Mbang ribuk, hajan ia sua di dom tinh gah Barak saong gah meraong Negar ngak 54 urang metai saong lahik, 140 urang njauk rambuas; takik abih 154 baoh sang jaleih, ia theik; labaih 154.000 baoh sang papeih pabung, khut tayah… Piah samar drah pasiam dom kanjah jhak di ribuk ka 10, Thu tuong rajaei hu payua harak pandar dom mentri, UB Bhap bini dom tinh, ban jak ba abih gah, jak ba rilo urang meda peih ngak catang bruk pasiam dom kanjah jhak di ribuk, ia sua, samar drah tani tanat ka rahra. Gam haong nan pataom tame daong rahra padang sang bahrau, pasiam sang danaok gaok papeih pabung, daong labik daok anak meta, oh luai ka rahra oh hu labik daok.

UBND Ban Cần Thơ hu jalan pato pasram dalam saong langiu negar ngan haong kapol urang jakar, vien chuc piah paglong ilamo ngak bruk karja palei dua pakat. Dalam nan  brei pasram pato urang ngak dom gah ilamo saong kong nghe, kong nghe khaw tin, kinh te so, logistics, kong nghiep che bien, nong nghiep pandar kong nghe glong, pablei salih, ilamo, nghe thuat, kaya tai nguyen  saong alam moi truong, salih pandar taka so.

Ban uy Ban raya Ho Chi Minh bahrau peih Harei ba tabiak Tapuk Sajarah Sai Gon – Ban raya Ho Chi Minh dalam nan hu 5 kadha saong 1 blah hu ngak takik gilac. Ini lac mbang akaok meti Ban raya ho tapuk sajarah, pataom hu ginup abih, ngak jeng sa dom luac jalan ngak jeng saong patagok di bhum taneh Sai Gon – Ban raya Ho Chi Minh. Tapuk Sajarah Sai Gon – Ban raya Ho Chi Minh lac tapuk biak banrik duh ka bruk duah thau, bac megru, roh duah ka Ban raya, meng nan paglaong hatai je di rahra tame bruk dui ba di Ndang, tame bruk salih bahrau taneh ia.

Dalam vaktu meng thun 2025 tal thun 2030, tinh Dong Thap sahaneng mboh bruk ngak nong lac bruk praong piah patagok khang kajap, ba mai rilo kein lagaih; jhul pasamar bruk ngak mbang payeng, lagaih haong bruk langik tathik salih karei, ngak jeng dom bhum ngak kaya tamo hu ralo. Dong Thap jeng kuhria peih ngak Danak dak pakat negar padang palei pala birau khang kajap, paglong raidiuk di bhum palei, paglong bruk pandar kong nghe glong ka urang ngak nong. Patagok bruk ngak “ Palei pala hadah krah”. Salih birau, paglong danak dak OCOP.

Pasak Patagok taneh tinh Dong Nai hu meraik yaom hu jak jeng praong jaik 500m2 di phuong Tam Hiệp, tinh Dong Nai; urang njauk meraik yaom brei yaom ka taneh haong yaom jien jaik 34 ty dong. Ini lac taneh akaok meti tinh Dong Nai meraik yaom jak jeng hadei 5 thun (meng thun 2021 tal ini). Labaih 5 thun tapa, Dong Nai gaok rilo kan kandah, tavak tavaiy dalam bruk meraik yaom taneh. Hu dom taneh hu ba tabiak meraik yaom rilo mbang min oh jak jeng. Makna mai meng bruk darak pasar cadu; rilo taneh daok di labik hu makna, hu gah buh jien tame sangka min gah chuc nang oh ka salah blaoh hukum piah ba tabiak meraik yaom.

Ngan haong hala phieu di dua gah 55 -  45, Thượng viện Mỹ sa mbang tra oh brei tapa hu sarak ngak bruk di ndang Cong hoa piah dui atah kadung jien lien bang tal harei 21 bian 11, kayua oh ginup 60 phieu njauk buh. Dang Cong hoa saong Dan chu My daok tuh ka gauk  kayua rajaei kareik pabah mbang. Labaih 750.000 urang jakar lien bang brei padeih bruk oh hu jien bilan. Dom jit vu karei yau khik iek salamat mblang kapal ahaok, pasang iek jalan angaok langik, bol lin saong an ninh daok peih ngak min huac tavak sre suai lavik.

 Dom urang metai dalam mbang megei tayun taneh khang 6,9 do rah tabiak di tinh Cebu, Philippines dalam melam 30/9 hu tagokl 72 urang, jaik 300 urang njauk rambuas. Labiah 47 ribau baoh sang gaok kanjah jhak. Langiu di nan, 87 danak dak ha tang gam haong 597 baoh sang njauk khut tayah. Philippines, negar ndih di angaok “Vanh dai apui” Thái Bình Dương, labik bhian rah tabiak megei tayun taneh saong ceik apui.

Mentri Y te Bồ Đào Nha khan lac langiu bruk pakauk yaih khan pambak tame uranaih umo ala 16 thun, daok hu adat hukum pakauk dom janih ia menyuk pabak prein di dom sang bac  piah khik caga prein yawa di uranaih. Rilo roh duah dunya tacei tabiak dom nyaom urang mbuan pambak tame nan lac uranaih, dam dara , urang kumei metian saong dom urang ruak baoh hatai, jalan tung bruac, darah atau sraw kadau jalan sahaneng juai menyum ia nan. Kayua dom janih ia nan mbuan ba tal jhak kayua caffeine./.