Mban Khik iek jalan pasei ndo thi TPHCM peih bruk pakacah gauk 60 harei melam ngak bruk. Piah ngak hu salah  dom bruk hu makna praong padang ngak jalan Metro ka 2 (Bến Thành - Tham Lương) dalam thun 2025. Bruk pakacah gauk, pataom tame ngak salah blaoh bruk ramik pasiam danak dak, peih bruk palih ruah urang padang ngak, urang tacei ba ngak saong khik iek danak dak. Ini lac dom bruk luac abih kuhria caga piah padang ngak danak dak. Jalan radaih ndien atah 11 km, dalam nan 9 km peih ala taneh saong 2 km peih angaok hu 9 labik ga padeih, 1 labik padeih di angaok. Danak dak nao tapa 6 quan dahlau diah nan lac: 1, 3, 10, 12, Tân Bình saong Tân Phú.

Daok labaih 3 bilan tra tal Tet thun birau nasak Athaik Wao – Bính Ngọ 2026, ini lac tukvak hu rilo baoh sang di tinh Dong Thap raong veik taphon athur pablei Tet. Yau nan min, anak bruk jit ruak aih caraoh pabui chau Phi daok tamuh gilac, bhap bini raong veik brei caik hatai saong ngak tui rilo jalan khik iek taphon pabui. Dong Thap hu taphon pabui ralo abih di bhum taneran kraong Cuu Long hu labaih 470 ribau drei. Meng akaok bilan 10 tal ini, urang raong veik taphon pabui 75 ribau drei piah duh ka Tet Athaik Wao – Bính Ngọ.

Gah meraong negar hu rilo mbang ia ndik birau, mbuan ia duak ralo labik. Pasak Kuhria mboh dahlau langik tathik pakat negar brei thau, harei ini saong harei paguh ia tagok glong abih dalam harei di labik tapen tathik bhum gah ia harei tagok di Meraong negar, ia ndik di balai Vũng Tàu meda tagok meng 4,1 - 4,2 m. Meng harei 6 tal harei 11-11, ia ndik tagok hasit, ia tagok glong abih meda meng 4,2 - 4,3m. Jabat kuhria iek kakei dahlau karja palei saong bhap bini di labik tapen tathik  brei caga dahlau piah takik khat lahik, abih di nyu lac jalan nao mai, ngak nong pala drak, raong kaya dalam ia saong khik brei hacih ia pandar.

Dalam dom harei anak tal, ia di dom kraong, ribaong di Ban Can Tho daok tagok veik, ini lac tukvak ia ndik tagok khang gam haong ia meng gah angaok kraong tuh trun, meda dauk rilo bhum dhoang dalam, labik jiak ar kraong. Gah chuc nang kakei bhap bini brei caik hatai pacang caga dien tuk nao mai tapa labik ia duak bo hu ndien gah ala; danak dak ndien jaik mbaok taneh kayua meda ngak khat lahik ka dom mac dien tu, njauk caik hatai lac mbuan ndien handok ba tal gaok bala ka manuac.

Ar kraong Dong Nai daok di puk Thường Tân 2, xã Thường Tân, TPHCM daok glut jaleih jaik tal jalan ĐT 746. Ia tagok glong, yaok labik taneh daok ba theik trun kraong, dak harei dak lih tame jalan ĐT 746. Bruk nan rah tabiak meng lavik mai, min dom harei tapa, hajan praong gam ia di danak dak thuy dien Trị An peih tathuak ia ba ar kraong Dong Nai glut jaleih veik. Meyah  bruk glut jaleih  ar kraong Dong Nai daok rah tabiak veik ngak jhak tal jalan ĐT 746.

Jabat Thuế negar Hàn Quốc birau peih bruk pasang duah jabat ngak bruk di Kapol Prince, sa kapol medil lac ngak bruk pagat pakat dunya hu pambuak tal dom kol duis biak jhak. Prince Group padang kong ti  gah taneh riya “ ngak pagat” piah ja ba yaok rituh ribau Won meng urang dalam negar buh jien tame ngak dom danak dak “ ja” di Campuchia. Urang jakar di Han Quoc khan lac rao jien, pacang ka bruk mek jien suan hukum.

Kayua rajaei Mỹ kareik pabah mbang ngak kurang urang ngak bruk pasang iek jalan par di ahaok rilo, hu tal 16% dom mbang par di Mỹ suai damai. Kuhria ta-eng harei 1/11, hu labaih 300 ribau tuai damuai gaok kan kandah. Kayua oh hu jien, rajaei My brei padeih ngak dom bruk  yaok harei, ba tal 750.000 urang jakar lien bang padeih bruk dahlau. Dom jabat duh ka bhap bini yaok harei daok ngak bruk, min urang jakar oh hu bayar jien bilan.  

Klau urang ndik ceik metai saong 8 urang karei daok lahik hadei bala tuyet jaleih tame labik di kapol urang ndik ceik Himalaya di Nepal. Urang ngak praong di taneh ia ini khan lac, kapol urang daok nan ndik ceik Yalung Ri Himal glong 5.630 mét. Oh ka thau dom urang metai saong lahik nan daok negar halei cambaic laic./.