Di var ginum biai di Thuong truc Rajaei haong dom gah, jabat taong yaom  bruk rah tabiak saong dom kich ban, jalan langyah pacang caga haong dom bruk  birau ini di dunya meda ngak kan kandah tal negar drei, Thu tuong Pham Minh Chinh caong khin brei pataom tame dom jalan langyah hu makna praong dalam. Nan lac, bruk peih ngak sarak jien padai kuhria caga dahlau, sami samar, lagaih haong bruk rah tabiak. Khik brei ginup nang luong, pabak nang luong ka bruk ngak mbang pala drak, pablei salih saong raidiuk; khik tani tanat yaom kaom darak pasar, pacang caga pablei salih dauk, oh khik piah kaya drap ar, tagok yaom, ngak sraw kadau yaom kaom ba tal raidiuk mikva gaok kan daman, peih ngak dom jalan pacang khik yaom xang, menyek tui hukum ba tabiak.

Mban Tacei ba bruk palih ruah urang ka Quoc hoi mbang XVI, palih ruah urang ka HĐ Bhap bini dom pakat vaktu  2026 -2031 TPHCM birau peih bruk ginum biai tapak gam online pambuak haong 168 phuong, xa, dac khu di TPHCM piah pang  bruk kuhria caga  bruk palih ruah. Uy ban palih ruah TPHCM peih dom nyaom biai taom gaok cu tri  harei 2/3 saong dui atah  tal harei 13/3. Brei pakat the cu tri meng harei 5/3 tal harei 12/3. Peih bruk palih ruah di harei 15/3. Harei 25/3, Uy ban palih ruah TPHCM khan brei thau bruk palih ruah saong sarak  angan  dom urang hu palih tame HĐND dom pakat.

Harei ini, di ban Can Tho peih bruk ba nao saong taduan urang tagok jalan ngak bol lin di 13 labik di dalam ban. Thun ini, ban Can Tho hu labaih 5.000 bhap bini tagok jalan ngak bol lin di dom don vi di Mentri Quoc phong, Mentri Kong an. Bruk ba nao saong taduan urang ngak bol lin thun ini oh lac ginup manuac, hu ilamo glong, bruk palih ruah urang ngak bol lin thun ini di Cần Thơ daok pambak praong bruk thau sahaneng ba drei tame ngak bruk saong hadah mbaok meta  di dam dara anak bruk praong glong khik caga Taneh ia palei negar.

Hadei gam tame, bruk ngak gah ye te tinh Ca Mau urak ini hu 7 pasak pakat tinh,  24 sang iek ruak da khoa, chuyen khoa saong 64 balai y te pakat xa. Yau nan min, ong Nguyễn Chí Thanh, Yam ndoc Sở Y tế tỉnh Cà Mau khan lac, rilo don vi di nyoam 2 saong nyaom 3 daok pambak tame jien mek tame oh ginup bayar, ba tal tavak sre jien bilan saong jien daong ka urang ngak. Bhum palei daok kurang urang ngak bruk naih joi, thau ba ilamo ky thuat tame pandar. Njauk ndem tal ha tang y te di rilo labik khut tayak trak. 

UBND tinh Lam Dong mbaok harak palih po buh jien tame padang ngak Mblang kapal ahaok Phan Thiet - Mblang kapal ahaok duh ka bhap bini. Tui UBND tinh Lam Dong, mblang kapal haok Phan Thiet pabak bruk pajeng ba kaya dak harei dak tagok, pabak prein jhul khang patagok kinh te - xa hoi, pambuak bruk quoc phong, an ninh di bhum palei saong tinh Lam Dong. Mblang kapal haok par dalam negar saong dom mbang par dunya tuk hu bruk.

Campuchia daok kham ngak samar hu jeng “ pasak ngak kaya hijao” di ASEAN. Ngan haong bruk ngak tabiak nang luong meblah tal 62%, taneh ia ini daok salih khang kadang jak ba urang buh phun jien ti USD tame ngak gah kong nghe saong oto. Campuchia daok peih ngak sa danak dak cach mang praong tapa danak dak pato pakai saong pato bruk ngak ka 1,5 trieu dam dara, ginup urang ngak bruk bo daok lagaih haong bruk Cach mang Kong nghiep 4.0, gam kadha bac haong bruk ngak.

Kapol Pasang iek Dunya Doc lap di Lien Hop Quoc ka Iran ndem puac ka dom mbang taong tame Iran di Israel saong Mỹ yau dom mbang taong tame Iran di dom bhum tathik Vịnh. Kapol ini brei thau Hien chuong Lien Hop Quoc pakauk pandar phao karaong kalin kan mesruh atau pacang gah chinh tri di taneh ia halei. Kapol urang khan brei thau Bruk Israel saong Mỹ pametai dom urang pakat glong Iran lac bruk ngak oh njauk.

Tui urang ngak prong di tathik An Do, kuhria tal harei 3/3, labaih 38 gilai pajeng kaya di An Do daok gar tavak di bhum tathik Vịnh Ba Tư saong kieng tathik Hormuz kayua mesruh metak di Trung Dong. Dom urang jakar Ấn Độ khan lac, mbiah tal ini hu urang metai atau taong tame dom gilai tual hala dok An Do. Yau nan min, bruk an ninh di dom jalan tathik di Vịnh Ba Tư saong Vịnh Oman daok kadauk rilo bruk kandah dak harei dak catang./.