Dalam mbang rivang saong ngak bruk di tỉnh Đồng Tháp, Tổng Bí thư Tô Lâm hu alin 3 duk bilik pato pakai STEM ka 3 sang bac: THPT Tràm Chim, huyện Tam Nông, THPT Tân Hồng, huyện Tân Hồng saong THPT Châu Thành 1, huyện Châu Thành piah daong ka dom rairah hu bac megru ilamo  piah yam tame  jaman 4.0. Tong bi thu caong khin, gru saong anek saih di dom sang bac njauk brei  salih birau cati catang  meng bruk pato tui jalan ta-eng gru pato tapa  patagok ky nang, jhul pakhang bruk pato saong bac sap negar langiu, abih di nyu lac sap Anh, jhul pakhang bruk padang xa hoi manuac sia bac megru.

Tỉnh Sóc Trăng kuhria caga daong ngak abih baoh sang taik tahak ka labaih 8.400 baoh sang kuhria abih tih jaik 444 tỉ đồng. Sóc Trăng kham merat ngak brei salah bruk oh daok baoh sang taik tahak dahlau harei 30/9/2025. Di huyen Long Phú daok jaik 500 baoh sang urang hu buh prein ngak bruk ka taneh ia, baoh sang kathaot, jaik kathaot saong bangsa takik oh ka hu sang daok. Huyen kham merat peih ngak salah bruk oh daok baoh sang taik tahak saong daong bhap bini duah hu bruk ngak; ngan haong baoh sang kathaot, baoh sang jaik kathaot oh lac tapa truh kathaot bo yam tal raidiuk trei sir, ginup jang.

Harei pataom ilamo dom bangsa takik saong bhum ceik tỉnh Bình Thuận mbang ka I  birau hu peih ngak di harei kabroi 11/12. Harei pataom hu rah tabiak dalam 3 harei  hu mbaok di jaik 200 nghe nhan, urang daoh tamai mai meng 7 kapol nyaom bhap bini  dalam tinh saong dom urang ilamo, urang roh duah mai meng TPHCM, Ninh Thuận, Đồng Nai. Ini lac lagaih piah dom bhum palei yaih khan saong meyaom  dom sajarah, ilamo siam gheih di bangsa.

Urak ini tỉnh Gia Lai daok khik ramik labaih 4.500 bo kong cieng saong labaih 110 baoh cieng. Dut saong bruk yaok kuhria thun 2008, dom baoh kong cieng  daok 1.000 bo. Huyen  Ia Grai lac bhum palei daok khik hu rilo kong cieng abih daam tỉnh Gia Lai hu jaik 750 bo. Mbang pasang iek kong cieng piah yaok kuhria saong taong yaom abih tih kong cieng di bhap bini. Meng nan hu dom  bruk ba tabiak piah khik ramik saong patagok dom ilamo kong cieng saong labik ma-in kong cieng di tỉnh.

Meng thun 2019 mbiah tal ini, gah Kong an tỉnh Bình Dương duah mboh, chap mek 74 mbang, 148 urang ka dom bruk pambuak tal “mesre jien laba glong”. Tui Đại tá Trần Văn Chính, Pho Yam ndoc Kong an tỉnh Bình Dương, bruk urang njauk duis, ngak suan hukum ka bruk “mesre laba glong” rah tabiak sraw kadau. Bruk jhak kayua “mesre laba glong” biak trak, ba tal rilo bruk suan hukum yau: pametai  urang, chap khik urang ngak suan hukum, khin ngak njauk rambuac, blah mek drap ar, ngak sraw kadau raidiuk manuac sia…

Jabat An ninh Liên bang Nga  chap mek bruk ngak suan hukum di dom tổng ndai dunya. Dom tong ndai nan ngak suan adat hukum dunya, pachot pagat rilo mbang biak praong pamong tame bhap bini dom taneh ia Lien minh chau Au, Anh, Canada, Brazil, Ấn Độ, Nhật Bản saong dom taneh ia karei, hu pacang meng bruk lac biuh jien tame ngak mbang.  Hu jaik tal 100.000 urang, daok diukrai di labaih 50 taneh ia lac njauk urang pagat ngak bruk suan hukum. Urak ini, urang jakar gah bruk ini daok pasang iek ngak brei cambaic laic.

Rajaei Hong Kong, Trung Quoc pakhang dom jalan dut iek prein yawa ka taong abih dom kapal haok pajeng tuai mai meng dom pasak piah salih labik par di châu Phi anak bruk tamuh jit ruak oh ka thau meng halei mai ngak takik di nyu 79 urang di Cộng hòa Dân chủ Congo metai. Yaom lac oh hu mbang par halei tapak meng Congo nao mai Hong Kong min tuai mai meng negar châu Phi nan bhian hu nao tal labik hanh chinh negar Trung Quoc tapa dom mblang kapal haok  salih labik par di chau Phi.

Apui khuah glai di harei 10/12 di bang California, My, njauk panduan ba rahra di ban Malibu nao labik karei kayua apui meda mbang sang danaok. Apui khuah glai ngak lahik ndien di ralo labik saong dom jalan nao mai di tapen tasik brei pacang. Bruk  apui khuah glai hu peih ngak di taneh gam angaok langik. 300 urang lin daong padam hu ba mai ngak bruk haong 700 urang daok kham padam apui mbang glai. Bruk ba tal apui khuah glai urak ini oh ka thau kayua meng halei./.