Khau tin ndom ka jien bilan, jien thuong Tet thun ini di urang ngak bruk, Mentri Lao ndong, Thuong binh saong Xa hoi brei thau, tanut jien thuong Tet saka Ia harei saong saka Ia bilan 2025 glaong abih lac 1,8 ty ndong saong labaih 1,9 ty ndong, jeng daok dalam kapul ngak mbang pablei salih hu phun jien buh tame meng negar langiu di Ban raya Ho Chi Minh. Daok jien thuong Tet kuhria rah tapa, hu mboh lac 7,72 trieu dong sa urang, tagok 13% dut haong thun 2024. Dalam nan, kongti TNHH kayua Karja pan 100% phun jien thuong kuhria rah tapa lac 1,66 trieu dong sa urang, gah ngak mbang pablei salih hu phun jien buh tame meng negar langiu thuong 8,24 trieu sa urang.

Bruk sangka kuhria Tet Nguyen ndan thun 2025 hu peih ngak tal taong abih dom pakat kong ndoan dalam Ban raya HCM. Tui nan, LĐLĐ ban raya peih ngak danak dak “ Tet pataom mbaok – Xuan jum pataom”, kuhria mboh dahlau brei daong 15.000 baoh sang urang kong ndoan hu raidiuk kan kandah, yaok baoh sang hu daong 1,8 trieu dong. Ngan haong danak dak “ Radaih pui bilan pataih”, hu daong taong abih harak ve ka 500 baoh sang urang ngak kong; alin harak blei pandap ka 9.500 urang kong ndoan, ngan haong yaom lap 1 trieu ndong ka sa urang; peih bruk pataom mbaok alin pandap ka 5.000 urang kong ndoan di kapol ngak kong nghiep hu raidiuk kan kandah, yaok paok pandap yaom 1 trieu ndong.

Kapul urang lambaok dom tinh, ban gah Meraong, gah pablei salih saong jabat bao chi bahrau mai rivang, daong prein, tadhau ayuh Tet dom urang jakar, bol lin saong rahra angaok kaoh pulao Hòn Chuối. Kaoh pulao Hòn Chuối daok dalam ban sit Sông Đốc, huyen Trần Văn Thời, tinh Cà Mau, daok atah di taneh jaik 32 km gah Pei. Kein lagaih ka bruk daok dang nao mai di bol lin haong rahra angaok kaoh pulao daok rilo kan kandah. Min, dom bol lin angaok kaoh pulao tuk halei jeng langyah hu dom kan kandah piah ngak siam bruk pacang khik quyen ngak po kaoh pulao saong tasik. Dahlau nan kapul hu mai rivang, daong prein, tadhau ayuh Tet dom urang jakar, bol lin saong rahra angaok kaoh pulao Hòn Khoai, daok di xa Tân Ân, huyen Ngọc Hiển, tinh Cà Mau.

Birau ini, di xa Tân Hiệp, huyen Thạnh Hóa, tỉnh Long An, Bộ Chỉ huy Bol lin Bien phong tỉnh peih ngak danak dal Xuan bien phong daong mikva puk palei thun 2025. Dalam danak dak hu iek ruak, brei jru oh mek jien ka 100 urang saong alin 140 paok pandap ka dom baoh sang dalam sarak, baoh sang kathaot  saong alin paok jien bac “Daong adei nao bac” brei ka anek saih  hu raidiuk kan kandah di xã Tân Hiệp…Danak dak hu makna biak dalam, pamong tal bruk sangka ka dom baoh sang sarak akarja, baoh sang kathaot  di bhum taphia negar uan thun birau, raok Tet.

Kapul Sinh vien Viet Nam Ban Can Tho bahrau peih Harei Pahadar 75 thun Harei Anek saih, Sinh vien; pok meyaom angan “Anek saih 3 siam”, “Anek saih 3 pasram”, “Sinh vien 5 siam”, thun bac 2023 – 2024 meng pakat ban tal pakat Trung uong. Di harei alin hadiah 374 paok pandap pok meyaom ka urang menuac, kapul piah pok meyaom dom urang kreih camin naih joi, jhul ngak dom danak dak gul pataom, hadah krah dalam anek saih, sinh vien. Ini lac bruk piah daong dom anek saih, sinh vien pahadar gilac makna di harei 09/01, tapa nan ngak medeih hatai hadah mbaok bangsa, paglaong bruk sami samar, hadah krah dalam bruk padang saong patagok taneh ia.

Ha vien My khan tapa sa hukum ndem tal dom urang negar langiu tame mai oh hu harak gal njauk ndem panuac lac co klaik piah patrauk tabiak. Tui harak mbao pak ini, 48 nghi si ndang Dan chu saong taong abih dom ha nghi si ndang Cong hoa di Ha vien Mỹ njauk hatai ka hukum patrauk rilo urang di cư njauk ndem puac lac duas catang jang. Ini lac bruk ngak camereip  dalam bruk kham ngak  catang tal urang negar langiu tame mai suan hukum di Mỹ.

Thu tuong Canada Trudeau brei tayah klak panuac ba tabiak di Tong thong Donal Trump lac ong meda pandar prein khang kinh te piah ngak ka Canada jeng bang ka 51 di Mỹ. Thu tuong Canada Trudeau vak dalam sa kadha hu ba tagok mang xa hoi X: “Oh hu sa kein lagaih halei piah ka Canada jeng sa bang di My. Urang ngak bruk saong rahra di dua negar kol drei jeng hu mbang tui kein laba tuk jeng sa gah pambuak pablei salih saong an ninh praong abih di gauk”.

Jabat Kuhria mboh dahlau langik tasik pakat negar Anh khan lac negar ini hu tapa dom melam la-ar abih dalam thun, langik laar trun tal am 16 do C di melam 9/1. Ini lac la-ar abih di bilan 1 di Anh dalam 15 thun tapa. Bhum taneh gah meraong  takik la-ar jang, meda hu tuyet laik kapan meng 2 tal 5 cm saong meda tagok tal 10cm di dom bhum caik glong jang. Jabat An ninh Y te Anh kakei lac langik la-ar meda ngak rilo urang metai, abih di nyu lac  urang taha umo saong urang mbuan ruak kik./.