Tinh Vinh Long bahrau salah blaoh bruk peih harak gar ruak hakik ndien tu di 100% labik pasang iek ruak, taong ruak di bhum, brei mboh bruk ngak hu makna dalam bruk salih lek taka so gah  y te saong pasang iek prein yava di rahra. Bruk peih ngak samu gauk harak gar ruak hakik ndien tu saong tapuk prein yava ndien tu oh lac pandar ung dung ilamo kong nghe, bo daok lac mbang pasiam taong abih dalam jalan sahaneng pasang iek y te, daong paglaong asar siam pasang iek ruak, taong ruak.

Tui Tinh uy Ca Mau dalam 9 bilan tapa, yaom lac gaok rilo kan kandah, Dang bo, karja saong bhap bini Ca Mau kham merat, kuhria caga dahlau, sami samar dalam bruk, tacei ba jalan ngak saong mek hu dom bruk jak jeng siam mekre taong abih gah. Bruk ngak kinh te - xa hoi Ca Mau hu rilo bruk siam mekre. Dom gah ngak kong nghiep, ngak nong, jitvu patagok siam mekre. Bruk buh jien tame ngak mbang pablei salih hu siam veik, pachreih hu 19 danak dak buh jien tame ngak mbang birau.

5 thun tapa dalam tinh Dong Thap hu jaik 11 ribau urang ngak bruk ngak ngak di Japon, Han Quoc, Dai Loan tui harak pambuak bruk. Hadei 3 thun abih tukvak pambuak bruk dom urang njauk gilac mai negar meda patak pataom hu phun jien meng 600 trieu dong ba tagok, daong baoh sang patruh kan kathaot. Tukvak tapa, dom gah chuc nang di tinh Dong Thap hu tagok bruk pathau khan, jak ba, daong phun jien mesraiy laba lap piah brei kein lagaih ka dam dara nao ngak bruk di negar langiu.

Kapol Pachreih bac tinh Dong Nai birai peih bruk jao brei paok jien bac Daong prein ka anek saih, sinh vien kham merat yam tapa kan kandah bac megru naih joi mbang 14, thun bac 2025 -2026. Tui nan, hu 176 anek saih, sinh vien jaoh jo hu alin brei paok jien bac kuhria jaik 1 ti dong. Tukvak tapa, Kapol pachreih bac tinh Dong Nai patui pambuak bruk haong dom mban, dom gah saong dom xa, phuong piah alin brei paok jien bac ka labaih 450 adei anek saih jaoh jo pakat tieu hoc ngan haong paok jien labaih 1 ti 350 trieu dong. Danak dak jien bac ini hu jeng sa bruk ngak hu makna, ndung bak hatai anit ranam, daong ka dom adei yam tapa kan kandah.  

Kong an tinh Tay Ninh bahrau daong paklah jak jeng sa urang umo 15 thun njauk dom kol chot pagat meng kadha “bruk njol, jien bilan glaong” plue nao tapa Campuchia. Dahlau nan, labaih mon 14 tuk harei 1/10, Balai Kong an Labik kinh te pabah mbang Mộc Bài mek hu khau tin di rahra ka sa urang karei daok duah jalan piah nao tapa Campuchia. Di tuk nan, kapol chuc nang saong Kong an xa Bến Cầu dil samu duah mboh saong ba adei mai labik ngak bruk. Tapa ngak bruk, adei angan L.T.L. (ndih tapui thun 2010, daok di Bac Ninh). Urak ini urang dalam sang hu mai raok kamuan L. nao sang salamat.

Rajaei Indonesia daok ba tabiak bruk pachreih urang ngak mbang pabak veik dalam quy IV thun ini, caong daong ka 30 trieu baoh sang, sumu 100 trieu urang dalam negar. Nan lac bruk hu makna praong dalam paok jien daong pataom tame danak dak “Harei Noel  saong Thun birau”, trun yaom jien kapal ahaok meng 12 tal 14%, harak ve radaih, gilai  saong dom bruk pablei ndap lap piah pachreih urang cai pandar.  

Rajaei Tong thong Donald Trump jaik ba tabiak TrumpRx.gov – sa nen tang online hu caong takre brei daong rahra My blei jru lap jien jang. TrumpRx lac sa keng pambuak tapak di urang pandar haong dom kong ti jru cavao, tah klak dom gah karei njauk ndom lac gah tagok yaom jru cavao di darak pasar My. TrumpRx.gov brei caik dahlau bruk duh ka dom urang ruak oh pandar bao hiem y te kayua dom urang nan daok ndua naong trak abih meng yaom jru cavao glaong.

Kong ty kong nghe Google di kapol Alphabet pathau khan hu biak ralo oh ka kuhria abih bo dom urang yam ndoc taduan harak dien tu hu asar kadha ndok jien. Sa dalam panuac khan, Google khan lac kapol kanjiak jhak nan khan lac hu pambuak haong nyaom ransomware daok payua email tal dom gah ngak bruk di rilo jabat. Kadha dalam email khan lac tavak mek du lieu ngak jak mai meng dom ung dung hu pandar dalam bruk ngak mbang./.