Tui tacei pato di Thuong truc Thanh uy TPHCM, gam patak pataom saong khik bruk salamat, Jabat Thanh uy caong khin dom jabat, don vi, urang juai payua pandap alin saong bingu ayuh uan Nyaom roya Dang bo mbang I, vaktu 2025-2030. Nyaom roya peih tabiak meng harei 13 tal harei 15 bilan 10, dalam nan hu nyaom caga dahlau, dom nyaom gunum biai praong saong tamat. Kadha birau di Nyaom roya mbang ini lac bruk brei pandar ilamo taka so taong abih bruk: urang ginum biai brei pandar mac tinh piah tame iek taong abih khaw tin, harak tai lieu.  

Meng harei 1 bilan 7 thun 2025, urang hu blei BHXH tui caong khin hu Karja daong meng 20% tal 50%, tui urang; tukvak daong tagok tal 10 thun, pamong tal bruk khik brei tani tanat raidiuk suai lavik ka urang ngak. Hu mbaok tame BHXH tui caong khin, bhap bini oh lac hu Karja daong jien bo daok hu mbang jien bilan huu saong hu brei harak BHYT oh abih jien. Ini lac jalan ngak piah pabah  ka dom urang ngak jien mek tame takik, bhap bini daok di bhum kan kandah hu lagaih blei BHXH tui caong khin.

Tui Thu truong Mentri Pato megru Lê Tấn Dũng, khaw tin di dom gah mbao chi soang bruk rah tabiak, daok rilo bruk mek jien, atau chap mek ngak tui hatai caong min jeng ngak biak. Mentri  Pato megru iew dom don vi brei ngak njauk cambaic laic, yaom tapuk, yaom ndap bac di labik drei piah dom amaik ame, anek saih saong dom pakat khik iek. Gam haong nan brei iew dom bhum palei langyah catang dom labik pato megru mek jien oh tui njauk sarak ba tabiak.

UBND tinh Ca Mau birau njauk hatai ka bruk brei buh jien tame ngak Danak daka sang daok xa hoi di Phuong An Xuyen, kuhria abih tih phun jien labaih 505 ti dong, rik tame ngak brei tagok 610 baoh sang daok rahra  dalam thun 2025. Danak dak hu 2 khoi sang glong 12 tal, 2 khoi sang caik radaih  3 tal, tui kuhria dahlau ngak blaoh dalam quy 1 thun 2028. Tuk ngak salah blaoh, danak dak pabak sang daok chung cu ka rahra hu ginup lagaih: jalan paba ia- tathuak ia, gom truac hadah, phun kayau, labik ma-in the thao, mblang ma-in, labik pataok radaih saong ramik hareik.

Kong  an tinh Dong Nai pambuak haong urang jakar Mentri Kong an chap mek hu urang pametai 3 urang dalam sa baoh sang di labik blei kaya nong Thiên Hạnh, di xã Dak Nhau, tinh Dong Nai di page harei 3 bilan 10 meng blaoh. Urang angan Lê Sỹ Tùng, ndih tapui thun 1992, lac bhap bini ban sit Phuoc Long, tinh Binh Phuoc ( klak). Tùng daok dauk ye mek hu.

Yam ndoc Hoi dong Kinh te Negar di Nha Trang Kevin Hassett khan lac bruk brei urang lien bang padeih ngak bruk meyah dom mbang ginum biai di Quoc hoi klah di kareik pabah mbang Rajaei oh langyah ba siam hu. Panuac ndem meyai nan dalam tuk Rajaei My yam tapa karei ka 5 kareik pabah mbang bo oh ka mboh hagait siam cambaic laic. Dang Dan chu  saong Dang Cong hoa daok kalah gauk ka dom bruk iek glang prein yawa daok tavak tavaiy.

Meng harei ini (lac harei 15 bilan Tishrei tui saka Do Thái), urang Israel gam urang pambuak bruk Do Thai di dunya yam tame Adat Sukkot lac sa dalam 3 adat hu makna praong abih dalam thun, dui atah 7 harei ngan haong rilo adat cambat di mukkei saong makna praong glong. Dalam tuk nan, muk kei urang Do Thai diuk dalam dom tadai tuan  hu Thien Chua daong. Piah hadar asar kadha nan, harei ni, dom baoh sang Do Thai padang tabiak sukkah lac dom tadai tuan tauk hala, labik urang mbang huak, sampahyang langkan, ndik veik dalam dom harei ngak adat.

Dom bruk kham merat daok peih ngak samar di bein gah ia harei tagok di ceik Everest di Tây Tạng, Trung Quốc. Jaik 1.000 urang daok gar tavak kayua ribuk tuyet praong cakak abih dom jalan tagok ceik. Yaok rituk bhap bini saong kapol lin daong duah urang hu mai ramik tuyet, peih veik jalan tame dom var trang trai di ceik glong labaih 4.900 met dut saong mbaok ia tathik. Trung Quoc oh ka brei thau khaw tin metai, min kakei dahlau mbuan glut jaleih taneh saong tuyet./.