Meng akaok thun tal ini, dalam negar hu labaih 1.450 sruh jit ruak aih caraoh pabui chau Phi di 48 tỉnh, ban saong kuhria taong abih tih pabui ba nao am cuh klak labaih 81 ribau drei, glong jang 2,6 mbang dut saong tukvak ini thun dahlau. Piah pacang caga sumu hu siam, pasiam pandap pandar, khik brei ginup pandap mbang, Thu tuong caong khin Akok UBND dom tỉnh ban langyah salah dom labik jit ruak, oh caik tamuh jit ruak birau; ngak hacih sa-at, am cuh klak pabui njom ruak, jaik nyom ruak, pabui metai, daong urang raong glang gaok khut khat kayua jit ruak. Tui nan, yaok kuhria taphon pabui hu klauk jru vaccine pacang Jit aih craoh pabui chau Phi. Akok UBND dom tỉnh, ban brei taduan bruk anak Thu tuong meyah caik rah tabiak bruk tamuh Jit aih craoh pabui chau Phi di bhum palei drei khik iek.

Urak ini, bruk tavak jien bilan bhian mboh di dom gah padang ngak, ngak kalik juah, jik khan ao di ralo bhum palei yau TPHCM, Đồng Nai saong Bình Dương lac dom labik pataom ralo urang ngak kong saong doanh nghiep ngak mbang. Yau nan ye, Mentri LĐ, TB saong XH hu caong khin dom tỉnh khan brei thau bruk tavak jien bilan piah hu jalan langyah, abih di nyu lac dahlau tuk Tet nguyen dan, oh caik kan kandah tal raidiuk xa hoi saong jien mek tame di urang ngak. Tong LĐLĐ Viet Nam saong kong doan di dom bhum palei jeng hu dom sarak daong urang ngak kong hu raidiuk kan kandah dalam tuk Tet, yau daong harak ve radaih, radaih pui piah urang nao palei.   

UBND TPHCM birau brei padang Kapol Ngak bruk langyah dom asar kadha pambuak tal bruk brei Sarak pandar taneh, bruk ngak po drap ar gam angaok taneh ka nyaom kapol, urang di dom danak dak padang ngak danak dak sang daok pablei ka urang di TPHCM. Kapol urang ngak bruk brei pasang eik, yaok kuhria dom labik sang, danak dak pablei salih sang daok, meng nan thau lac, bruk tavak tavaiy, parabha saong ba tabiak jalan lang talaih  kan kandah brei sarak gal sang danaok. Mbiah tal bilan 4 thun ini, TP.HCM hu daok labaih 78.000 baoh sang dalam danak dak sang daok pablei oh ka hu harak gal taduan sang.

Tinh Ninh Thuan pataom tame jak ba dom gah, dom urang, dom doanh nghiep piah daong, padang ngak sang daok ka urang kathaot, jaik kathaot  ka sang daok. Kham merat  tal puac thun ini ngak hu 500 baoh sang; mbiah tal abih thun 2025 ngak brei oh daok baoh sang halei taik tahak, khut tayak ka urang kathaot, jaik kathaot dalam tỉnh.

Dalam tukvak 2021-2025, tinh Binh Thuan pataom tame peih ngak Danak dak 1 saong Danak dak 2 di Danak dak pakat negat cak rok patagok kinh te - xa hoi bhum urang bangsa takik saong bhum ceik. Tui Mban Bangsa tỉnh Binh Thuan, tỉnh hu peih brei labaih 25 tỷ đồng daong ka urang bangsa takik. Meng phun jien hu daong taneh pala drak ka 1 baoh sang, taneh daok ka 56 baoh sang, sang daok ka 320 baoh sang, salih bruk ngak ka 970 baoh sang, saong ia pandar  ka 165 baoh sang, ramik pasiam 6 labik ba pandar ia hacih. Tui kuhria mboh dahlau, mbiah tal puac thun ini, dom baoh sang hu mbang tui daok tagok veik rilo jang.

Pho Tong thong Mỹ gam lac urang tame palih ruah di đảng Dân chủ Kamala Harris iew phone tadhau yuh ong Donald Trump hu palih ruah ngak Tổng thống Mỹ thun 2024. Tổng thống Joe Biden jeng iew phone mai tadhau ayuh ong Trump saong da-a ong Trump tame rivang Nhà Trắng. Tong thong Biden hu sanya brei jao bruk ngak ka lagaih siam saong kakei lac bruk praong brei yak yum jum pataom taneh ia. Ong Trump urak ini hu 292 hala phieu dut haong  muk Harris lac 226 phieu. Ong Trump janeh mek hu 5 dalam 7 bang meriak praong saong urak ini daok dang akaok di dua bang daok veik.

Bruk roh duah birau di dom urang ilamo Australia hu ba tabiak njauk haduh hatai ka bruk metau kayua ruak ung thu di dunya, urang metai tagok ralo mneg 9 trieu 7 rituh ribau urang thun 2022 tagaok labaih 18 trieu urang di thun 2050. Ung thu phoi mboh lac bruk ba tal metai kayua ruak ung thư di thun 2050. Ini lac brei mboh cambaic laic ka bruk mbuan metai kayua ruak nan, yaom lac gah y hoc hu rilo cakrok birau saong jalan caga ruak ung thư dak harei dak hu caik hatai.

Gah Y te Dunya (WHO) hu brei ngak bruk panduan ba labaih 100 urang ruak trak tabiak truh Dải Gaza, labik y te  daok gaok kan kandah kayua mesruh metak suai lavik. Dalam dom urang hu panduan ba nao hu rilo uranaih saong urang taha, dom urang njauk rambuac trak atau njauk ruak trak. Mbang panduan ba nan lac sa dalam dom mbang panduan ba  iek ruak praong abih kuhria meng dahlau mai di WHO dalam bhum taneh, brei mboh bruk samar chip saong bruk palai pajua bo bhap bini Gaza daok pandok./.