Di var gaok mbaok, pok meyaom dom anek saih mek hu yai di dom mbang pakacah pakat dunya thun 2025, Thu tuong Pham Minh Chinh tadhau ayuh dom kamuan diuk rai sa rai diuk biak hu caong takre uak drei tagok, truh tapa kan kandah saong truh tapa bruk oh ka ngak hu di drei piah mek hu jak jeng praong jang. Brei bac megru piah hu ilamo siam, hadah krah, prein yava bak siam saong hatai anit ranam; bac megru piah brei mboh drei; bac megru piah jeng urang hu lagaih, duh ka Taneh ia negar, duh ka rahra. Dalam thun 2025 hu 91 adei anek saih mek hu yai dalam dom mbang pakacah pakat dunya.

Dalam dua harei 25 saong harei 26 bilan 12 peih bruk Pakacah palih ruah anek saih naih joi pakat negar THPT thun bac 2025 -2026 hu labaih 6.750 anek saih mai meng dom bhum palei dalam negar. Thun ini, anek saih pakacah 13 mon bac, dalam nan, mon Ngu van  hu anek saih pakacah rilo jang, hu tal 700 adei; Mon Sap Nga hu takik anek saih pakacah lac 98 anek saih. Mbang pakacah ini duah mboh, palih ruah dom anek saih piah pato pasram, kuhria caga ka dom mbang  pakacah dunya saong bhum taneh, tui nan rik daong  paglong bruk pato pakai di dom taneh ia dalam negar. 

Tinh Vinh Long hu 9 sang bac pho thong bangsa gam daok gam bac saong 1 Sang bac Meteh pakat Pali-Khmer. Dom sang bac ini jeng mek hu njauk pakat negar, hu buh jien tame padang ginup bak dom banah yau labik bac magru, labik hiệu bộ, gilang tapuk, bilik daok..Piah paglaong asar siam pato megru sap Khmer dalam majam pato megru pho thong, So Pato Pakai tinh Vinh Long hu buh jien tame labaih 1 ty dong ka ndap nda kaya, harak pato megru, tapuk bac megru saong dom bruk daong karei, pabak hatai caong ka anek saih nyim piah bac megru.

Dalam tuk Tet Duong lich ini, TPHCM oh mek jien radaih buyt ka bhap bini. Bruk nan  ba mai kein laba siam gheih, brei mboh thaot binguk  “Ban raya anit ranam”, rik tame pachreih bhap bini pandar radaih duh ka bhap bini. Tukvak anak tal,  So  Padang ngak ban raya pambuak haong dom don vi pambuak peih ngak dom danak dak ndik radaih oh mek jien dalam tuk Tet Nguyen dan.

Di labik kraong Vàm Cỏ Đông, palei Phước Trung, xa Phước Vinh, tinh Tay Ninh, balai Bien phong Vàm Trảng Trâu pambuak haong Kong an xa Phước Vinh peih bruk pasang iek, dauk trak saong mek hu dua urang pajeng phao patuh suan hukum. Ndap nda mek hu lac 28 kg phao bangu patuh, hu angan di negar langiu. Di jabat karja, dom urang khan lac kayua tukvak jaik Tet, yaom phao dalam negar tagok glaong saong pablei duah laba.

Kapol urang pablei salih dien tu Coupang di Hàn Quốc chap veik hu taong abih du lieu di 3.000 urang mblo tabiak gah langiu, tui nan brei mboh oh khaw tin halei  langiu kong ty. Kapol ini khan lac urang ngak mblo tabiak du lieu kayua sa urang ngak bruk pak ini dahlau diah. Urang ini taduan bruk ngak suan saong pabak panuac khan cambaic laic saong jalan tame suan hukum dom khaw tin di tuai damuai.

Rajaei Indonesia bayar jien daong sang daok yaok bilan ka yaok ribau rahra labik sang danaok kayua ia sua trak di Sumatra bahrau blaoh. Tui nan Rajaei hu brei tanut jien daong 600.000 rupi/ bilan (samu labaih 1 trieu VND) ka yaok baoh sang. Langiu di nan dom gah ngak mbang pablei salih pakat karja jeng padang 15.000 baoh sang ka rahra lahik sang daok. Gam haong nan dom gah ngak mbang pablei salih pagun sanya daong dom hatai caong samar chip pacang cakak bala, yau pasiam dom ndap nda kaya jalan mbak, vien thong, piah daong pambuak rahra saong dom bruk samar chip di labik rah tabiak bala.

Dom urang roh duah di Dai hoc Quoc phong Trung Quoc birau ngak bruk sa bruk siam: pasamar ngak hu siam sa radaih ndien peih drah samar 700km sa mon oh ka bak 2 giay peih nduac jalan atah 400m. Peih ngak iek brei mboh prein pasang khik  di radaih. Bruk ngak hu yau nan lang talaih hu dom bruk kan kandah praong, dalam nan hu peih drah samar, tacei pato tuan dien tu, ngak brei salih  nang luong prein khang saong pandar nam cham harit khang.