Hadei pagam tame, rilo bhum palei di bhum ceik hu rilo urang bangsa takik di tinh Binh Thuan klak hu jeng “tatua pambuak” bhum tasik, bhum taneran haong bhum glong di tinh Lam Dong birau. Ini lac kein lagaih piah dom bhum palei cakrok patagok bruk ngak mbang - xa hoi, paglong tani tanat raidiuk bhap bini rahra, rik tame bruk cakrok patagok di tinh. Dalam nan, xa Tuy Phong hu 2 xa Phan Dũng saong Phong Phú dahlau diah hu rilo urang bangsa takik, ralo lac urang bangsa Raglai, Cam saong Tày, Mường. Mbiah tal ini, dalam taong abih jalan mbak nao mai dalam xa Tuy Phong hu tuh betong; baoh sang bhap bini hu talei gom ndien saong ia hacih hu 98% tagok…

So Pato megru TPHCM birau khan brei palih ruah pabak tame tal bac 10 ka 37 sang bac di karja dalam Ban raya. Tui nan, kuhria abih tih brei palih ruah pabak hu 2.340 urang. Njauk brei palih ruah dom anek saih pakacah hu gam tame caong khin bac ka 3 dahlau di nan. Anek saih  brei hu tanut pakacah abih tih glong jang atau samu bruk palih ruah ka 1 di sang bac THPT di karja. Yaok anek saih brei palih ruah 1 sang bac THPT saong oh salih veik karei tuk payua tame blaoh. Bruk palih ruah hu brei thau di harei 8 bilan 8 anak tal.

So Y te TPHCM khan lac, padang kapol nyaom nao pasang iek ngak bruk saong daong samar drah dom labik hu jit ruak pandiak tabiak darah di Ban raya. Tui nan, Sang iek ruak Đa khoa Vạn Phúc 2 saong Sang iek ruak Đa khoa An Phú (phường An Phú, TPHCM) daok ngak bruk tapa prein kayua urang ndih iek ruak pandiak tabiak darah  rilo tagok samar dalam 3 adit tapa. Pasak Y te Vũng Tàu jeng kham merat peih ngak rilo jalan pacang caga jit ruak pandiak tabiak darah di dom phuong  Phước Thắng, Rạch Dừa, Tam Thắng saong Vũng Tàu. Bruk mbuan njom ruak daok pambak praong meyah oh pacang caga hu siam.

Harei kabroi, UBND ban Cần Thơ peih ngak Harei raya Taong abih bhap bini khik caga taneh ia. Bruk jak ba gauk Taong abih bhap bini khik caga Taneh ia lac bruk chinh tri praong dalam, hu prein khang pambak praong, ngak jeng bruk praong, khang kajap meng bhum palei, rik tame hu jeng bruk bhap bini khik salamat, pakajap bruk jum pataom taong abih bhap bini. Mbiah tal ini, ban Can Tho padang hu 96 bruk “Gheih jak ba bhap bini”, 129 bruk Taong abih bhap bini khik caga Taneh ia hu siam, dalam nan hu 8 bruk hu Kong an pok meyaom, pambak praong dalam negar.

Ong  Lê Hoàng Phi, Akok UBND xã Ninh Thạnh Lợi, tỉnh Cà Mau khan lac, subuh page harei kabroi, hangin khang di dua palei Xẻo Dừng saong Nhà Lầu 2 di xã Ninh Thạnh Lợi ngak khut tayak 22 baoh sang, dalam nan hu 5  baoh sang glut jaleih saong 17  baoh sang par tabung labiah meteh sang saong dom labik dalam sang, kuhria abih tih labaih 500 trieu dong. Hadei tuk hangin yuh khang, urang ngak praong UBND xã Ninh Thanh Lợi hu mbaok jak ba samar bol lin di labik nan piah daong ka bhap  bini pasiam veik hadei bala rah tabiak.

Hadei mbang ginum biai samar chip kayua Thu tuong Malaysia Anwar Ibrahim dang akaok hu mbaok di Quyen Thu tuong Thai Lan Phumtham Vijjachai saong Thu tuong Campuchia Hun Manet biar harei ka broi di Kuala Lumpur, Thai Lan saong Campuchia biai njauk gauk brei padeih patuh phao chip saong oh khin hagait piah padeih mesruh metak di dua negar ini. Thu tuong Malaysia Anwar mboh lac, ngak Akok ASEAN, Malaysia sanya pambuak bruk saong pasang iek bruk ngak tui ginum biai blaoh.

          Hajan praong saong ia ribuk sua ba tal 30 urang di Bắc Kinh metai. Po negar Trung Quoc Tập Cận Bình melam kabroi brei tabiak sarak hu makna praong, caong khin taong abih bol lin khik siam ka bhap bini rahra. Tui yaok kuhria birau abih hu ba tabiak di page ini, 30 urang metai di Bac Kinh kayua ia hajan praong gam ribuk ia sua. Kuhria abih tih labaih 80.000 bhap bini di Bac Kinh brei panduan ba nao labik karei.

          Rayo papar binguk Tay Ban Nha harei kabroi ba khaw tin, takik abih 54 uranaih saong labaih 30 urang praong caluai ia meng Maroc tal bhum taneh Ceuta di Tay Ban Nha dalam tuk tasik hu riyak praong saong ia kakuan sup malup. Canh sat Tay Nha khan lac, urang nao tapa negar karei bhian pambak tame tuk langik ia kakuan sup malup caluai ia meng Maroc tame negar ini. Bhian di nyu, urang Maroc chap mek hu dalam tuk tapa negar karei njauk patruak tabiak truh gilac veik mai negar, langiu di urang oh ka tal thun umo atau daok likau ti nan./.