Hu mbaok dalam Harei Pahadar 50 thun Harei peih paha Phước Long, Binh Phuoc dalam melam harei 5/1, Tong Bi thu Tô Lâm pok meyaom saong taong yaom glaong jaik 50 thun peih paha tinh, meng sa bhum palei kurang sap janih, bruk ngak mbang kinh te sit sot, raidiuk di mikva daok rilo kan kandah. Binh Phuoc hu saong daok salih bahrau yaok harei. Tong Bi thu pandar tinh jhul samar bruk ngak bahrau, salih taka so piah patagok urang ngak bahrau; salih bahrau; patagok pambuak bhum tapa bruk patagok he thong ha tang pasak; paglaong raidiuk ka rahra, dui jaik sumu gauk jang di bhum palei, bhum mikva bangsa takik, bhum kan kandah, bhum tapen negar saong ndo thi…

Piah caga sumu caong khin di tuk tabung glong dalam bruk ngak tabiak, pablei salih di TPHCM khin palih ruah jiak 32.500 urang tame ngak bruk. Muk Lượng Thị Tới, Phaok Yam ndoc So LĐ, TB saong XH TP.HCM khan lac: urang ngak bruk tui bilan hu palih ruah ralo abih di dom labik yau ye urang pablei pandap, jao bayar pandap, urang duh ka tuai, papaok saong urang ngak tabiak pandap. Ini lac lagaih ka urang ngak bruk mbian mbiah, anek saih, sinh vien caong hu bruk ngak piah duah jien. Yau nan min, urang ngak brei duah thau cambaic laic dahlau tuk tame ngak, abih di nyu nan lac dom khaw tin palih ruah angak mang xa hoi.

Mentri Tu lenh bhum 5 Bol lin tasik daok padang kapul nao rivang, tadhau ayuh Tet bol lin saong rahra di bhum tasik Pur Meraong di harei Tet Nguyen dan Ula Naih. Thun ini, hu labaih 200 urang lambaok mai meng dom tinh, ban Can Tho, Vinh Long, Binh Duong, An Giang, Soc Trang, Ca Mau gam haong dom gah ngak mbang pablei salih hu mbaok tame kapul gam haong kapul nao rivang. Kapul ba tui 220 paok pandap, pandap panda gam haong hatai anit ranam di rilo jabat, kapul payua tal urang jakar, bol lin, rahra di dom kaoh pulao dalam ban Phú Quốc, kaoh pulao Hòn Chuối, Hòn Khoai, Nam Du, kaoh pulao Thổ Chu, Hòn Đốc daok dalam tinh Kien Giang saong Ca Mau.

PGS.TS Trương Văn Món gam dom urang pambuak ngak bruk birau yaih khan tabiak dom baoh tapuk Bruk ngak meng tangin takai meng kan di Campa pak sang bac Đại học KHXH&NV - ĐH pakat Negar TP.HCM. Ini lac dom baoh tapuk hu makna ilamo, oh lac pabak la bruk roh duah pambuak tal bruk ngak meng tangin talai meng kan bo daok lac hu cih vak mboh biak mekre ka bruk ngak meng tangin takai meng kan di bangsa Cam urak ini. Tapa dom baoh tapuk nan, urang bac urnag iek hu mboh hu thau ralo gah ilamo gah ngak bruk meng tangin takai saong ini danak dak rik tame biak praong dalam bruk khik ramik ilamo.

Di Tra Vinh bilan tabau thun ini hu rilo saong pablei hu jien. Urak ini tabau mek hu 10 tanut yamen saradang di hamu hu pablei haong yaom 1.300 dong sa kilo, ini lac yaom glaong abih meng dahlau mai. Langiu di nan, tuk urang ngak nong ngak njauk harak pambuak bruk, kongti daok bayar veik 50 dong sa kilo tabau tamo. Ngan haong tabau mek hu meng 130-150 tan sa hecta , urang ngak nong hu jien laba meng 50 tal 70 trieu dong sa hecta. Abih di nyu nan lac tabau hu yuak paik dahlau di Tet Nguyen dan nan urang ngak nong biak chreih chrai uan tabuan.

Quoc hoi Nhat Ban daok pasang iek khan tapa sa hukum brei adat ka urang kumei hadei lakhah blaoh hu palih ruah tui hatai mek angan but pajaih gah pasang atau oh. Meng dahlau mai tal ini, urang kumei Nhat Ban  hadei lakhah pablaoh brei salih angan but pajaih gah sang pasang, min meyah hukum ini hu khan tapa, urang kumei  meda palih ruah khik veik angan gah sang drei atau salih tapa angan gah pasang oh chap ngak tui yau dahlau diah. Tapa  roh duah hatai sahaneng di bhap bini kayua Mentri Tổng vụ Nhật Bản ngak, ye urang njauk hatai haong hukum nan tok jaik 29% min.

Yaok pluh trieu rahra Mỹ daok kuhria caga sa rabuk bilan la-an haong tuyet laik papan abih saong langik la-an abih dalam 10 thun mai. Dom labik di Mỹ bhian oh randap haong langik la-an jeng hu khan kakei dahlau lac hu pambuak tal. Jabat kuhria iek dahlau ka langik tasik brei thau ini meda lac mbang tuyet laik papan abih saong langik la-an abih meng dahlau mai. Dom gah ahaok par di Mỹ daok brei salih harak ve oh mek jien ka tuai damuai dalam bruk dom mbang ahaok par brei padeih.

Châu Âu daok gaok kan kandah kayua jit kum bilan la-ar, tuk puac thun, ralo mbang nao mai saong ginum biai jeng bruk pambak jit ruak kum. Meng Tây Ban Nha tal Pháp, meng Trung Âu tal Đông Âu, hu yaok pluh  ribau urang njom ruak.  Dom gru jru kuhria mboh dom urang ruak kum daok tagok veik glong jang hadei tuk padei di uranaih tamat. Daok di negar Mỹ, takik abih lac 40 bang khan lac hu biak rilo  urang  njaom ruak kum dalam adit blaoh. Urak ini, takik abih lac 5,3 triệu mbang urang ruak, 63.000 urang tame iek ruak saong  2.700 urang metai./.