Malam kabroi di Ha Noi, Trung uong Ndoan peih harei pahadar 95 thun harei padang Kapul Dam dara Cong san Ho Chi Minh (26/3/1931-26/3/2026) saong alin yai meyaom Lý Tự Trọng thun 2026 ka 100 urang jakar ndoan naih gheih dalam negar. Ndom meyai di danak dak, Uy vien Mentri Chinh tri, Bi thu Trung uong Ndang, Akaok Mban Tuyen giao saong Dan van Trung uong Trịnh Văn Quyết ndom dalam Nyaom roya mbang ka 14 di Ndang hu brei mboh dom jalan kuhria hu makna peih tabiak tukvak patagok bahrau jaman uak drei patagok di bangsa negar Viet Nam, dalam luac jalan nan Dam dara hu makna saong hu bruk ngak biak praong glaong. Dam dara oh lac kapul patui veik bruk hit kat mang blaoh daok lac kapul ba drei nao dahlau dalam bruk pandar ilamo bahrau ngak po ilamo khoa hoc kong nghe salih bahrau hadah krah salih lek taka so peih mbang ngui saong ba drei tame dunya.

Dom harei ini, di labik padang ngak tatua Đại Ngãi 1 tapa kraong Hậu, di tinh Vĩnh Long, daok sami samar ngak bruk oh padeih. Dom po thau jak ba rilo gah ngak yaok pluh bruk sumu gauk,  yaok rituh  ky su, urang ngak kong hu pagam mac jamraih birau, peih ngak bruk “luac harei melam”, kham merat jhul pasamar tukvak ngak bruk, samar ba tame pandar. Ini lac danak dak jalan mbak hu makna biak praong dalam bruk cak rok patagok bhum taneran kraong Cuu Long. 

Hatai caong pandar ia hacih dalam bruk daok dang di rilo labik palei pala, tapen tasik ban Can Tho dak harei dak jeng bruk njauk hu, rilo meng lac dalam tuk pandiak bhang saong njom ia mbak rah tabiak srau kadau. Dom labik pabak ia oh mek jien daok jeng labik pambak tame dil samu, daong rahra truh tapa tukvak kan kandah. Anak bruk nan, gah ngak nong saong alam langik ban raya Can Tho hu caga rilo halau daong, dak harei dak paglaong, pakajap, peih praong majam pabak ia, caik dahlau bruk ba ia hacih nao tal dom labik kurang ia dui atah.

Tinh Dak Lak birau ba tabiak Hukum khik iek bruk blei, pablei baoh durian dalam tinh piah ngak adat hukum njauk tui darak pasar, khik kein laba di urang pala saong khik kajap angan je yaok “ ti dola” ini. Tui nan, yaok bruk blei, pablei baoh durian dalam tinh brei ngak njauk tui hukum di Viet Nam saong dom harak sanya dunya. Tui nan, brei ngak njauk hukum cambaic laic; khik kein laba ka urang pala saong urang pandar.

Ban raya Ho Chi Minh jhul khang bruk bayar jien oh meng jien mbaok dalam jalan mbak cong cong, kuhria hu ngak salah blaoh di taong abih jalan radaih buyt hu daong yaom anak bilan 6 anak tal, gam haong nan pambuak haong Mastercard piah jhul tagok salih lek taka so. Urak ini ban raya Ho Chi Minh hu peih bruk bayar jien oh meng jien mbaok labaih 120/181 jalan radaih buyt, samu haong labaih 1.900/2.200 radaih. Dom bruk bayar jien hu mbaoh tangin dalam nan hu the gilang pariak, kadung ndien tu, ma QR saong bayar jien oh tapak.

Tui Gah Y te Dunya, ruak lao lac bruk ba tal metai dahlau dalam dom ruak njom mbak, yaom lac meda pacang caga saong jru abih ruak. Kuhria labaih 1/4 bhap bini di dunya hu anek vi khuan lao dalam rup, nyu daok kandang oh thau tamuh ruak tuk halei. Meng chau Au tal chau A, ruak lao daok brei mboh rilo kan kandah patui gauk.

Kongti pasang iek asar siam yava langik Thuy Si IQAir bahrau pathau khan, 130 dalam 143 negar saong bhum taneh hu pasang iek mboh lac oh ngak njauk tanut di nyu ka yava langik di Kapul Y te Dunya (WHO). Tui pathau khan, Pakistan lac negar njom nerak yava langik trak abih dalam dunya di thun 2025, hu nong ndo dhun klik PM2.5 glaong tagok 13 mbang tanut pachreih kakei di WHO. Labik njom nerak ka dua saong ka klau danak gauk lac Bangladesh saong Tajikistan.

Labaih 300 manuac mac hu pakacah meteh marathon robot thaik manuac hu peih ngak mbang ka 2 di Bac Kinh dalam bilan 4 anak tal. Dom robot pakacah hu thaik thaot glong labaih 75 cm. Dalam tuk pakacah, robot  hu pagam mac jamraih  hu pagam kong nghe khong gian - tukvak thong minh hu daong He thong ve tinh định vị Bắc Đẩu, brei thau njauk centimet yaok labik saong payua du lieu labik tui tukvak biak./.