Di Mblang bein Nguyễn Tất Thành, phuong Quy Nhơn, dalam Harei raya “Gheih ghang Ceik glai – Tasik pagol pataom” thun 2025, tinh Gia Lai bahrau peih pakak Harei raya jalan ban medin hu angan “Sambo bar tasik”. Danak dak hu brei mboh bruk hu makna tuk tinh Gia Lai bahrau, pataom dom bruk siam gheih di sajarah, ilamo saong caong takre patagok di sa bhum taneh atah meng ceik glai Tay Nguyen tal tasik hijao. Harei raya oh lac sa danak dak seni nghe thuat, bo daok lac harei raya di rahra saong tuai damuai, lac bingun piah yaih khan thaik thaot, kein lagaih rah rivang saong ilamo di tinh Gia Lai.

Kong an tinh An Giang birau pambuak haong Sang bac Tieu hoc Thủy Liễu 1 peih ngak Danak dak “ Daong adei nao bac” saong alin brei 50 paok pandap ka dom adei anek saih hu raidiuk kan kandah. Yaok paok hu kadung balo saong vo siphau, kuhria tui jien 250.000 dong, taong abih tih 12,5 trieu dong. Tapa danak dak, dom adam dara gah Kong an tỉnh An Giang caong khin ba tangin tame daong gah pato megru kuhria daong  ka dom adei anek saih bhum kan kathaot yam tagok dalam bac da-a, ngak tui hatai caong takre di drei ka harei hadei.

Thun bac ini tinh Vinh Long brei peih bruk pato saong bac 2 var/harei gam haong nan peih bruk saong ngak siam sarak oh mek jien bac ka dom anek saih. Ini lac sarak njauk hatai rahra saong hu rahra daong prein. Bruk pato bac 2 var/harei piah paglaong pato megru taong abih, tagok tukvak bac di angaok sang bac, patakik bruk bac di langiu – bac oh njauk adat hukum, gam haong nan patagok siam lagaih co so vat chat, kapul gru pato; pabak hatai caong, bruk takre di anek saih.

Tui So Ilamo, The thao saong Yulit tinh Ca Mau, tuai damuai tagok rilo tuk peih le mai meng dom labik rivang ma-in mekre hatai urang di tinh yau: Mũi Cà Mau; Quán Âm Phật Đài; Nhà thờ Tắc Sậy; Hòn Đá Bạc;…Dom labik yulit bhap bini di Đất Mũi, glai tram U Minh hạ dak harei dak pachreih rilo tuai damuai mai. Bruk pagam tinh Cà Mau saong Bạc Liêu hu peih tabiak labik ngak mbang cakrok patagok birau, daong tinh ngak mbang hu lagaih jang gah yulit. Thun ini, Cà Mau ba tabiak bruk kham merat taduan raok 8 trieu tuai damuai saong mek hu jien gah yulit 8.500 ti dong.

Mbang ahar bhap bini di dom palei ngak bruk meng kal, harei pandap mbang; mbang baoh kayau di bein rah rivang sinh thai; pang don ca tai tu di ban medin nao tabak takai Ninh Kiều;…lac dom bruk dui pachreih tuai damuai hu ba drei tame tuk mai rah rivang di Ban raya Can Tho. Taphia dom gilai hu blaoh, di bingun ini, hu veik gilai rah rivang Can Tho – Hau Giang hu ba tame duh rahra saong tuai damuai rah rivang kraong Can Tho di malam, mbang pandap mbang bhap bini gah Pei negar, pang don ca tai tu gah Meraong negar…

Pataom flim ASEAN+3 birau peih pakak  di Ban ine Praha, Cộng hòa Séc, hu 9 taneh ia nan lac: Việt Nam, Indonesia, Malaysia, Myanmar, Philippines, Thái Lan, Trung Quốc, Nhật Bản saong Hàn Quốc. Bruk nan ngak brei urang hu thau ralo jang, pambuak dom ilamo saong pakhang bruk bac megru bhap bini dalam tuk talei rohim pambuak Sec saong dom taneh ia  chau A daok cakrok siam mekre. Pataom flim  thun ini brei mboh veik ilamo, dien anh meda hu jeng talei pambuak dom taneh ia.

Jaik sa rituh urang taong gun pabaoh gauk meng grauk bhum Balkan pataom di palei Cherna, Bulgaria, hu mbaok tame raya pabaoh gauk bhap bini meng kal. Harei raya kacah pabaoh gauk di palei Cherna, Bulgaria hu mbaok di urang lambaok di rilo negar yau ye Thổ Nhĩ Kỳ, Hy Lạp, Barak Macedonia, Ukraine. Dalam nan, Thổ Nhĩ Kỳ hu pandar kapul lambaok vakil praong abih hu 85 urang taong gun pabaoh gauk. Dom mbang kacah pabaoh gauk hu dui atah meng 30 tal 40 minit patui yaok banah saong meda hu dui atah veik 10 tal 15 minit meyah njauk hu. Urang jayah lac urang hu ngak ka urang daih jaleih ndih kandang.

Di ban ine Havana, Cuba birau peih bruk pakacah radaih klak meng kan akaok meti piah meyaom thaot binguk biak gheih di taneh ia kaoh pulao mekre ini. “ Pakacah siam gheih Cuba” oh lab labik me-in ka dom urang takre radaih klak, bo daok lac piah meyaom hatai takre, hadah krah saong hatung hatian kham merat di urang Cuba dalam bruk khik ramik dom radaih klak meng dahlau mai. Dom sruh radaih Ford klak di Mỹ tal dom sruh radaih Volga Liên Xô, pak ini pataom hu rilo po radaih klak mai klak rabha haong gauk ka bruk khik piah radaih klak./.