Pho Thu tuong thuong truc Nguyễn Hòa Bình birau mbaoh harak Danak dak, ngak veik don vi karja dom pakat saong padang ngak veik karja dua pakat. Danak dak hu brei mboh cambaic laic, angan di jabat karja birau mbon thau, katut panak, mbuan bac, mbuan kanal, lagaih dak ramik, ilamo saong patagok kein laba bhum palei ini haong bhum palei diah, lagaih haong bruk patagok di dunya. Pasak ngak bruk harak gal - chinh tri di karja birau hu labik ngak bruk lagaih, ha tang kinh te - xa hoi sumu gauk, abih di nyu nan lac jalan mbak patagok, khik brei lagaih, plaik njaik bruk oh sumu gauk di dom bhum palei tuk ba pataom tame.

Hu mbaok pahadar 50 thun Harei peih paha tinh Ninh Thuan (16/4/1975 - 16/4/2025) di page ini, Pho Thu tuong Nguyễn Chí Dũng mboh lac, Ninh Thuan njauk brei patui veik bruk patagok ilamo meng kan, gam haong akaok sahaneng hadah krah, jum pataom, salih birau, ba tame ngak hu abih dom kein lagaih di tinh piah dom bruk kan kandah hu jeng bruk lagaih siam, ngak bhum taneh “ pandiak yau apui, hangin yau pah” jeng bhum taneh pataom hu rilo bruk siam gheih karei. Thun 2024 Ninh Thuan  patagok hu 8,74%, dang dhi 4 dalam 14 tinh bhum tasik bhum kreh negar.

Page ini 15 bilan 4, Kapol urang jakar Quoc hoi TPHCM - nan lac don vi ka 5 hu taom gaok cu tri quan Tan Binh dahlau Mbang nyaom 9, Quoc hoi mbang XV. Di var taom gaok, rilo cu tri hu ndem tal dom bruk ramik pataom tinh, ban. Ndem ka bruk ramik veik urang ngak bruk di karja, cu tri Cao Văn Tâm (phường 15, quận Tân Bình) mboh lac, dom urang jakar hu ilamo njauk padeih tui sarak mbang ini hu ilamo ngak bruk cambaic laic, njauk brei ba dom urang nan tame ngak bruk daong ka bhap bini, klak gak gar bruk bhap bini saong plaik njiak palai pajua ka xa hoi.   

Meng harei ini 15/4 mbiah tal harei 18 bilan 4, anek saih tal bac 12 thun bac  2024 - 2025 brei tut angan pakacah tamat THPT online tui he thong Khik ike pakacah di Mentri Pato megru. Hadei di nan, meng harei 21 bilan 4 tal 17 tuk harei 28 bilan 4, anek saih tal bac 12 saong anek saih pakacah veik brei tut angan pakacah tapa jalan online. Mentri Pato megru jeng hu ba clip tacei pato anek saih  ngak tui dom bruk piah tut angan tame ho so pakacah tamat THPT tui jalan online tui kong nghe so di Mentri Pato megru piah ka anek saih tame iek.

Dom harei ini grauk bhum soc di urang bangsa Khmer di tinh Soc Trang  daok chreih chrai uan raok Tet Chol Chnam Thmay. Thun ini, bruk bui sambai nan yau hu dua mbang tuk yaok ribau baoh sang  urang Khmer kan kandah  hu mbang Tet dalam dom baoh sang birau bak hatai anit ranam. Kuhria tal harei 10 bilan 4, dalam tinh hu padang  labaih 6.721 baoh sang. Abih di nyu, tinh Soc Trang  ngak hu salah bruk daong daok ka urang bangsa takik dahau Tet Chol Chnam Thmay thun ini.

Indonesia eiw bhap bini brei caga dom bruk pachot pagat pandar kong nghe AI, dalam nan hu deepfake, thau ngak dom video jaik dreih abih.  Dom video kayua AI ngak tabiak ba tal oh lac urang bhian bo dom urang ilamo daok njauk urang pagat hu kayua biak dreih. Piah caga ka bruk pandar AI suan piah pachot pagat, rajaei Indonesia daok padang ngak hukum cambaic laic piah patagok AI piah kong nghe meda hu ba tame pandar hu lagaih jeng yau takik khat lahik, urang pambak tame pachot pagat.

Mentri Pato megru My khan lac “kareik” jien daong lien bang yaom jaik 2 ty 3 rituh trieu dola My ka Dai hoc Harvard hadei tuk sang bac nan oh ngak tui  dom bruk ba tabiak brei salih sarak birau ralo gah. Sarak nan brei mboh bruk kan kandah birau di Karja  saong dom sang bac dai hoc praong di My. Dahlau di nan, karja brei padeih yaok rituh trieu dola daong ka dom sang bac dai hoc, caong khin dom sang bac nan brei salih birau sarak daong, gam mboh lac dom sang bac oh ginup prein khang kham merat pacang cakak chu nghia Do Thái.

Thun 2024, Chau Au brei gaok rilo ia sua di ralo labik abih kuhria meng thun 2013, ngan haong 30% dom ribong kraong di bhum taneh ini njauk ia dauk biak dalam. Ia ribuk sua  ngak metai takik abih di nyu 335 urang saong ngak kan kandah tal labaih 410.000 urang. Langik  pandiak oh lagaih jeng mboh bak bhum taneh ini dalam dom thun tapa. Đông Nam Âu langik pandiak dui atah abih hu mboh, kuhria abih tih 13 harei./.