Pho Thu tuong Trần Hồng Hà birau mbaoh harak taduan tinh Trà Vinh mek hu angan palei pala bahrau thun 2024. Ini lac tinh hu jaik 32% bhap bini lac urang bangsa takik, ralo lac urang bangsa Khmer, Tra Vinh  hu dom bruk patagok siam gah kinh te – xa hoi. Dalam tinh hu taong abih xa  mek hu tanut chuan palei pala birau,  dalam nan hu 60% xa tanut palei pala bahrau paglong saong 9 xa mek hu angan palei pala bahrau kieu mau. Taong abih 9 don vi pakat huyen ngak hu salah blaoh bruk padang ngak palei pala bahrau.

Tinh Dong Thap sangka khik ramik saong patagok bruk ngak meng kan di dom palei ngak. Mbiah tal ini, Dong Thap hu 5 bruk ngak meng kan, palei ngak lac Drap ar Ilamo oh mboh di meta pakat negar. Di huyen bhum tapen negar Hồng Ngự, palei menyim siuk me-om daok iew lac khan ran di xa Long Khánh A hu taduan lac Drap ar Ilamo oh mboh di meta pakat negar. Urak ini, palei ngak ini hu jaik 60 baoh sang daok menyim siuk, hu 150 janeng menyim, ba bruk ngak ka labaih 300 urang ngak di palei. Yaok thun, pablei tabiak darak pasar dalam saong langiu negar labaih 5 trieu blah siuk yaok janih karei di gauk. 

UB bhap bini tinh Kon Tum birau brei thau bruk taong yaom, parabha pandap OCOP pakat tinh thun 2024. Tapa nan, hu 8 pandap hu ginup taduan pandap 4 patuk. Hoi dong OCOP tinh Kon Tum taong yaom lac, 8 pandap 4 patuk lac dom pandap biak gheih karei, hu asar siam, thaik thaok ao papaok mekre meta brei mboh lac pandap siam hu angan je di darak pasar. Yau nan min, dom pandap njauk brei khik hu asar siam jang piah peih praong darak pasar pablei, abih di nyu lac dom darak pasar pablei tabiak negar langiu.

Harei kabroi, di tinh Bạc Liêu, Panasonic Viet Nam pala hu ralo abih lac 1 trieu phun kayau hijao dalam tukvak katut samar abih. Peih ngak meng thun 2022, danak danak “Diukrai karo daong phun hijao” hu Panasonic peih ngak piah pamong tal bruk Sanya pagol hijao saong danak dak pala sa ti phun kayau hijao vaktu 2021 -2025 di Rajaei, rik tame dak padang “ pataom phun payau hijao”, pabam phun ka dom glai praong. Hadei 3 thun peih ngak, Panasonic hadah mbaok meta lac doanh nghiep ngak hu ralo abih di Viet Nam ngan haong 1 trieu phun pala grauk labik dalam negar dalam tukvak samar abih.

Meng harei ini 19/3, Bein athur Thao cam vien Sai Gon, Ban raya HCM hu brei ka tuai damuai tut angan tame rivang iek athur tuk melam tui danak dak jirah rivang biak gheih angan lac “Tuk melam masup mai” peih ngak di harei Sanecar yaok adit. Ini lac dom pandap yulit  birau hu padang ngak  piah mai rivang iek biak gheih karei ka tuai damuai ka athur glai tuk melam. Melam Sanecar yaok adit peih hu 2 mbang, meng mon 19h-20h saong meng 20h15 tal 21h15. Yaok mbang tame rivang iek, Thao cam vien Sai Gon brei tame meng 10 -20 tuai, umo meng 10 tal 65 thun.

Tong thong My Donald Trump harei kabroi khan lac labaih 80 ribau blah ba-ar tai lieu pambak tal bruk pametai Tong thong dahlau diah lac John F. Kennedy di thun 1963. Ini lac bruk sanya bo ong Donald Trump hu ba tabiak dalam tuk meriak gauk buh phieu ka ong lac brei thau cambaic laic jang ka bruk ngak huac kandah di bang Texas dahlau diah. Bruk pametai Tong thong dahlau diah lac John F. Kennedy  lac tok ta-eng Lee Harvey Oswald cuh. Min tapa dom mbang duah thau hu mboh rilo urang My sahaneng lac bruk ong metai lac kayua urang kuhria pametai meng dahlau mai.

Oh huac bruk sraw kadau di dom darak pasar praong di dunya, kong nghiep oto di Han Quoc  daok khik hu bruk patagok khang kadang. Harei ini 19/3, Mentri Kong nghiep Pablei salih saong Tai nguyen Han Quoc khan lac, dalam bilan 2 tapa, jien mek tame meng bruk pablei o to yaok janih  di taneh ia ini lac 6 ti 70 trieu USD, tagok jaik 18%  dut saong tukvak ini thun dahlau. Ini lac bruk tagok glong abih kuhria meng dahlau  mai  hu jaik 233.000 radaih yaok janih. Dalam nan, dom hang Hyundai Motors saong Kia Motors daok khik hu labik dang dahlau abih.

Tong thong Indonesia Prabowo Subianto ba tabiak bruk padang ngak sang guk di sa labik kaoh pulao atah bayah, daok karei piah kareik  dom urang dius tham nhũng. Ong Prabowo khang panuac lac dom duis tham nhũng  lac sa dalam dom bruk pacang cakak praong abih dalam dom bruk kham merat patagok di taneh ia. Tong thong jeng kakei  brei caik hatai lac  sarak  nan khik siam kadung jien karja piah daong ngak bruk kein laba duh ka bhap bini saong plaik njiak bruk pandar jien oh njauk bruk./.