Mentri Pato megru birau khan brei thau du thao Sarak ka bruk oh mek jien tapuk bac pakat pho thong di sang bac dai hoc, sang bac bruk ngak piah duah thau hatai sahaneng caong khin. Bruk oh mek jien tapuk bac hu peih ngak di grauk labik dalam negar meng thun 2029-2030; dom bhum palei brei kuhria kadung jien piah samar peih ngak, brei ka dom bhum palei jiak taphia negar, kaoh pulao, bhum urang bangsa takik saong bhum ceik,  bhum kinh te - xa hoi biak kan kandah.

Meng harei ini, harei 1bilan 4, taong abih angan tai khoan brei njauk haong angan di Can cuoc atau The can cuoc piah paglong bruk khik kandauk yaok mbang meyao meyit.  Lambaok vakil dom gilang pariak khan lac, bruk padeih jitvu nickname oh hagait tal jien saong bruk pandar tai khoan. Urang brei pandar tai khoan meng akaok meti piah meyao meyit, min brei pabak khaw tin taduan jien di dom nen tang piah plaik njiak klaik klaoh hadei tukvak ini.

Dalam jiak 3 bilan tapa, dalam negar hu labaih 25.000 mbang urang ruak tangin takai cambuai, hu 4 urang metai. Njauk caik hatai, gah meraong Negar hu labaih 18.000 mbang. Di rilo sang iek ruak uranaih di bhum palei Meraong negar, uranaih ruak tame iek ruak mboh rilo samar, rilo urang ruak trak. Anak bruk ruak njom mbak, Mentri Y te hu sarak payua samar iew abih dom sang iek ruak brei parabha, taduan urang ruak, jru ruak saong pacang ruak njom mbak trak saong metai.

Bilan thu thun 2025-2026, rilo bhum palei di tinh Ca Mau daok kuhrang ia pandar kayua kraong ribaong thu lagu, njom ia mbak. Anak bruk nan, UBND tinh Ca Mau mbaoh harak brei padang ngak Danak dak pabak ia pandar samar ka bhum palei pala vaktu meng thun 2026 -2030, kuhria tui jien labaih 110 ti dong. Danak dak padang dom labik ba ia di dom bhum kurang ia, tui kuhria pabak ia veik birau ka labaih 6.000 baoh sang rahra.

Tukvak tapa, tinh Dong Thap langyah catang bruk chap mek athur glai, taong mek kaya ia suan hukum, taong phat hanh chinh 63 mbang ngan haong  jien labaih 300 trieu dong, ba tabiak langyah sa urang. Tui ong Nguyễn Phước Thiện - Pho akaok UBND tỉnh Đồng Tháp, bruk khik alam moi truong, khik ramik rilo janih phun kayau, athur raong oh lac bruk ngak chuyen mon bo daok lac bruk ngak hu patagok khang kajap di tinh. Dom bhum palei  brei jhul pakhang pathau khan, jak ba bhap bini juai man patrauk mek athur, pablei salih athur glai.

Tong thong Mỹ khan brei thau bol lin Mỹ brei tabiak truh Iran dalam 2 atau 3 adit tra. Ini lac panuac khan cambiac laic abih meng dahlau mai di Tong thong Donal Trump ka bruk samar padeih mesruh metak dui atah labaih 1 bilan tapa di Trung Dong. Sa bruk brei mboh, ralo bhap bini rahra Mỹ caong khin rajaei samar  padeih bruk meruh metak.

Thai Lan hu labaih 4.700 labik mbuan rah tabiak apui khuah glai dalam harei kabroi. Karja tinh Chiang Mai khan brei thau huyen Samoeng saong Hot lac bhum apui khuah glai. Dom mbang apui khuah glai dui atah saong pambak praong  ngak kan kandah trak tal raidiuk bhap bini. Urak ini, karja bhum palei samar pasang iek khat lahik saong peih bruk daong, pasiam veik bruk ngak mbang di bhap bini di dom labik gaok kan kandah.

Cảnh sát Tây Ban Nha taong tayak sa jalan lubang tapa Maroc pajeng ba ma tuy, cap mek ralo kaya praong tagok tal 17 tấn katak nhựa cần sa. Jalan lubang lac mac jamraih kan kandah hu klau tal. Dalam lubang hu jalan pasei, radaih, ròng rọc gam mac jamraih  hangin…Ngak yau nan, dom kapol pablei salih dauk mbuan pajeng ba  dom matuy praong meng gilang Maroc tapa Tây Ban Nha bo oh thei thau./.