jaik kathaot, dom sang hu urang njauk jru mek kalik kruac, urang jaoh jo atau njauk kan kandah di bala langik tasik, njauk jit ruak COVID-19.

Mban Bangsa tỉnh Bình Phước hu nao ravang, tadhau ayuh Tết saong alin hadiah pandap dom taha palei, urang hu angan je dalam bhap bini bangsa takik daok dalam ban Đồng Xoài. Kapul hu ba tal tangin dom sang kathaot, sang jaik kathaot, sang urang bangsa takik 170 pok pandap. Thun 2022, danak dak trun 1.000 sang kathaot dalam bhum urang bangsa takik di tỉnh Bình Phước hu jak jeng lac meng hu bruk ba tangin tame di abih hệ thống chính trị jeng yau di dom taha palei, urang hu angan je.

Meng parilo janih phun pala, abih di nyu nan lac phun jru, njam patam, bingu tui jalan công nghệ glaong, mikva bangsa K’ho daok di xã Đạ Sar, huyện Lạc Dương, tỉnh Lâm Đồng hu yam tagok tabiak truh kan kathaot, dak padang raidiuk trei sil, haniem phun. Tui ong Cill Nim, Phó akaok UBND xã Đạ Sar, gam saong bruk salih hatai saneng dalam bruk ngak nong, pala drak tui jalan công nghệ glaong, rilo sarak buh jien tame, daong di Đảng saong Kanja brei ngak dahlau ka bhum mikva bangsa takik hu daong ka Đạ Sar samar drah mek hu tanut chuan palei pala bahrau di 5 thun dahlau. Urak ini dom baoh sang kan kathaot di xã tui asal kadha bahrau tok daok 2%.

Mintri ngak nong saong patagok palei pala bahrau hu harak samar drah payua UB bhap bini dom tỉnh, ban di Trung ương ka bruk patagok pasang iek, langyah dom bruk pandar pandap pakauk dalam raong glang, sik ngak ralow athur.  Mintri ieu dom gah chức năng haong karja dom pakat brei pasang iek, langyah dom bruk pablei salih, pajeng ba pandap pakauk, pandar pandap pakauk di labik raong palimek, labik raong glang, labik sik ngak ralow athur tui Hukum raong glang, Hukum Thú y saong dom tacei pato karei.

Harei 11/1, Akaok Jabat Nội các Nhật Bản Hirokazu Matsuno brei thau, Nhật Bản bahrau payua harak oh njauk hatai ka bruk Trung Quốc brei padeih pabak thị thực ka rahra negar ini, saong hu panuac ieu Bắc Kinh klaak bruk ini. Bruk Trung Quốc yah klaak sarak “Zero-COVID” hadei di jaik 3 thun pandar hu ba tal bruk tamuh tabiak jit ruak dalam taneh ia, ngak brei menuac sia mboh duh hatai lac meda hu dom janih vi-rút bahrau. Dom taneh ia yau ye Mỹ, Nhật Bản, Hàn Quốc, Anh, Pháp… tabiak bruk dut iek ngan haong tuai mai meng Trung Quốc. Piah cagar veik bruk ini, Trung Quốc hadei di nan hu brei padeih pabak dom thị thực ka tuai Hàn Quốc saong Nhật Bản.

Thủ tướng Prang, amuk Elisabeth Borne  bahrau brei thau Dự luật salih bharau bruk hưu trí, piah pasiam bruk thâm hụt di dom kadung jien hưu trí dui atah 30 thun tapa saong dalam tuk taneh ia Prang daok dang anak rilo kan kandah. Dalam dự luật ini, umo thun padeih hưu di Prang hu brei tagaok, meng 62 thun di urak ini, tagaok 64 thun kuhria meng thun 2030 saong piah hu mbang ginup bruk hưu trí, tukvak ngak bruk, blei BHXH hu tagok tui, jeng 43 thun kuhria meng thun 2027. Gam haong nan, jien bilan padeih hưu takik di abih jeng hu ramik brei tagok samu 85% yaom jien bilan takik di abih.

Tui sa pasang iek di pasak roh duah IBRiS, jaik abih rahra Ba Lan oh njauk hatai bruk pandar jien ơ-rô salih ka jien zloty urak ini di Ba Lan. Tuk hu sua tangi: Ba Lan njauk pandar jien haong gauk di châu Âu saong salih ka jien zloty di Ba lan halei oh, tok hu 24%urang hu sua tangi javap jaloi lac njauk pandar, daok 64% oh pachreih tui. Min, dom urang lambaok doanh nghiệp llac takre  bruk pandar jien euro jang./.