Tui dom urang ilamo, tuk bruk patagok bhum Dong Nam Bo hu ngak veik tui jalan kuhria ban medin praong pambuak gauk dalam nan hu: Ban raya Ho Chi Minh, Binh Duong saong Ba Ria - Vung Tau ye pabah lamnge ia dalam Cái Mép - Thị Vải daok uak drei tagok jeng sa jalan ngak dalam bruk logistic hu makna pakat negar saong dalam bhum. Ong Vũ Hồng Hùng, Yam ndok Pabah lamnge Tân Cảng Cái Mép - Thị Vải ndom lac, tuk 3 bhum palei pagam jeng sa daong patakik bruk neh rabha sit ka ha tang, rabha ka co che sarak. Kayua nan, hadei ramik pagam brei ngak tabiak co che sarak bahrau piah ba Cái Mép - Thị Vải salih bahrau samar drah ka ndap nda tapa lamnge.

Pasang duah bruk ngak tui sarak bangsa, agama di dua xa bhum taphia negar Long Chữ saong Phước Vinh, tỉnh Tây Ninh, Thu truong Mentri Bangsa saong Agama, ong Y Vinh Tơr taong yaom glong bruk kham merat di pakat uy, karja, gah bol lin pan phao kraong saong bhap bini Tay Ninh dalam bruk kuhria daong ka raidiuk, jalan sahaneng  di mikva bangsa di bhum tapen negar, rik daong ngak salah blaoh dom tanut padang palei birau. Tui nan, caong khin dom urang hu angan je dalam bhap bini patui bruk patagok talei rohim pambuak Dang, karja saong bhap bini; jak ba mikva ngak tui hukum sarak karja, khik ramik ilamo, paglong jalan sahaneng, jum pataom  gam haong gah lin bien phong khik negar.

Ban raya Can Tho hu taneh phun mbang baoh labaih 100.000 hecta, ngan haong padai yuak hu yaok thun jaik 1,2 trieu tan, dalam nan hu rilo janih baoh kayau hu yaom kaom kinh te glaong yau ye durian, darang, pa-aok hu pablei tabiak darak pasar Trung Quoc, Hoa Ky EU, ASEAN, Han Quoc, Nhat Ban, ba mai jien mek tame tani tanat ka rahra. Urak ini ban raya daok jhul tagok bruk pambuak dalam bruk ngak mbang, pablei phun mbang baoh; paglaong bruk ngak di gah ngak mbang pablei salih, urang ngak nong saong bruk pasang iek di dom HTX dalam chuoi yaom kaom; pandar dom bruk ngak, jalan langyah ngak parilo dom ndap nda ngak meng phun mbang baoh piah patagok yaom kaom.

Tinh An Giang hu jaik 40.000 ha taneh danao hlung raong hadang giraong hijao, mek hadang tame jaik 20 ribau tấn. Yaom pablei meng 140.000 – 150.000 dong sa kilo ngan haong janih hadang praong meng 10 tal 20 drei sa kilo, tagok labaih 20.000 dong sa kilo dut saong tukvak ini thun dahlau. Thun ini, rilo baoh sang huac oh khin raong kayua langik oh lagaih, brei takik hadang, dalam tuk urang khin blei ralo, ba tal yaom hadang tagok glong. Meng bruk raong hadang, rilo baoh sang patagok ngak kaya meda saong patui bruk pambuak pagam haong bruk raong hadang hu khang kajap di bhum taneh kaya meda. 

Kapul baoh Li-u Viet Nam brei pambuak haong Gilang Pariak Agribank bhum gah Pei Meraong negar peih sarak brei mesraiy jien ka chuoi gah ndap nda baoh li-u ka 2.700 baoh sang rahra saong 95 gah ngak mbang pablei salih, hop tac xa di Dong Thap, Vinh Long saong Ban raya Can Tho. Urang ngak nong saong labik pataom blei hu daong brei mesraiy jien piah buh tame bruk ngak mbang saong sangka phun li-u, mek hu rilo baoh, asar siam. Urang ngak nong pabak pandap tamo baoh li-u jeng hu bac pasram ilamo ky thuat pala saong sangka phun; ngak tabiak ndap nda tantu cambaih laih ka asar siam saong yaom kaom glaong.

Tui Mentri Ngoai giao My dom kol duis di bhum Dong Nam A daok parilo bruk pachot pagat tapa inernet pamong tal dom bhap bini My. Dalam thun 2024, bhap bini My lahik takik abih 10 ty dola kayua dom bruk pachot pagat tapa mang. Yau nan ye,  My taong phat 9 urang hu ngak dom bruk di Pasak pachot pagat di Myanmar. Tui nan taong phat 4 urang saong 6 bruk tamuh tabiak di dom labik chap mek manuac ngak bruk di Campuchia labik bhap bini di dom taneh ia Mỹ, chau Au saong Trung Quoc ngak dom bruk pagat urang buh jien tame ngak mbang jien online.

Dom urang roh duah sajarah di Albania saong Hy Lap duah mboh sa labang kubo La Ma hu jaman meng abap 3 atau abap 4 hadei Cong Nguyen. Jabat Roh duah sajarah Albania hu cakac duah labik ini di akaok bilan 8 bahrau blaoh saong hu duah mboh sa cau truc kandauk haong dom patau cun praong paoh sarak akhar huroh Hy Lap. Di labik labang kubo, dom urang roh duah sajarah duah mboh sa blah khan bai jhik talei mrai kanyik, jam thuy tinh saong to dhaong. Dom urang ilamo jie lac ini lac labik ndih padeih di sa urang ginup meda.

Lien Hop Quoc iew daong samar  ka dom urang kayua bala tayun megei baoh taneh di Afghanistan. Meyah bhap bini dunya oh ngak urak ini, dom bhap bini ini meda oh diuk tapa hu bilan la-ar anak tal. Melam 31/8, dua mbang megei baoh taneh ngak metai labaih 2 ribau 200 urang, ngak labaih 3 ribau 600 urang njauk rambuac, ngak khut tayak yaok ribau baoh sang di dom labik atah bayah di dom tinh bhum ceik Afghanistan, jaik taphia Pakistan./.