Ngak tui Danak dak pala kajap sa trieu hecta padai asar siam, takik tathua nerak gam patagok hijao di Bhum taneran kraong Cuu Long, tinh Vinh Long dak harei dak hu rilo bhum ngak padai, pambuak bruk pablei, tapa nan paglong bruk ngak kinh te saong jien mek tame ka urang ngak nong. Meng akaok thun tal ini, taong abih taneh ngak padai saong pambak praong tui Danak dak di Vĩnh Long hu labaih 9.600 ha, sumu 120%  bruk kham merat dalam thun.  Bruk ngak hu  meng dom bruk nan mboh kein laba di urang ngak nong meng 1,5 - 9,3 trieu dong sa hecta sa mbang yuak dut haong hamu bhain ngak.  

So Bangsa saong Agama Ban Dong Nai birau peih Nyaom Pathau khan, pambak praong hukum ka bruk likei atau kumei sumu gauk; pacang caga bruk tok diuk tok pasang tuk umo daok sit, lakhah dalam but pajaih  ka jaik 120 urang lambaok ka urang hu angan je dalam bhap bini bangsa takik saong bhap bini di xa Thọ Sơn. Nyaom roya pabak ka bhap bini hu thau ka jalan tacei ba di Dang, sarak hukum di Karja ka adat likei kumei; bruk oh siam hadei tok diuk tok pasang tuk umo daok sit saong dom jalan pacang caga. Urak ini, Dong Nai hu 207  palei urang bangsa takik saong bhum ceik.

Tinh uy Ca Mau birau ba tabiak Sarak padang ngak jalan mbak nao mai dalam palei  vaktu meng thun 2026 - 2030, ngak hu dom jalan tame tal dom puk palei. Sa kadha di Sarak brei caik hatai lac patagok bruk ngak di bhap bini min juai ngak trak damak di urang. Bhap bini kaoh taneh alin brei, panduan ramik drap ar, ngak sumu mbaok jalan, ngak pabak ribaong ba ia pala drak, rik jien, kaya kan atau harei ngak bruk. Jien rik daong lagaih tui yaok bhum palei, yaok jalan. 

30 baoh sang raidiuk kan kandah di phuong Khanh Hoa, ban Can Tho birau hu UBMTTQ VN Ban Can Tho  alin baoh Sang jum pataom. Meng akaok thun tal ini, Ban Can Tho  jak ba hu kabaih 70 ti dong ka dom danak dak tani tanat raidiuk bhap bini. Dlam nan, labaih 40 ti dong piah daong padang ngak sang ka urang kathaot, jaik kathaot saong sang biak kan kandah. Dom baoh sang birau oh lac pambuak jum pataom dom bangsa bo daok daong  bhap bini tani tanat raidiuk, patagok truh kathaot karo kajap.

Tui Rayo Khi tuong thuy van Meraong negar, dalam dom harei anak tal  hajan praong di ralo labik, ralo harei, ia hajan meng 100 - 250 mm, hu labik labaih 250 mm. Bhap bini brei kuhria caga ia dauk dom labik dhong, abik tapen kraong, ribaong. Dalam tuk hangin khang, hajan praong gam ia patau. Langiu di nan, dalam bilan 9 ini hajan  di Meraong negar  takik jang, jaik tame bilan thu.

Han Quoc brei ngak salah dom harak gal saong pabak 166 kaya y te ka sa sang iek ruak di Trieu Tien hadei tuk Bình Nhưỡng taduan bruk. Ini lac sang iek ruak akaok meti  ngak blaoh danak dak padang dom sang iek ruak saong sang mac  di dunya kayua urang ngak praong di Triều Tiên Kim Jong Un pajarah ngak. Bruk nan rah tabiak dalam tuk Seoul daok kham ngak pasiam veik haong Trieu Tien.

Hoi dong bao an LHQ harei ini pataom tame ginum biai ka dom bruk hu makna praong birau ini pambuak tal jalan tathik  Bab el-Mandeb, jalan pambuak Tathik Biển Đỏ haong  Vịnh Aden gam  Ấn Độ Dương. Ini lac sa dalam dom mbang pajeng ba kaya kan tapa tathik  hu makna praong di dunya, yau nan ye bruk sraw kadau rah tabiak dui atah ngak kandah tal bruk daong pahala. Urak ini, hu jaik 50%  bhap bini Yemen khin daong, dalam tuk  daok bruk iek lapa.  

Lien minh chau Au daok khik catang sarak di cu, dalam nan hu jalan padeih langyah dom haral don likau ti nan tuk urang tame negar ralo. Lien minh chau Au jeng daok kuhria iek veik kadung jien karja piah daong ka dom “ pasak ba urang gilac veik negar”  di  dom taneh ia ka 3, piah lagaih ba dom urang oh hu ginup harak gal  daok veik EU tapa dom taneh ia ini. Hadei bruk sraw kadau di Ceuta, Tây Ban Nha, urang di cu daok mai chau Au oh huac bala rah tabiak di angaok jalan nao tapa.