Dalam thun 2022 hu 142 anek saih, sinh viên, dam dara bangsa takik naih joi hu UB bangsa pambuak haong Mentri Pato megru,  Kapul Dam dara Cộng sản Hồ Chí Minh pakat negar pok meyaom.  Ini lac thun ka 9 anek saih, sinh viên, dam dara bangsa takik naih joi dalam negar hu meyaom. Dom anek saih, sinh vien, dam dara bangsa takik naih joi nan mai meng 47 tỉnh, ban ngan haong 50 bangsa, bac megru mek hu tanut glong dalam dom mbang pakacah anek saih naih joi;  pakacah ilamu – kỹ thuat pakat negar; hu palih ruah tame sang bac đại học saong dom adei mek hu rilo tanut glong, naih gheih dalam dom bruk daong xa hoi.

Tui Sở Ilamu the thao saong du lich tinh Long An, hu labaih 50 rabau mbang tuai mai Long An dalam dom harei padeih Tết. Piah duh ka bhap bini saong tuai damuai dalam tuk ini hu siam mekre, doanh nghiệp ngak mbang gah du lịch di Long An hu padang dom janih ravang me-in bharau, pasiam janih ravang me-in klak; pambuak haong dom labik pabak dịch vụ, ngak jeng dom tour yaom lap piah pachreih tuai damuai dalam taneh ia. Bruk khik caga siam mekre salamat ka tuai damuai hu Long An ngak biak siam.

Tuk padeih Tet thun 2023 nasak Tapai, dalam tỉnh Cà Mau pachreih hu jaik 164.500 tuai mai rivang dulich, tagok labaih 61% dut saong tukvak ini thun dahlau. Kuhria abih tih jien mek tame meng  dịch vụ dulich hu labaih 120 tỷ đồng. Dom khu, labik dulich hu rilo tuai mai rivang yau ye: Labik kakuh pahadar Chủ tịch Hồ Chí Minh, Labik rivang ma-in Hòn Đá Bạc, Labik rivang ma-in pakat negar Mũi Cà Mau, Labik rivang ma-in Khai Long...Tet thun ini, dom labik rivang ma-in, labik inem krung hu ramik caga biak siam piah taduan raok tuai dulich saong khik brei salamat ka tuai damuai mai rivang.

Tui yaok pataom di Mintri Y tế, dalam tuk Tết anek sak tapai, tok hu 66 urang njauk ruak COVID-19 di 20 tỉnh, ban saong oh hu urang halei metai, dom labik ndih tapui, blac raih mek anek kamar hu 18.020 anek kamar tabiak rai. Mintri Y tế taong yaom dom jit ruak karei jeng daok hu pasang iek, oh hu sruh jit praong dalam bhap bini, oh hu urang halei njauk ruak njom mbak kan kandah.

Dalam 7 harei padeih Tet Nguyen dan, dom sang iek ruak di Ban raya HCM hu cap cuu ka 3.419 urang ruak kayua gaok bala angaok jalan mbak, hu 4 urang metai. Langiu di nan, dom bala dalam ngak mbang, ngak huak saong ngak bruk lac 2.621 mbang, tagok rilo jang 700 mbang dut saong thun 2022. Bala kayua taong gauk lac 275 mbang; bala kayua cuh pháo 54 mbang. 

Ong Rafael Grossi - Taong Yam ndok gah Năng lượng Nguyên tử Dunya (IAEA) brei thau, Iran hu ginup pandap piah ngak tabiak "dom" vũ khí hạt nhân saong ong kuhria nao tal Tehran di bilan 2 piah ginum biai bruk pambuak veik dom bruk pasang iek hạt nhân di gah IAEA. Brei panuac anak Nghị viện châu Âu (EP), ong Grossi ndom lac, bruk ngak haong gauk abih gah (JCPOA) urak ini daok gaok tavak tavaiy praong, dalam nan hu bruk Iran cakak talei pambuak 27 camera pasang iek di IAEA, nan ye gah IAEA oh pasang iek hu siam danak dak hạt nhân di Tehran.

Tui pasang jaik ini kayua Mentri Hội nhập châu Âu di Serbia peih ngak, oh ka tal meteh bhap bini Serbia pachreih tui taneh ia ini tame Liên minh châu Âu (EU). Dalam nan hu 32% bhap bini cagar veik, 13% meda oh buh phieu, dalam tuk nan hu 12% daok veik ye oh ndem hagait meyah peih bruk duah thau hatai sahaneng di bhap bini ka bruk Serbia tame EU. Bruk pasang iek nan njauk ngak piah Serbia meda tame EU piah pasiam rai diuk di bhap bini saong salih bharau taneh ia.

Dalam dom harei tapa di Tây Ban Nha haong Đức rah tabiak rilo bruk taong klauk meng to ngak brei rilo menuac metai saong njauk rambus. Urak ini urang jakar daok duah thau, piah ngak brei cambaih kayua halei hu dom bruk yau nan. Thủ tướng Italia hu panuac lên án dom bruk nan di Tây Ban Nha saong Đức, saong brei mboh hatai jum pataom di Italia haong 2 taneh ia ini./.