Piah daong mikva samar tani tanat raidiuk, Thu tuong Phạm Minh Chính birau payua harak dien caong khin dom mentri, pataom tame duah dom urang lahik; sumu daong ka dom urang gaok bala; oh luai ka thei kurang dap mbang, kurang ngui cuh, iek lapa; ruak kik brei khik iek prein yawa…Samar daong ka bhap bini ramik pasiam veik sang danaok khut tayak; daong bhap bini ramik sang danaok, ramik hacih alam moi truong, labik daok pacang caga jit ruak hadei ribuk ia…  

Hu mbaok di Nyaom roya pakacah gauk ranam negar tinh Cà Mau mbang ka I,  Pho Akok negar Võ Thị Ánh Xuân caong khin tinh Ca Mau  peih bruk jak ba ngak tui bruk pakacah gauk ranam negar  hu praong lagaih dalam raidiuk xa hoi. Cà Mau njauk brei patagok bruk ngak hu makna di jak ba gauk ranam negar, ngak ka dom bruk jak ba jeng preih khang meng dalam yaok urang manuac, pamedeih bruk caong ba drei tame ngak bruk, hadah krah saong yam tagok khang kadang di rajakar, urang dang, dom bhap bini rahra.

TP.HCM hu labaih 336 labik mbuan gal jalan, dalam nan hu 186 labik hu taong yaom glong. Dom labik mbuan gal jalan pataom tame di pasak saong dom jalan tame yau Jalan roya 13, tatua Bình Triệu, tatua  Phú Cường, Jalan raya 1, Jalan raya 22, canah jalan An Phú, tapen kraong Cát Lái, tapen Bình Dương...Dom labik ini oh hu tani tanat bo pasiam tui tukvak bruk rah tabiak. Kong an TPHCM brei patui pasang iek, langyah catang dom bruk ngak suan, ramik pasiam, atah klak dom labik dui atah.

Mentri Ilamo, The thao saong Yulit birau brei ba bruk ngak ginrang meng tangin, kaya pacang mbaok di urang Khmer tame Drap ar ilamo oh mboh meta pakat negar. Ini lac bruk ngak meng tangin hu dalam sajarah meng dua abap dahlau, pambuak haong dom janih ilamo daoh bhap bini yau tamia bhap bini, tamia adat ngak yang, ca kich, tamia Rô-băm, kadha Dù kê, tang hagal Chhay-yam…Dom pandap ginrang, kaya pacang mbaok oh lac ilamo bo daok lac bruk siam mekre dalam raidiuk di bhap bini Khmer.

Di xa Mỹ Hòa Hưng, tỉnh An Giang birau rah tabiak glut jaleih ar kraong: labik glut jaleih di 3 palei Mỹ Thuận. Labik jaleih atah 150 met, mbang tame ar 20 met, ngak glut jaleih abih jalan nao mai, ngak kan kandah tal 12 baoh sang; kuhria labaih 1,2 ti dong. Urak ini, glut jaleih ngak jak tal jalan nao mai, dom radaih oh nao mai tapa labik ini hu. Gah chuc nang jeng brei padang ralaoh khan brei thau labik mbuan bala rah tabiak.

Jabat An ninh Y te kakei lac, uranaih saong urang jeng dam jeng dara, sinh vien dai hoc daok gaok dom ruak barah màng glo saong jom ruak darah kayua glo mô cầu glaong jang. Meng akaok thun tal ini hu 378 bruk njauk ruak barah màng glo mô cầu njom tame. Dom bruk brei mboh ka ruak màng glo dalam nan hu pandiak rup glaong, taglaoh aok, pandik ralaow, khang takuai, gaok kan kandah tuk gaok tanrak hadah saong ndaih baoh. Dom urang ngak bruk hu ndom lac klauk jru caga jeng lac bruk pacang caga siam lagaih abih piah pacang ruak trak saong metai.

Labaih 1.800 urang ngak kong di sa sang mac ngak takhaok kalik juak di Banten, Indonesia njauk brei padeih bruk, hadei tuk rilo kaya pablei tabiak njauk bayar gilac kayua oh siam. Yau nan min Kong ndoan Indonesia oh njauk hatai haong bruk mbaoh tangin ini, kayua bruk brei padeih bruk meda plaih hu meyah pasang iek siam asar siam saong pasiam bruk pasang iek dahlau nan. Gam haong nan oh njauk hatai haong bruk brei padeih bruk kayua oh njauk taong abih dom urang ngak bruk thei thei jeng srap gap atau njauk hatai ka sarak brei padeih bruk ini.

Tui bruk mbaoh tangin di thẩm phán liên bang, Rajaei My brei patui veik ngak danak dak Daong asar siam pabak dalam tukvak kareik pambang meng bruk pandar kadung jien caga. Bruk ini ngak ka labaih 42 trieu urang My oh huac ka eik lipa kayua kurang kaya mbang huak. Tong thong My dahlau diah ong Barack Obama dalam sa kadha ba tagok angaok mang xa hoi ieu ndang Cong hoa di ong Trump brei ngak samar chip piah khik kajap kein lagaih ka rahra, meyah oh ngak ye yaok trieu uranaih saong urang praong thun umo meda eik lipa dahlau mbang padeih padei harei raya./.