Dalam arthak uan Ndang, uan bal pataih di dom harei akaok thun bahrau, harei kabroi, di Ha Noi, Tong Bi thu Tô Lâm hu mbaok di harei peih bruk “Tet pala phun miat miat hadar tal Wa Ho” bal pataih nethak Asaih Waw 2026. Ndom meyai dalam raya, Tong Bi thu Tô Lâm brei thau, page harei 1 Tet thun 1960, Chu tich Ho Chi Minh anit ranam hu pandar pala phun Nda di brein bangu Thống Nhất (Ha Noi), peih bruk “Tet pala phun” haong hatai caong: “Bal Pataih lac Tet pala phun, ngak ka taneh ia negar dak harei dak patagok” saong “Bruk ini takik palai min ba mai kein lagaih biak rilo”. Tal ini, hadei 66 thun ngak Tet pala phun tui panuac Wa Ho pato, taneh ia drei jeng salih bahrau mboh cambaih laih saong Tet pala phun jeng “adat” gheih yaok bal pataih mai di grauk labik dalam negar.

Tinh Gia Lai birau pahadar 255 thun Proh tagok mesruh metak Tây Sơn (1771 - 2026) saong 237 thun Mesruh metak Ngọc Hồi - Đống Đa (1789 - 2026). Di var ini, dom urang lambaok hadar veik bruk mesruh metak khang kadang, abih hatai di bruk mesruh metal di urang ngak nong Tay Son di puac abap XVIII – pambuak  haong bruk klau adei sa-ai  Nguyễn Nhạc, Nguyễn Huệ, Nguyễn Lữ. Njauk ndem tal Patao Quang Trung - Nguyễn Huệ, urang ngak praong naih joi, urang ba bruk jak ba mesruh metak urang ngak nong patagok jeng bruk mesruh peih paha bangsa sajarah dakrai.

Harei kabroi 22/2, lac hare8i 6 Tet, rilo gah doanh nghiep, labik ngak mbang – pablei salih di tinh Dong thap peih harei peih pakak haong hatai chreih chrai uan tabuan, brei ottanot piah yam tame ngak mbang pablei salih hadei mbang padeih padei bal pataih, raok Tet. Rilo gah ngak mbang pablei salih daok peih brei ka urang ngak kong, urang ngak bruk mbang menyum me-in haong gauk, ayuh patuah jamo akaok thun. Abih di nyu nan lac, dom labik, gah ngak mbang pablei salih baoh kayau, kaya padang peih pakak gam gam piah duh ka hatai caong di rahra. Hadei pagam, tinh Dong Thap hu labaih 13 ribau gah ngak mbang pablei salih praong sit saong labaih 120.000 baoh sang pablei salih, gam haong 526 hop tac xa daok ngak bruk.

Urang jakar, urang lin Nhà giàn DK1 di Bhum 2 Hải quân peih bruk Salam dang ala hala dok akaok thun birau. Hala dok bhong meriak katuk kanyik jatam par tagok kreh langik tathik, taong abih dom don vi dang tapak, daoh kadha Taneh ia dalam hatai mboh chreih chrai saong kham merat ngak bruk. Hadei ngak dat, chi huy sang gian kakei bruk ngak, pachreih jak ba urang jakar, urang lin ba abih hatai ngak bruk khik caga, khik iek catang bruk ngak di tathik tui bruk jhu parabha blaoh. Yaok urang lin , urang jakar brei ngak cambaic laic njauk bruk di drei; jum pataom sa hatung hatai, khik kajap  bruk ngak po tathik, kaoh pulao palei negar.

Dalam labaih 1 adit, jalan bangu Ban raya Ho Chi Minh Tet nethak Asaih Waw 2026, di jalan nao tablak takai Nguyễn Huệ dui pachreih labaih 1,8 trieu mbang tuai damuai. Thun ini, Jalan bangu Ban raya mbang akaok meti peih praong tuk hu peih ngak di 3 labik lac Jalan nao tablak takai Nguyễn Huệ (phuong Sai Gon), Bein bangu pasak (phuong Binh Duong), saong bein bangu Quang Trung (phuong Vung Tau). Tui kuhria hu taong abih mbang tuai damuai jirah rivang di 3 labik hu labaih 2,2 trieu mbang tuai damuai. Jalan bangu Tet nethak Asaih Waw 2026 jeng caik inum ka 23 thun peih ngak, duh ka taong abih labaih 26 mbang tuai damuai.

Bilan iek Ramadan di Dải Gaza, urang Palestine uan raok bilan eik ini hu klauk thun ini  bo oh hu bruk ramik caga yau meng dahlau diah di agama Isalam. Tong thong My Donald Trump iew pataom ginum biai akaok meti di Hội đồng Hòa bình salamat, ini lac jabat pakat dunya ngakl bruk daong pahala, padang veik saong bol lin tani tanat ka Gaza hadei mesruh metak khut tayak. Di mbang ginum biai, 9 taneh ia hu sanya daong labaih 17 ti dola ka dom bruk  daong pahala.

Daok di Indonesia, Raya Tet Nguyen dan mbang akaok meti rah tabiak njauk haong bilan Ramadan di bhap bini urang Islam. Rajajaei Indonesia caong khin jhul tagok bruk la-I la-an tung tian, rilo ilamo saong ba drei tame. Don danak dak dalam nan hu pataom iftar, sampahyang Tarawih. Raya jeng hu dom danak dak palao gom apui, dom ndap nda nghe thuat saong hadah krah di sa gilang di langiu…

Dalam tuk tabung glong Tet Nguyen dan thun 2026 di negar Trung Quoc daok hu biak rilo urang nao mai glong abih kuhria meng dahlai mai. Dalam 20 harei akaok di tabung glong, kuhria abih tih urang nao mai dalam bhum hu labaih 5 ti mbang, kuhria rah tapa labaih 250 trieu mbang dalam sa harei. Bruk peih ngak tui jamraih sami samar birau caong khin daong pambuak brei hu rilo radaih apui saong parabha tuai damuai nao mai hu lagaih.