Di harei pok meyaom angan “Gru sit thun naih gheih” pakat tinh bahrau ini. Tinh Ndoan Dak Lak hu pok meyaom 45 cei, nai gru naih gheih dalam bruk pato, roh duah ilamo saong ba drei tame siam lagaih dalam bruk Ndoan, Ndoi. Dom gru pato hu pok meyaom lac dom urang naih gheih dalam salih bahrau bruk pato bac, buh abih hatai tian haong bruk ngak, kham merat ba drei tame dom danak dak dam dara di labik. Rilo cei nai gru daok ngak bruk di bhum atah bayah, bhum tapen tasik hu rilo mikva urang bangsa takik di tinh Dak Lak, kein lagaih pato megru daok gaok rilo kan kandah.

UBND tinh Tay Ninh daok peih ngak 2 mejam flim tui jalan 3D mapping piah yiah khan ilamo sajarah dakrai di Căn cứ Trung ương Cục bhum Meraong. Tapa bruk ngak mboh di meta siam gheih, dom mejam flim rik tame daong ka urang mong iek hu thau dom asar kadha sajarah dakrai, hu thau cambaic laic bruk rambah rambeip, var klak rup drei saong khang hatai di dom urang jakar, urang lin bhian ngak bruk di labik ini. Kong nghe 3D mapping brei ka urang hu iek, pachreih urang ndoan, dam dara  saong tuai damuai umo dam dara.  

Labik bein bangu tapen ga Ba Son, rah tui kraong Sai Gon, di phuong Sai Gon, Ban raya Ho Chi Minh, daok jeng labik mai dui pachreih rilo rahra saong tuai damuai tuk bein bangu bal pataih mbang akaok meti hu ba tame duh di pasak ban raya. Meng bingun padeih padei Tet Duong lich 2026, dom urang mai labik tagok rilo, abih di nyu nan lac di var biar harei saong malam. Labik bein bangu hu ngak peih, pambuak gheih ghang meng jalan bhap bini saong bahrau, ba tal mbaok meta bahrau di labik tapen kraong Sai Gon.

Di TPHCM, Gilang Phở - nan lac gilang kaya mbang gah langiu karja akaok meti di Viet Nam birau peih pabah mbang saong taduan raok tuai. Oh lac padeih di nan bruk yaik khan, gilang khik piah daok dak dalikan ka labaih 100 thun di kaya mbang bingi di taneh Viet Nam, meng kaya mbang naong di kanya tal kik kapal mbang di dunya. Gilang di labik 211 Nguyễn Thái Học (Quận 1 dahlau), taneh praong labaih 800 met vuong, hu 3 tal yaih khan yaok rituh kaya, thaot binguk saong harak tư lieu ilamo phở di klau bhum taneh, daong ka tuai damuai hu thau cambaic laic jang ka nguyen lieu, bruk ngak tabiak, bruk ngak meng tangin saong ilamo bhap bini dalam yaok jaluh phở.

Tinh An Giang bahrau peih jalan jak ba alih darah halan tian di bingun Tet saong “Harei raya Pataih bhong”. Tui angan “Alin darah akaok Pataih – Tagok Haniem phol”, jalan ngak di thun ini rah tabiak meng harei 15/1 tal harei 15/3, kham merat jak ba labaih 9.800 urang tut angan alin darah, khik kajap dalam saong harei Tet Nguyen dan, oh luai rah tabiak bruk kurang darah. Hadei harei peih ngak, labaih 300 urang jakar, urang ngak kong nhan vien chuc, urang ndoan dam dara, rahra hu ba drei tame alin darah halan tian.

Mỹ phẩm Hàn Quốc patui veik darak pasar di dunya saong lac gah ngak kinh te praong dalam tuk bruk pablei kaya tabiak negar langiu di Hàn Quốc gaok rilo kan kandah. Thun 2025 meng blaoh, bruk pablei kaya tabiak negar langiu dom pandap ngak mekre  di negar ini tagok tal labaih 11 ti USD, tagok labaih 12% dut saong thun 2024. Urak ini, Hàn Quốc  peih praong bruk palei jru ngak mekre tal 202 taneh ia saong bhum taneh. Dalam nan, Mỹ ba akaok hu jien mek tame meng bruk pablei kaya tabiak negar langiu  2,2 ti USD.

Mentri An ninh Dalam negar My brei thau, My brei buh jien tame 115 trieu do la tame dom bruk pacang cakak ahaok par oh hu urang peih par piah patagok an ninh vil taom dar Yai vo dich caog balaong dunya (lac World Cup 2026 saong pahadar 250 thun padang negar My. Ini lac bruk bahrau abih brei mboh rajaei My daok tagok bruk pacang cakak ahaok par oh hu urang peih par saong World Cup 2026 lac sa bruk ngak iek praong ngan haong panuac sanya haong Tong thong Donald Trump ka bruk khik an ninh ka negar My, hu labaih sa trieu tuai damuai mai mong iek.

Mban peih bruk The van hoi bilan la-ar Olympic Milan-Cortina 2026, di Italia birau khan lac, mbang nyaom ini hu peih ngak sumu gauk kong nghe papar riyak pandar tri tue nhan tao (AI). Sa bruk hu ngak siam tagok lac mac peih catang 360 do tui tukvak hu AI daong ngak. Kong nghe ini hu yaih khan di Olympic Paris 2024, gam du lieu meng dom camera langyah dom thaok binguk samar piah ngak tabiak rilo gah, thaot binguk dang saong dom clip tavak nduac suai dalam dom giay./.