Piah ba mai sa bilan Tet trei sir saong hu yaom glaong ka sinh vien, Ban raya Ho Chi Minh hu peih rilo bruk sangka Tet ka dom sinh vien baoh sang kan kandah. Pasak daong anek saih, sinh vien Ban raya Ho Chi Minh hu pambuak haong rilo gah peih ngak danak dak “Radaih bal pataih”, kuhria hu alin hadiah 2.000 harak ve radaih oh mek jien ka sinh vien saong urang ngak pah baoh sang kan kandah. Dai hoc Negar Ban raya Ho Chi Minh jeng daong 250 harak ve radaih oh mek jien ka urang ngak pah haong sinh vien baoh sang kan kandah hu nao sang mbang Tet di dom tinh pak Tay Nguyen, gah Kreh negar saong Ha Noi.

Tinh Ben Tre daok labaih 17.450 baoh sang kathaot, jaik kathaot saong labaih 5.000 baoh sang sarak karja gaok kan kandah. UB MTTQ Viet Nam tinh Ben Tre hu taduan jien daong meng dom kapul, doanh nghiep, urang ngak pahla tagok tal jaik 3.360 ty ndong, kuhria lac hu 5.800 paok pandap alin hadiah (yaok paok pandap alin meng 500.000 – 1 trieu ndong). Tukvak anak tal MTTQ  Viet Nam tinh Ben Tre kham marat jak ba dom kapul, urang ngak pahla pajum preinpiah sangka mikva hu uan raok Tet  dalam bui sambai.

UB Bhap bini tinh Tien Giang hu jao Harak brei angan pandap OCOP 4 patuk thun 2024 ka 36 pandap di 9 gah ngak mbang pablei salih, hop tac xa. Yau nan tal ini, dalam tinh Tien Giang hu 336 pandap OCOP. Dut saong bhum Taneran kraong Cuu Long, dom pandap OCOP di tinh Tien Giang hu jaik 12% abih tih pandap OCOP dalam bhum, dang di ka 3 hadei tinh Dong Thap saong Tra Vinh.

Meng akaok thun tal ni, tinh Binh Thuan taong bhat jien 524 gilai chap ikan ngaok tasik suan hukum, oh pathau khan saong oh ngak tui hukum (IUU) ngan haong jien jaik 5 ty ndong. Urakni tinh oh ka mboh bruk halei pambak tal bruk  paok yah, pajieng dom pandap VMS atau dui ba gilai ikan, manuac chap mek ikan suan hukum di labik tasik nagar langiu. Tui nan hu kuhria, peih harak ba angan dom gilai piah pasang iek 173 sruh gilai mbuan ngak suan hukum di bhum tasik nagar langiu.

Tui Pasak Kuhria Langik Tasik negar, meng harei ini tal 4/1/2025, bhum tapen tasik Dong Nam Bo hu rah tabiak mbang ia ndik tagok, tanut ia praong abih di balai Vung Tau meda tagok 4,1m. Dom labik đhaong, biar di tapen tasik gah Dong Nam Bo meda mbuan ia dauk. Mikva brei caik hatai, ia ndik tagok glaong ngak suai bruk taoh ia sua angaok kraong gah Dong Nam Bo. Dom labik dhaong, biar di tapen tasik, tapen kraong, bhum langiu ar pacang meda mbuan ia dauk dalam hadah page saong akaok tuk biar harei.

Sa khau tin hu ralo manuac sia  di dunya sangka  lac sa bala ahaok apar pajieng tuai damuai gah Jeju Air di Han Quoc meng page harei kabruai 29/12 ngak matai 177  urang. Quyen Tong thong Han Quoc Choi Sang-mok hu pathau khan ndam padhi pakat nagar 7 harei piah pahadar dom urang jhak vak gaok bala ahaok apar. Dua urang peih dalam kapul peih ahaok lac daok diuk. Di var du-a  langkan likau di yaok hadah harei adit di Mblang bein Thanh Phero pak Vatican, Giao hoang Francis brei ka dom urang gaok bala laik ahaok ni.

Tui Kapul jalan radaih apui negar Trung Quoc, sruh radaih nduac samar abih dalam dunya, nduac samar tal 400 km/mon hu ba tabiak mboh di Bắc Kinh. Bruk ba tabiak sruh radaih nduac samar ini brei pasiam saong peih praong rilo jang bruk dang akaok dalam dunya di Trung Quoc ka kong nghe jalan radaih apui nduac samar. Sruh radaih CR450 hu nduac samar iek dahlau tagok tal 450 km/mon, meda nduac samar hu 400 km/mon tuk ba tame pajeng tuai saong jeng sa radaih apui pajeng tuai nduac samar abih dalam dunya.

Mentri Ngak nong Phillippines hu khan lac bruk ngak samar piah khik salamat kaya mbang di nagar akaok thun anak tal, tuk rajaei nagar ni marat sangka yaom brah, sa pandap pandar pusak saong lac mbuan ngak lam phat. Di thun 2024 lac sa tukvak kan kandah ka gah ngak nong di nagar daok ciuk kanjah jhak di dom bala langik alam EL Nino, La Nina. Dom rabuk angin jaik gauk bahrau blaoh ngak khat lahik jien yaok ty ndo la My di gah ngak nong Philippines.