Mbang Thuong truc Uy mbang Mat tran Negar Viet Nam dom phuong Bình Tây, Bình Tiên saong Bình Phú, Nam Ban raya Ho Chi Minh bahrau peih ngak di Nyaom biai taom gaok urang ba drei tame buh phieu haong dom urang ba drei tame palih ruah tame Quoc hoi di labik palih palih ruah ka 6. Ndom meyai haong urang buh phieu, Bi thu ban uy Ban raya Ho Chi Minh Trần Lưu Quang brei thau ban raya hu ngak saong daok pasang duah taong abih dom quy hoach daok kandaong, danak dak daok kandaong dalam bhum. Ban raya brei pataom tame taoh talaih dom tavak tavaiy ka hukum, quy hoach saong halau prein piah jhul tagok tukvak peih ngak, aval drah langyah dom bruk daok kandaong dui atah, tapa nan tani tanat raidiuk rahra saong pandar siam lagaih taneh riya ka bruk patagok.

Pasang iek labik padang danak dak Jalan 3 TPHCM saong danak dak peih praong jalan radaih drah samar  Ban raya HCM - Long Thành - Dầu Giây, Mentri Padang ngak  Trần Hồng Minh caong khin dom don vi jhul pasamar ngak danak dak, hu salah blaoh dalam siam mekre. Njauk ndem tal jakan Tân Vạn lac paok thau di danak dak Jalan 3 TPHCM, ong caong khin po taduan ngak danak dak, urang dang ngak saong dom gah pambuak tal brei ramik pasiam dom kan kandah piah  ngak siam jalan Tân Vạn di harei 30 bilan 6 thun ini piah pambuak haong mblang kapal ahaok Long Thành.

UB Bhap bini tinh Ca Mau bahrau ba tabiak jalan patagok majam ha tang jalan mbak tukvak 2026 - 2030, dalam nan kuhria jak ba labaih 65.600 ti dong piah peih ngak gam gam danak dak jalan mbak hu makna piah tayah “bruk gar tavak” radaih angaok jalan, peih praong bruk pambuak bhum saong ngak tabiak bruk naih gheih bahrau ka bruk patagok kinh te. Bruk peih ngak gam haong nan dom kapul danak dak hu caong takre brei salih rilo ka thaik thaot mbaok meta ha tang jalan mbak Ca Mau, patagok bruk pambuak bhum, paglaong prein meraik gauk ka kinh te saong pasiam an ninh quoc phong dalam dom thun anak tal.

Ong Trần Quốc Tuấn, Yam ndoc So Kong thuong tinh Vĩnh Long khan lac, mbiah tal ini dalam tinh hu 752 labik pablei xang menyek  hu mbaok harak haong jabat khik iek, oh khik piah xang saong tagok yaom glong. Langiu di nan, hu 9 gilang khik piah xang menyek kuhria taong abih padang hu 27.300 met khoi, pabak hu ka bruk pandar yaok harei di bhap bini rahra saong ka doanh nghiep. 

Uy mbang Mat tran Negar Viet Nam phuong Tịnh Biên, tinh An Giang peih bruk jao 2 baoh sang Gul pataom ka dom baoh sang kathaot dalam bhum. Yaok baoh sang praong labaih 32 m², hu padang khang kajap, khik kajap kein lagaih daok dang ka dom baoh sang. Taong abih jien buh tabiak padang dua baoh sang lac 100 trieu dong. Bingun ini, Sang baha Huỳnh Quang jeng alin brei 100 paok pandap ka dom baoh sang kathaot. Tukvak tapa, phuong Tịnh Biên tuk halei jeng sangka ngak siam dom sarak daok dang mbang ngui, sangka raidiuk ka baoh sang kathaot, jaik kathaot saong baoh sang mbang tui sarak.

Rajaei Han Quoc brei kuhria yaom menyek dalam negar  mbang akaok meti  hadei jaik 30 thun piah pacang bruk tagok yaom hadei tuk mesruh metak di Trung Dong ngak yaom menyek tagok samar. Tong thong Han Quoc khan lac, danak dak khik tani tanat darak pasar  yaom 67 ti USD njauk brei peih praong meyah njauk, tui nan iew da-a rajaei saong gilang karja negar brei kuhria dom jalan ngak piah pacang caga bruk langik salih karei di darak pasar jien padai saong jien negar langiu.

Karja Tong thong My Donald Trump daok maong iek bruk taoh talaih dom bruk taong bhat ka menyek ngan haong Nga piah patagok halau pabak xang menyek dalam dunya, dalam tuk yaom menyek tagok rilo tal labaih 100 dollar My yaok thung kayua mesuh metak di My, Israel saong Iran. Adit dahlau, My hu brei ka An Do anak meta blei menyek di Nga piah daong negar ini pabak tae bruk kurang patrun halau pabak meng Trung Dong.

Dom urang jaoh jo saong urang takik tagok trun pasram rup meda jaik jang riyak tathik. Ini lac bruk ngak hadah krah tapen tathik ka taong abih rahra piah daong urang jaoh jo  uah hu bruk bui sambai dalam raidiuk saong jru ruak yaok harei hu siam jang. Tui blah web di danak dak, bruk padang tapen tathik ka rahra urak ini hu 5 labik nan lac tapen tathik di Rio de Janeiro, Brazil duh ka labaih 50 urang jaoh jo yaok harei./.