Melam ini (31.12), rahra TP.HCM meda hu mbaok tame 2 raya phling, yaok cagar saong maong iek mbang cuh phao bingu angaok glaong di kraong Sai Gon piah raok thun bahrau 2025. Tui jalan kuhria peih mbang cuh phao bingu raok thun bahrau 2025 kayua UB Bhap bini TP.HCM bahrau ba tabiak, melam ini hu 3 labik cuh phao bingu, hu 1 labik cuh angaok glaong saong 2 labik cuh biar. Harei ini, di dom labik, jalan pasak hu ramik radak tanriak hadah nghe thuat, peih ngak dom bruk pakacah padhih yau nduac marathon, nyaom roya gun dunya, pakacah nduac radaih juak…

Tinh Soc Trang kham marat tal harei 30/9/2025 ngak pablaoh bruk brei oh daok baoh sang taik tahak dalam bhum. Dalam tinh kuhria daong brei oh daok baoh sang taik tahak ka labaih 8 rabau baoh sang, ngan haong jien buh tame ngak abih tih lac labaih 445 ty ndong. Taphia di dom phun jien meng gilang pariak Trung uong saong phun jien di nagar pajum prein brei oh daok baoh sang taik tahak, tinh Soc Trang jang daok jak ba jaik 100 ty ndong veik tra nan meng ngak blaoh bruk ba tabiak.

So Kong thuong tinh Hau Giang pambuak haong dom kapul, gah ngak mbang pablei salih padang danak dak khik piah pandap panda, tani tanat darak pasar dalam harei Tet Nguyen Dan haong abih tih yaom kaom pandap panda labaih 980 ty dong. Dom pandap panda hu ba tame piah ngak tani tanat rilo meng lac dom kapul pandap mbang, saradang, menyek mbang, ralow athur, menuk ada, pandap tamo piah ngak jeng pandap mbang, njam katam baoh kraoh, ikan hadang; ahar keo, alak mbie, ia yamen, bingu that…Taphia nan jabat chuc nang brei pasang iek darak pasar, piah pacang khik kein laba ka urang blei pandar.

Gah ngak nong huyen Gò Công Tây, tinh Tien Giang kuhria peih palao labaih 500.000 drei danko hani ndam tame dom bein phun li-u piah pacang caga halak akaok juk daok ngak khut palai phun. Gah ngak nong pachreih mikva hu bein li-u nan pandar dom jalan pacang caga ruak tui sinh hoc palao danko ndam njuk di phun, oh pruh jru patamai halak, kayua piah khik hu anek hu kein laba ka phun pala di langik alam pacang caga hu siam gheih saong kajap lawik. Dalam  tinh Tien Giang urakni hu labaih 22.000 ha li-u paik hu labaih 247.000 tan baoh.

Pasak Y te huyen Bù Đăng, tinh Binh Phuoc brei thau, sa anek naih kamei umo 2 bilan, daok di palei Sơn Phú, xa Phú Sơn metai kayua tamuh karei di ruak patuk hadei labaih sa adit taong ruak. Bruk njauk caik hatai lac anek naih ini oh ka hu klauk jru caga kayua oh ka ginup thun umo. Yau nan, tal ini, dalam labik huyen Bù Đằng hu taduan 5 urang njauk patuk, dalam nan hu 1 urang metai.

Panuac raok uan Thun barau, Tong thu ky Lien hop quoc Antonio Guterres hu ieu ngak salih thun 2025 jieng tukvak tanut peih barau ka rai diuk siam makre salamat. Tui Tong thu ky Lien hop quoc, thun 2024 lac sa thun biak kan kandah piah ngak dom bruk caong di hatai. Masuh matiak matai lahik, kein laba oh sumu gauk, daok ralo neih rabha saong lamuk pamaoh di gauk. Baoh Taneh jang barau tapa sa pluh thun pandiak abih di sajarah dunya. Maong tal Thun Barau, Tong thu ky Lien hop quoc khan lac dom nagar thau pajum pambuak prein haong gauk piah daong ba dunya nao tui jalan hu siam lagaih, salamat tapa dom bruk patrun takik dom thuak nerak sang kareih camin.

Kapul Daong Uranaih Dunya brei thau, labaih sa meteh uranaih dalam thun umo nao tal sang bac di Syria daok dalam bruk oh hu nao bac, rilo meng lac kayua bruk kan kandah di mesruh metiak dui atah jaik 14 thun tapa di taneh ia ini. Oh lac hu yau nan, bruk mesruh metiak, srau kadau dalam rahra saong kinh te gaok kan kandah, daok ngak ka raidiuk di rilo uranaih Syria gaok kanjah jhak. Anak di bruk nan, dom kapul dunya patui veik ieu gah chau Au yah klak dom bruk taong bhat saong bruk pakauk piah meraik haong Syria.

Gaih Taliban daok pan karja di Afghanistan khan lac khin kareik abih tih dom kapul oh njauk rajaei dalam nagar saong dunya, kayua dom kapul oh njauk rajaei daok pandar urang kamei ngak bruk di nagar Nam A ni. Dahlau di tuk ba tabiak hukum barau ni, Taliban hu pakauk urang kamei hu mbaok tame ralo bruk ngak saong nao tal dom labik langiu hu ralo manuac, ngan haong nan oh brei ka uranaih kamei bac hadei di tal bac 6./.