Page harei kabroi 16/12, tinh Dong Thap peih Harei raok harak brei angan Drap ar pakat negar Kubo Ong Phaok bang Nguyễn Sinh Sắc; Peih pakak danak dak “pasiam, pakajap saonh patagok labik inem mek Nguyễn Sinh Sắc” saong Harei pahadar harei plang lahik mbang ka 96 di Ong Phaok bang Nguyễn Sinh Sắc, ame di Chu tich Ho Chi Minh. Ini oh lac bruk taduan yaom kaom sajarah – ilamo di inem mek, bo daok lac bruk ngak hadah mbaok meta di Ndang mbo, Karja, rahra tinh Dong Thap ngan haong bruk ngak di Ong Phaok bang, daong padang thaik thaot bhum palei, pandar yaom kaom ka jirah rivang ilamo di tinh Dong Thap.

Di bingun Harei Yang Sinh, harei kabroi Bi thu Tinh uy Lam Dong Y Thanh Hà Niê Kđăm hu mai ravang, tadhau ayuh Toa Yam muc Giao phan Phan Thiết (Labik Ban Phan Thiet, Binh Thuan klak) saong Yam muc Đỗ Mạnh Hùng, Yam muc chinh toa Giao phan Phan Thiet, Tong Thu ky Kapul Yam muc Viet Nam. Di ini, Bi thu Tinh uy Lam Dong Y Thanh Hà Niê Kđăm payua panuac tadhau ayuh tal Yam muc Đỗ Mạnh Hùng gam haong dom ong linh muc, lakei kamei tu si saong taong abih mikva tui Kong yao hu sa bilan Yang Sinh siam mekre, chreih bui, haniem phol, ndung bak phol dhar di Po saong hu sa thun bahrau siam mekre.

Mban Tacei ba Bol lin Bien phong ban Can Tho bahrau peih tabiak mbang pakacah tabung glaong ka pacang, caga kol duas; pacang caga pablei jru phil, pablei menuac; pacang cakak pablei dauk, bleik saleik dalam pablei salih saong ndap nda ja lau di bingun Tet Nguyen dan nethak Asaih Waw 2026. Ndom meyai di harei peih ngak, Dai ta Huỳnh Thanh Hùng, Bi thu Ndang uy, Chinh uy Bol lin Bien phong ban Can Tho pandar urang jakar, bol lin ngak catang bruk pasang iek, pacang khik taneh riya, an ninh di tapen negar; khik kajap an ninh chinh tri, siam mekre salamat dalam rahra di labik tapen negar, bhum tasik di ban, daong piah ka Rahra hu mbang Tet karo salamat, siam mekre.

So Padang Ban raya Ho Chi Minh bahrau hu harak gal samar chip payua ka UB Bhap bini Ban raya Ho Chi Minh, brei pandar labik mblang adaoh tamia Sen Hồng klak (labik B, Bein bangu 23/9) piah peih labik khik radaih patuh anak meta, duh tuai damuai ndik Metro ka 1 (Ben Thanh – Suoi Tien). Tui So Padang Ban raya Ho Chi Minh, bruk ramik labik khik radaih di labik ini piah pabak hatai caong payua radaih dua baoh dak harei dak tagok di rahra tuk pandar Metro ka 1, abih di nyu nan lac di labik pasak ban raya.

Labik raong ala Dong Tam, di tinh Dong Thap bahrau taduan sa ca the ciim Hồng Hoàng lac janih ciim kan di mboh daok dalam kapul IB, daok dalam harak angan dom janih njauk khik ramik hu brei caik dahlau piah pacang khik tui njauk adat hukum Viet Nam kayua Chi cuc Pasang iek glai tinh Tay Ninh hu jao brei piah khik ramik, duh ka tuai damuai rivang me-in. Dahlau nan, ca the ciim Hồng Hoàng trak labaih 2,5kg nan hu rahra duah mboh di xa Nhựt Tảo, tinh Tay Ninh.

My pataom hu labaih 200 ty dolla jien je dalam thun 2025, rilo meng lac meng dom tanut jien je kayua Tong thong Donald Trump ba tabiak meng labaih 40 sac lenh hanh phap kayua karja ba tabiak. Tui jabat Hai quan Pacang khik Tapen negar, bruk ini breoi mboh siam lagaih dalam bruk jhul tagok pablei salih karo salamat, samu gauk saong ngak tui hukum, tapa nan patagok an ninh negar saong kinh te di My.

Uy mban Lien minh chau Au (EC) brei taoh talaih dom bruk brei patakik pablei radaih xang saong menyek diesel meng di thun 2035. Salih di nan, kapul ini brei ka dom janih radaih hybrid sac ndien saong radaih ndien hu majam peih praong bruk peih nduac meng xang menyek. Bruk ini hu ndom meyai ba tabiak dalam tuk dom negar dalam dunya daok dak harei dak taoh talaih dom sarak patagok hacih hijao kayua kateik geik meng jien buh tabiak ka dom bruk salih hijao, jeng yau dom kham merat jak ba hanh lang meng dom gah ngak radaih o to.

Nyaom roya Lien hop quoc harei kabroi hu brei tapa Sarak daong prein ka bruk ta-eng palih ruah di urang Palestine hu 164 phieu daong prein sang tok hu 8 phieu cagar gilac, brei mboh veik bruk daong prein ngan haong karja Palestine bebas. Bruk tapa du thao sarak ngan haong ty le rilo urang daong prein hu brei mboh veik lap truong suai atah di Lien hop quoc mbaoh tangin ka quyen di urang Palestine hu tui haatai palih ruah quy che chinh tri di drei saong tui bruk patagok kinh te, xa hoi saong ilamo di urang negar nan.