UB Bhap bini Ban raya Ho Chi Minh bahrau yasa jalan ngak cambaih laih di danak dak banah 3 - buh jien tame padang, pasiam saong paglaong jalan raya 22 (jalan meng canah An Sương tal jalan Vanh dai 3) tui jalan pambuak bruk karja saong menuac urang. Tui jalan ngak, jalan raya 22 hadei paglaong pakat brei hu peih praong tagok 60m, dalam nan hu 10 jalan radaih brei peih nduac. Taong abih tanut buh jien tame di taong abih danak dak tagok tal 10.424 ti dong. Tuk salah blaoh, danak dak caong khin brei daong prein khang ka patagok kinh te - xa hoi, peih praong labik ban medin, pasamu saong karo kajap.

Tinh Dong Nai peih bruk pasram labik pacang caga thun 2025,paglong ilamo ngak bruk, tacei ba, pambuak harak saong pakajap bruk khik iek di bhap bini. Brei panuac di var peih ngak, ong Võ Tấn Đức, Akok UBND tinh, Akok ban Tacei ba pasram pakat tinh mboh lac, bruk ngak tui Sarak 28 di Mentri Chinh tri, Dong Nai tuk halei jeng brei caik hatai kuhria  padang labik pacang caga hu siam taong abih gah meng chinh tri, bol lin, kinh te saong pambuak dom gah, piah caga dahlau dalam bruk ngak palai “sron mbon salamat”, “khin ngak bleik saleik” di dom kol kanjak jhak khik palai.

Kapul darak Jhul bruk pablei salih – Ndap nda ngak Kong palei pala saong ndap nda OCOP thun 2025 daok rah tabiak di tinh Vinh Long. Kapul darak dui pachreih labaih 300 kadai kuan di 130 labik, gah pablei salih dalam saong langiu negar. Kapul darak daok hu labik pableindap nda karei di urang bangsa Khmer, labik pataom darak peih mbang ngui ka dom urang ngak mbang sit thun umo, ndap nda hadah krah saong dom labik peih mbang ngui dalam tinh. Bingun ini gah padang peih hu alin brei jien daong ka anek saih kan kandah, alin brei 5 baoh sang anit ranam, gam haong 1 tan brah daong dom baoh sang kathaot, taong abih yaom alin pandap alin labaih 270 trieu dong.

Danak dak rup patau Ikan Ong  di got jamang hala dok Bãi Sau, phường Vũng Tàu, TPHCM kuhria tui jien 55 ti dong daok ngak sami samar . Tukvak pandar lac 100 thun. Ikan Ong  atau daok lac ikan lamen, hu iek praong yau po yang tathik, hatai jia daong ka bhap bini tuk gaok bala saong dui ba gilai tuk bleik meta. Bruk hu mbaok ikan Ong lac bruk siam patuah jamo, ngak mbang hu jak jeng saong dom mbang nao tathik hu lagaih.

Hajan praong dui atah ngak glut jaleih di jalan mbuan ceik Gia Bắc saong Đại Ninh, tinh Lam Dong, rilo jalan njauk klaih klaoh, mbuan njauk glut jaleih ganal tasak veik kayua hajan oh ka abih ngak gar tavak jalan mbak. Kong an xa Sơn Điền, tinh Lam Dong pachreih rahra nao tapa labik njauk brei caga. Tuk hu pathau khan, rahra oh brei peih nduac angaok jalan ini njiak kan kandah, meda ngak kan kandah tal bruk diukrai saong drap ar jien padai.

Sa harak pathau khan di Lien Hop Quoc bahrau ba tabiak kuhria, meng ini tal thun 2035 dunya brei buh tabiak 310 ty dolla yaok thun piah buh jien tame ka dom dnaak dak lagaih haong tanut ia tasik tagok glaong, pandiak saong dom kein lagaih kayua ia dalam arthak ngak tabiak. Tui dom urang ngak  langik tasik, nhiet do di tasik pandiak jang ngak tabiak jeng dom ribuk khang saong bhian rah tabiak jang, ba tui hajan praong jang. Bruk ini dak harei dak brei mboh bruk samar chip di dom jalan ngak ka lagaih.

Nga brei ndom catang saong ngak khat lahik trak dalam bruk dom negar chau Au peih bruk pataom mek atau blah mek drap ar njauk kareik di negar ini. Urang ndom meyai Mentri Ngoai giao Nga ndom khang lac, dom bruk suan hukum di Uy mban chau Au atau dom negar chau Au piah mek khik drap ar di Nga njauk maong yau bruk blah mek suan hukum, dui tui bruk taong bhat catang tui hukum Nga saong hukum dunya.

Rajaei rai Tong thong Donald Trump ndom lac brei daong rahra Cuba jeng yau dom negar Caribe taphia piah pasiam kanjah jhak kayua ribuk Melissa ngak tabiak. Mentri Ngoai giao My jeng ba tabiak Panuac ndom ka hatai caong ngak pahla ka Cuba saong srap gap pabak daong pahla tuk ini, ngak tapak atau tapa dom gah pambuak bruk piah pabak tal ka rahra Cuba./.