Hukum Gru pato, hu brei pandar meng 2026 brei hu dom sarak daong lagaih ka gru pato di labik biak kan kandah atau pan bruk biak kan kandah. Tui nan, gru pato brei hu pah sang daok pakat karja atau hu khik kajap labik daok haong gauk atau daong jien pah sang daok tuk pato di bhum mikva bangsa takik, bhum ceik, bhum tapen negar, tasik kaoh pulao saong bhum kinh te - xa hoi daok biak kan kandah; hu daong bayar jien radaih dalam tukvak ngak bruk di bhum kinh te - xa hoi daok biak kan kandah; hu sarak daong tui yaok urang…

Bao hiem xa hoi TPHCM peih ngak Danak dak “Alin the BHYT ka urang kathaot raidiuk kan kandah - Ba Tet drei sir ka urang kathaot Bilan pataih Bính Ngọ”. Tui BHXH TPHCM, dom blah tapuk BHXH, blah the pakat BHYT hu jao brei lac bruk pachreih ja ba urang yam tapa kan kandah anak meta, tani tanat raidiuk, iek glang prein yawa, khik caga ka rup eng  saong baoh sang di drei. Tapa nan, pachreih mikva yam tagok, jeng urang kham merat rik daong veik ka urang karei dalam raidiuk xa hoi.

Bo Tu lenh Canh sat tasik bhum 4 pambuak haong Mban Pathau khan saong Jak ba Tinh uy An Giang bahrau pathau khan dom adat ka bruk pacang cakak taong ikan suan hukum, oh pathau khan saong oh ngak tui adat ka labaih 300 urang jakar saong urang nao takik di phuong Hà tiên.  Var pathau khan salih bahrau meng bruk brei iek phim “Phien toa gia dinh” – sa bruk taong bhat hinh su hu mboh rilo ka bruk taong mek IUU ka dom po gilai, urang nao tasik maong iek. Bingun ini, Harak mbao Urang ngak bruk alin 300 hala dok Negar, 30 thaik Wa Ho saong 30 kadung jru y te ka dom gilai ikan saong 30 kaya alin (yaok kaya hu yaom 1 trieu dong) ka 30 baoh sang kathaot, urang nao tasik baoh sang kan kandah.

Tỉnh Dong Nai daok kham merat peih ngak danak dak 90 harei melam bruk mek veik, bayar jien, daong saong padang veik labik daok ka urang hu taneh mek ngak Danak dak jakan peih drah samar Bac - Nam gah Pei negar, jalan tapa Gia Nghĩa - Chơn Thành. UBND xã Bù Đăng pambuak haong Mban Khik iek danak buh jien tame ngak saong dak padang tinh jak ba dom baoh sang bhap bini njauk hatai haong jalan bayar, daong ka 107 baoh sang. Danak dak jalan peih drak samar hu makna biak praong, oh lac tinh Dong Nai, tinh Lâm Đồng bo daok lac dalam bhum Tay Nguyen saong Dong Nam Bo.

Pambuak tal bruk anek saih kamei taong paoh gauk di Sang bac THCS Phú An, phuong Phú An, Ban raya Ho Chi Minh, tui pathau khan di Sang bac THCS Phú An, dua anek saih taong paoh gauk di harei 11/10, jeng bac tal 8 di sang bac. Kapul taong bhat di sang bac hu ba tabiak bruk taong bhat ngan haong 2 anek saih taong paoh gauk brei padeih bac megru 7 harei, patrun hanh kiem trun tanut trung binh di tukvak bac ka 1 dalam thun bac. Daok 8 anek saih nao iek, oh paklah saong cuak video ye njauk brei padeih bac 3 harei, patrun hanh kiem trun daok tanut trung binh dalam bilan.

Quoc hoi Singapore brei khan tapa Hukum Hình sự, pabak tame bruk taong meng huai ngan haong dom urang pachot pagat online. Tui hukum birau, dom urang peih bruk, palih ruah atau hu mbaok tame dom kapol nyaom pachot pagat meda taong bhat meng 6 tal 24 mbang huai. Meng thun 2020 mbiah ini, taneh ia ini hu labaih 190.000 mbang pachot pagat, kuhria abih tih labaih 2 ti 800 trieu USD. Ta-eng thun 2024, dom mbang chot pagat yam tapa 51.000 mbang, ngak khat lahik takik abih 840 trieu USD. Dom bruk chot pagat urak ini meblah 60% taong abih duis hu khan brei thau di Singapore.

Canada daok hu jalan kuhria ka bruk kak kajap sarak urang tame mai daok, patrun meteh sinh vien negar langiu anak meta hu tame negar ini dalam thun anak tal. Tui kuhria di rajaei Canada lac brei patrun meteh dom sarak thi thuc anek saih negar langiu tame mai bac megru dalam thun 2026 saong tani tanat bruk ini di tanut 150.000 yaok thun brei tal thun 2028. Rajaei Canada ndom lac, jalan kuhria bahrau meng lac bruk njauk ngak kayua bruk urang negar karei tame mai daok hu truh tapa prein pasang iek, truh tapa bruk taduan saong daong di negar ini.

Tui Lien doan Dom kapol urang blei pandar di negar Đức, jaik 1 dalam 8 urang blei kaya tapa online di Đức lac gaok chot pagat di dom kuan pablei ja di internet dalam dua thun tapa. Bruk urang blei pandar yak bak dom labik pablei online ja dak harei dak rilo dalam dom thun jaik ini. Lien doan ini puac ka dom nen tang online yau Google saong Meta brei ngak bruk praong jang piah pacang caga chot pagat online, kayua meteh dom kuan ngak ja hu  ba kadha yaih khan di angaon nen tang nan./.