Melam kabroi, hadei tuk caoh mbanh  di Kapol caoh mbanh dat blong U23 Viet Nam mbang janeh Kapol caoh mbanh dat blong U23 Indonesia, Thu tuong Rajaei Phạm Minh Chính hu payua harak thu tadhau ayuh. Thu tuong mboh bui hatai chreih chrai tuk Kapol caoh mbanh U23 Viet Nam caoh mbang janeh, ini lac mbang ka klau dak gauk mek hu jayak U23 Dong Nam A. Thu tuong kakei lac, dalam luac tuk pakacah, dom urang caoh mbanh kham merat, ba abih hatai jia tame, khik la-ar salamat karo kajap dalam hatai, piah ngak hu dom bruk jak jeng siam mekre, pabak hatai jia, hadah mbaok meta saong pachreih hatai yaok trieu rahra Viet Nam dalam saong langiu negar. 

Tinh uy Dong Nai biar harei kabroi peih Nyaom biai pataom iek veik bruk ngak di karja palei dua pakat saong peih ngak tui sarak ba 37 urang jakar mai ngak bruk, ngak dom bruk dang akoak pakat uy dom xa, phuong, gah chinh tri- xa hoi. Brei panuac  nyaom biai, ong Vũ Hồng Văn, Bí thư Tỉnh uỷ Đồng Nai caong khin, tukvak anak tal, taong abih pakat chinh tri di tinh birai ngak brei ginup urang jakar ngak bruk, labik ngak, ndap nda mac jaraih, pataom tame jhul pakhang bruk cakrok patagok kinh te - xa hoi patagok hu dua taka so.

Xã Vĩnh Hải, tỉnh Khánh Hòa hu pagam meng 3 xã tapen tasik nan lac Nhơn Hải, Thanh Hải và Vĩnh Hải (di huyện Ninh Hải, tỉnh Ninh Thuận klak). Xã birau hu labaih 36.000 urang, ralo meng lac urang bangs Kinh saong Raglai diukrai. Ini lac bhum quy hoach Sang mac ndien hat nhan Ninh Thuan 2, di danak dak hu makna praong pakat negar. Tukvak tapa, dom gah ngak nong- lam - kaya dalam ia,  ngak tabiak kaya mbang, ia methin saong ngak nong kong nghe glong di xã patagok siam mekre. Danak dak palei pala birau saong pandap OCOP di xã Vĩnh Hải urak ini hu 17 kaya OCOP 3 patuk, 1 kaya 4 patuk pakat tinh. 

Di xã Thới Quản, huyện Gò Quao, tỉnh Kiên Giang (urak ini lac xã Định Hoà, tỉnh An Giang), labik ini hu rilo bhap bini Khmer diukrai, dom thun jaik ini raidiuk di mikva dak harei dak hu salih birau hadah mbaok meta. Rik tame ngak brei uak drei patagok hu yau nan lac hu bruk ngak takik thei thau di Đại đức Trương Văn Tuấn, Pho Ban Trị sự baha Tổng Quản. Meng angan je saong abih hatai ngak bruk, Đại đức Trương Văn Tuấn jak ba dom urang bhik rik daong, padang ngak dom danak dak praong. 5 thun tapa, meng hu bruk jak ba di Dai duc, xã Thới Quản padang ngak hu 30 baoh sang anit ranam saong 6 baoh tatua khang kajap daong bhap bini nao mai hu mbuan lagaih, salamat.

Ban raya HCM hu 10 urang metai kayua ruak panjiak (pandiak - sốt xuất huyết) tabiak darah meng  akaok thun 2025 mbiah tal ini. Dom urang njom ruak samar, pambak praong saong hu rilo urang ruak trak, ngak cuang kandah tal dom sang jru ruak. Gah y te Ban raya daok peih ngak sumu gauk dom jalan pacang caga ruak saong metai. TS.BS Nguyễn Minh Tuấn, Akok khoa Panjiak tabiak darah, Sang iek ruak Nhi Đồng 1 khan lac, rah tabiak trak pambuak tal bruk sinh hoc di virus, rup pabhap urang ruak saong prein pacang caga ruak. Dom uranaih hu pacang veik ruak biak khang ngak tabiak darah, tabiak rilo darah, ruak trak rilo labik dalam rup.

Bruk ngak trak khin Thu tuong Nhật Bản trun rai dak catang, ba tal bruk chinh tri dalam taneh ia ini dak harei dak pandiak cuang kandah. Dalam dom kan thau dahlau urak ini, bruk jhak abih ngan haong dang Tự do Dân chủ Nhật Bản (LDP) lac klak rabha dalam dang. Dom harei jaik ini, bruk njauk hatai saong cagar di Thu tuong Ishiba gam Lien minh  pambak praong di dom mang xa hoi, ba tal bruk oh ka bhian mboh saong jak gauk trun jalan.

Dom urang ginum biai pakat glong di Mỹ saong Trung Quoc hu taom gaok gauk di Thụy Điển piah langyah dom bruk meriak gauk kinh te, phun jien lac bruk praong di mesruh metak pablei salih di dua taneh. Trung Quoc daok dang anak jaik tal harei 12/8 piah ginum biai jien je khang kajap haong karja di Tong thong Donald Trump, hadei Mỹ saong Trung Quoc hu ginum biai tapa dalam 6 bilan piah padeih rilo adit catang kayua jien je trak.

Labaih 1.300 urang lin apui daong padam khuah saong yaok pluh ahaok pruh ia  padam apui di klau labik glai praong di bhum kreh saong bhum barak Bồ Đào Nha. Jiak abih dom bhum di Bồ Đào Nha daok dang anak bruk khan kakei tanut bhong meriak ka pui khuah glai. Jabat chuc nang brei panduan ba yaok pluh rahra saong kareik pabah mbang dom jalan sit tame glai sirah ma-in di dom labik danei angan mekre gheih. Dhur mur kayua apui khuah glai me-om tagok dom bhum palei jiak taphia saong ba tal bhap bini brei daok dalam sang./.