Pahadar  Harei Doanh nhan Viet Nam (13/10), biar harei kabroi, Thu tuong Phạm Minh Chính dang akaok Mbang Pataom mbaok di dom urang ngak mbang naih gheih. Thu tuong ndom cambaih laih, dak kan kandah, kateik geik ye dak kham merat, khang hatai yam tabiak atah jang; gah ngak mbang, urang ngak mbang pablei salih brei “nao tabiak di grauk labik”. Thu tuong Phạm Minh Chính thau dhar phol dom urang ngak mbang pablei salih tuk halei jeng daong taneh ia negar, rahra dalam tuk njauk khat lahik kayua bala, ribuk ia sua…

Page ini harei 10/10, hu 62 urang jakar y te di tinh Gia Lai tagok jalan nao daong 2 tinh Thai Nguyen saong Cao Bang, ngak bruk daong urang jakar y te ramik pasiam hadei ribuk ia sua, iek glang prein yawa bhap bini kayua ribuk, meng harei 11 tal harei 17 bilan 10 anak tal. Dom urang jakar y te hu jao bruk ngak hacih alam moi truong, ngak hacih halau ia, pacang caga ruak, brei jru saong langyah pathau khan ka prein yawa bhap bini. Ini lac dom  bruk ngak brei pacang cakak jit ruak hadei ribuk, khik hacih alam moi truong saong prein yawa bhap bini bhum ribuk ia sua.

Mban Lambaok vakil Hoi quan Quảng Triệu, Kapul urang Lo Quảng Đông daok di Ban Can Tho hu mai rivang, ngak bruk haong Vụ Pathau khan bruk ngak bangsa, aguma, Mentri Bangsa saong Aguma di Can Tho. Brei thau haong Mban Lambaok Hoi quan Quảng Triệu, Phaok akaok Vu Pathau khan bruk ngak bangsa, aguma Tào Việt Thắng hu taong yaom glaong dom kham merat di dom hoi quan dalam bruk khik ramik ilamo bangsa, daong haong Vụ dalam bruk sangka ka mikva urang bangsa takik, abih di nyu nan lac urang bangsa Lo…

Thu truong Mentri Ngak nong saong Moi truong Phùng Đức Tiến birau ngak bruk haong UBND TPHCM ka Danak dak padang Khu Ngak  nong pandar ilamo kong nghe glong di xã Củ Chi. Danak dak praong hu 23 ha, anak tal peih ngak jeng pasak roh duah,  ngak iek dahlau, jao brei ilamo kong nghe saong pato pasram urang jakar ngak bruk glong, pamong tal bruk ngak nong hijao, payeng saong samo samar. Ini lac bruk ngak kuhria atah dahlau piah ba sarak di Karja negar tame dalam bruk ngak nong cakrok patagok khang kajap, salih birau hadah krah saong salih pandar taka so. 

UB Bhap bini tinh Vinh Long bahrau mbaoh tangin Danak dak Buh jien tame padang tatua Đình Khao tui jalan pambuak bruk karja saong ta-eng menuac urang (PPP). Tatua Đình Khao atah 4,3km, tukvak thiet ke lac 80 km/tuk; taong abih jien buh tame labaih 2.852 ty dong, tukvak padang 3 thun. Danak dak tatua Đình Khao lac danak dak hu makna, daong pasiam bruk gar tavak di tapen bha Đình Khao, paglaong prein ngak Jalan raya 57, gam haong nan dui katut tukvak pambuak di Vinh Long saong dom tinh bhum taneran kraong Cuu Long, jhul tagok kinh te - xa hoi saong pablei salih dalam bhum.

Tong thong Philippines Ferdinand Marcos page ini brei panduan ba bhap bini di dom labik tapen tathik  hadei tayun megei baoh taneh khang 7,5 do. Ong khan lac karja taong yaom bruk megei taneh saong brei bol lin daong duah tuk abih megei. Mac dut iek riyak song than Mỹ hu ba tabiak panuac kakei lac riyak song than mbuah rah tabiak di dom ar tathik atah 300 km meng labik tayun megei saong urang di dom labik  tapen tathik.

Dalam kham merat piah pacang khik uranaih plaih kanjah jhak di Internet, Thu tuong Dan Mach Mette Frederiksen bahrau ba tabiak adat pakauk uranaih umo ala 15 thun pandar mang xa hoi. Dan Mach di bilan 2 thun ini jeng pakauk anek saih pandar phone di sang bac saong kalup kapul hadei tukvak bac magru. Dom roh duah ka kanjah jhak di mang xa hoi ngan haong uranaih saong urang si jeng dam jeng dara ngak ka rajaei brei kakei caga veik ka bruk brei ka uranaih pandar mang xa hoi.

Hukum khik iek athur glai di Nhat Ban daok ngak jhak tal manuac sia saong drap ar di rilo bhum palei. Dalam nan, njauk ndem tal bruk lagau ginuk manuac. Tui harak pathau khan kayua Mentri Moi truong Nhat Ban birau khan, kuhria dalam bilan 9 meng tapa, taneh ia ini  hu tal 39 urang gaok bala khat lahik kayua lagau ginuk. Ini lac ralo abih kuhria meng lavik mai. Dalam nan hu 5 urang metai, rilo urang karei njauk rambuis trak./.