Ngak tui Sarak taka 18 di Ban Chap hanh Trung uong Ndang ka bruk “Patui veik salih bahrau, ramik urang jakar ngak bruk di dom gah chinh tri patakik, ngak bruk hu siam lagaih”, tal ini tinh Vinh Long hu taduan jaik 400 harak di urang jakar, vien chuc likau padeih bruk. Piah ngak siam lagaih ka bruk ini, tinh Vinh Long hu jhul khang bruk pathau khan ka asal kadha Sarak taka 178 di Rajaei: Ka sarak ngan haong urang jakar, cong chuc, vien chuc, urang ngak bruk saong kapul lin pan phao karaong dalam bruk ramik padak kapul ngak bruk di he thong chinh tri hu siam lagaih.

Ban Can Tho patui jhul pakhang bruk peih ngak dom jalan piah ngak salah bruk ba tabiak brei abih baoh sang oh daok taik tahak, sumu tal harei 30 bilan 4 thun ini meda ngak salah baoh 531 baoh sang daok veik. Urak ini, jabat, don vi khan brei thau bruk ngak hu blaoh piah sumu tukvak ba tabiak brei abih baoh sang oh daok taik tahak. Piah kham merat ngak hu blaih blai 531 baoh sang taik tahak, ban Can Tho  brei ba abih prein khang tame ngak brei salih birau raidiuk mbang ngui ka bhap bini.

Bahrau ini, di tinh Dak Lak rah tabiak Harei ilamo bhap bini Việt Bắc Ea Tam mbang ka 14 thun 2025. Ini lac harei roya meng kan di urang bangsa Tày, Nùng meng dom tinh bhum ceik gah Barak, mai ngak mbang diuk rai di xa Ea Tam, huyen Krong Năng hu peih ngak meng thun 2009 tal ini, dalam nan harei ilamo bhap bini Việt Bắc daok ieu lac Darak uranam Tay Nguyen. Mai haong harei roya, tuai damuai hu maong iek dom adat bhap bini di urang dom bangsa gah Barak hu parang iek veik biak lagaih saong bingi maong.

Bilan pala drak thun 2024, Kapol urang Ngak nong huyen Chư Pưh, tỉnh Gia Lai peih Bruk Salih pajaih padai birau. Tui nan, bhap bini hu nyim pajaih padai piah pala drak, hadei tuk yuak padai blaoh brei bayar veik. Tui nan, Kapol urang Ngak nong huyen brei pathau khan, jak ba 98 urang hoi hu nyim pajaih padai Đài Thơm 8 piah tam drak labiah 40 ha. Pajaih padai birau nan tamuh siam, samar praong tagok, yuak hu meng 6,5 tal 7,5 tan sa hecta, glong jang dut saong dom hamu pandar pajaih padai klak. Bruk nan ba mai siam mekre mboh di meta tuk brah Đài Thơm 8 hu rilo urang blei mbang taong yaom glong.

Dom gah labik blei saong pablei aring di Ban Ca Mau, tinh Ca Mau brei thau, yaom aring tasik dom harei jaik ini tagok rilo kayua hatai caong mbang aring tagok glaong, dalam tuk aring pablei tabiak takik, rilo meng lac aring kiak bhong. Urak ini, yaom aring kiak janih 1 (meng 400 gram/drei ba tagok) hu blei haong yaom labaih 1,1 trieu ndong/kg, aring kiak janih 2 (300 – 400g/drei) hu yaom 900.000 ndong/kg, aring y nhất (aring tani mek ralo janih 1) hu yaom 450.000 ndong/kg. Ca Mau raong aring tasik di labaih 240.000 ha…Aring Ca Mau raong hu labaih 25.000 tan/thun. Aring tasik lac sa kaya hu ralo lagaih di tinh ini kayua hu taong abih tih yaom kaom jaik 10.000 ty ndong/thun.

 Indonesia daok pachreih urang buh jien tame gah ngak kong nghiep ngak dang di taneh ia. Tui Akok Mentri Nang luong saong Khoang san di dunya pachoh gauk padang jalan ngak tabiak nang luong hacih hijao tui Thỏa thuận Paris thun 2015. Yau nan min hadei Tong thong My tagok pan adat akaok negar, dom bruk ba tabiak nan gaok kan kandah. Dunya meda sahaneng lac dang meda padeih, min nyu hu ngak gilac veik.

Sa mbang rabuk tuyet khang tuh tame dom tinh Bờ Đông Canada taong inem brei mboh sa tukvak kan kandah tabung glaong di bilan Li-an thun ini. Bruk tuyet laik kapal, samar ngak ka jalan mbak nao mai gaok biak rilo kan kandah saong mbuan gaok bala. Jabat alam langik tasik Canada pachreih rahra plaih bruk nao mai, dom urang peih nduac radaih brei khan brei thau bruk di drei ka urang dalam sang thau dahlau tuk peih nduac radaih. Dalam tuk nan, dom tinh di gah Pai Canada daok daok mbang la-an langaoh dui atah, kuhria hu angin la-an thun tal tanut am 40 ndo C.

Syri meda hu rajaei birau kuhria meng harei 1 bilan 3 anak tal. Karja birau brei padang ngak veik dom sarak di Syri hadei labaih 5 thun but pajaih al-Assad pan kaok saong pasiam veik bruk ngak mbang kinh te kathaot rambah, trak damak hadei jaik 14 thun mesruh metak. Rajaei birau meda iek kuhria hu abih  bruk hu rilo bangsa, ralo agama di taneh ini, di tukvak bhap bini dunya iew da-a khik pacang hu siam ka dom nyom urang bangsa takik./.