Danak dak 6695 di TPHCM ka bruk pato saong bac  dom mon toan khoa hoc saong sap Anh tich hop, danak dak sap Anh saong Viet Nam  hu peih ngak meng thun 2014 tal 2024. Meng 18 sang bac di 3 quan, huyen ngan haong 600 anek saih  hu bac tui danak dak sap Anh tich hop, hadei 10 thun peih ngak, hu labaih 160 sang bac haong labaih 30.000 anek saih. Mek hu sarak chung chi hadei bac danak dak Sap Anh Tich hop  labaih 86% di 3 pakat. Jaik abih anek saih hu ilamo kuhria tui 6 pakat bac sap negar langiu di Mentri Pato megru jeng yau tanut kuhria tui chau Au.

La-u lac phun hu pala ralo di tỉnh Trà Vinh. Yaok thun, dom pandap ngak meng la-u rik tame labaih 10% kein laba di gah ngak nong. Dalam tỉnh urak ini hu labaih  27.500 ha la-u, dalam nan hu labaih 5.000 ha pala tui jalan hữu cơ hacih sa-at. Phun la-u tỉnh Trà Vinh brei biak ralo baoh hu labaih 16 tấn sa hecta, kuhria taong abih baoh la-u paik hu dalam thun labaih 400.000 tấn. Birau ini,  Trà Vinh ba tabiak bruk peih praong taneh pala la-u tal thun 2030 tagok 28.000 hecta, dalam nan baoh la-u hacih sa-at gam hu taka so taneh pala  piah pakhang bruk pablei tabiak negar langiu.

UBND Ban Phú Quốc, tỉnh Kiên Giang birau ba tabiak bruk peih jalan pajeng ba tuai damuai tani tanat nao mai meng Phú Quốc  tal pulao Thổ Châu. Kaoh pulao Thổ Châu atah di pulao Phú Quốc labaih 110km, atah di Ban Rạch Giá 220km, bruk nao mai rilo kan kandah kayua 5 harei meng hu sa mbang kapal gilai pajeng tuai nao mai. Piah ba mbuan lagaih ka bhap bini, urang jakar saong urang lin, anek saih di xã Thổ Châu dalam bruk nao mai, UBND Ban Phú Quốc pok harak tagok UBND tỉnh Kiên Giang brei adat pajeng ba tuai tani tanat nao mai meng Phú Quốc  tal pulao Thổ Châu.

Dalam tỉnh Đồng Nai hu dom kol pachot pagat pandar kong nghe glong, cakak thaot binguk mbaok meta urang ba tame clip ngak jhak piah pagat meblah jien drap ar. Jalan ngak di kol nyu lac duah khaw tin urang, thaot binguk, laik phone meng ralo labik karei di gauk, cakak thaot binguk mbaok meta urang ba tame clip ngak jhak urang…hadei di nan iew mai pagat  urang payua jien tame. Jabat  chuc nang iew dom urang njuak pachot pagat nan juai pang juai ngak tui kol bleik nan, bo khan brei dom jabat chuc nang thau piah hu daong, langyah.

Tui Pasak Kuhria mboh dahlau langik tasik pakat negar, meng ini tal harei 5/12, di labik tapen tasik Đông Nam Bộ meda hu rilo mbang ia ndik. Ia ndik glong abih di balai Vũng Tàu di harei ini lac labaih 4 met. Langiu di nan, meng ini tal bilan 2 thun 2025, di bhum tapen tasik Đông Nam Bộ hu 5 mbang ia ndik. Kayua yau nan ye, Kuc khik iek ar kraong ribaong saong Pacang caga bala meng langik tasik caong khin dom tỉnh, ban gaok kan kandah, peih ngak tui iek tani tanat dom khaw tin kuhria mboh dahlau, kakei dahlau, sumu ka dom pakat karja, bhap bini piah caga plaik njiak.

Indonesia daok ba tabiak ralo jalan daong yau trun jien harak vé kapal haok dalam negar atau brei pasiam tagok veik jitvu piah pachreih urang mai jarah rivang ma-in  puac thun. Dalam tuk Rajaei Indonesia trun yaom harak ve ka dom mbang pal dalam negar  tuk padeih Giáng sinh 2024 saong thun birau 2025 di taong abih mblang kapal haok. Tui kuhria di Mentri Yulit Indonesia, urang nao ma-in yulit  dalam mbang padeih padei kuhria labaih 110 trieu urang, lac bruk lagaih siam piah jhul patagok kinh te saong yulit  dalam quý 4 thun ini.

Quoc hoi Australia birau khan tapa Hukum Nhap cu ramik pasiam piah taneh ia ini meda bayar jien ka taneh ia ka klau taduan hu urang negar langiu njuak patruak  tabiak Australia. Urang negar langiu njauk patrauk meda tagok tal 80 ribau urang. Urak ini taneh ia ini daok ginum biai haong Mỹ saong New Zealand ka bruk taduan urang negar langiu njuak patrauk tabiak truh Australia njauk patrauk. Yau nan min, rilo urang caong khin daok di Australia, ngan haong urang nan, Hukum Nhap cu ramik pasiam meda hu jalan piah rajaei Australia langyah dom urang nan piah takik urang daok veik suan hukum.

Dalam harak pathau khan di Harei Dunya pacang caga AIDS - 1/12, UNICEF khan lac hu 96.000 uranaih kumei saong 41.000 uranaih likei dalam umo 15-19 njom HIV birau dalam thun 2023. Tapa nan lac yaok 10 mbang urang birau njom ruak di uranaih ye hu 7 urang lac kumei. Di labik jiak Sahara châu Phi, urang ruak daok glong jang ngan haong 9 dalam 10 mbang  urang birau njom ruak  dalam nyaom urang umo meng 15 tal 19 uranaih kumei./.