UB Bhap bini tinh Dong Nai birau ba tabiak brei bayar drap ar karja, jao jabat klak ka UBND phuong Binh Phuoc ka Sang bac Dai hoc Dong Nai piah ngak jeng Labik pato pakai ka 2. Ini lac bruk ngak suai lavik piah rik tame pato pakai brei tabiak urang ngak bruk naih joi ka gah Barak tinh (Binh Phuoc dahlau). Tui bruk ba tabiak, Sang bac Dai hoc Dong Nai taduan taong abih taneh  gam sang danaok, drap ar gam jabat ngak bruk klak di phuong Binh Phuoc. Dom jabat jao brei hu: Jabat Dang uy, UBND, Uy ban MTTQ Viet Nam saong Pasak Bac chinh tri di phuong.

UBND xã Long Hải ( Ba Ria - Vung Tau dahlau), TP.HCM khan brei thau, Le hoi Dinh Cô thun 2026 hu rilo adat ngak bruk, kadha ma-in bhap bin peih ngak dalam 4 harei meng harei 27 tal harei 30/3, lac meng harei 9 bilan 2 tal harei 12/2 tui saka ia bulan). Riya roya Dinh Cô Long Hải lac bruk ngak adat cambat meng lavik mai di bhap bini urang nao ngak mbang di tathik Long Hải, hu meng puac abap XVIII saong ndam gam haong bruk peih taneh, padang palei tapen tathik.

Sang iek ruak Meta Tay Nguyen, tinh Dak Lak, ba mac jamraih VisuMax 800 tame pandar iek dom ruak meta. Ini lac kong nghe daong blaic raic hu pagam AI daok hu pambak praong di dunya saong di dom ban raya di Viet Nam; min mbang akok meti hu pandar di bhum Tay Nguyen. Bac si Trần Đình Tuấn, Yam ndoc Sang iek ruak Meta Tây Nguyên khan brei thau jamraih ini daong taong ruak bang meta saong loan thi ala 10 giây  sa gah meta, ye biak lagaih  haong dom ayut.

UBND tinh Lam Dong pambuak haong so, dom gah, bhum palei saong doanh nghiep yulit padang kapol pasang iek kaya kan, pambuak bruk cakrok patagok yulit di bhum Phu Quy saong dom labik yulit tapen tathik di tinh. Ong Đinh Văn Tuấn, Pho Akok UBND tỉnh Lâm Đồng khan lac, bruk pasang iek piah pambuak dom doanh nghiep yulit, padang ngak  kaya kan yulit tathik, rik tame patagok yulit di kaoh pulao Phú Qúy jang yau tinh Lam Dong tui jalan patagok hijao khang kajap.

Gam haong dom bhum palei dalam negar, labaih 6.000 bhap bini di TPHCM hu mbaok tame Harei nduac pakacah Olympic Khik karo kajap taong abih rahra - Daong khik salamat Taneh ia thun 2026. Hadei peih pakak, dom urang pakacah nduac tui dua jalan 2km saong 5km, nduac meng Bein bingu 30/4, tapa dom pasak. Danak dak  rik tame ngak brei chreih chrai, pambak bruk pasram rup pabhap bhap bini, pamong tal bruk pahadar 80 thun Harei padang The duc the thao Viet Nam.   

Cuba kham merat pasiam pambuak veik dien di harei kabroi hadei ndien di negar  ini  klaik klaoh mbang ka 2 dalam oh ka bak sa adit, tuk taneh ia kaoh pulao ini dang anak bruk kan kandah kayua pakauk  pajeng menyek  di My. Bruk nan rah tabiak ba tui rilo bruk karei lahik ndien di 10 trieu bhap bini dalam negar. Mentri Nang luong saong Menyek Cuba brei thau, dom jamraih dien sit, pambuak payeng hu padang di taong abih tinh poah pasiam veik dien ka dom jit vu.

Philippines brei adat pandar anak meta saong brei takik pandar  dom menyek lap jang min takik ngak njom nerak jang piah ginup pandar, dalam tuk duah jalan pacang caga bruk kan kandah kayua Trung Dong. Adat  dahlau, yaok ribau urang peih radaih jeepney trun jalan dalam negar piah cagar veik bruk tagok yaom menyek diesel dalam negar dua mbang hadei yaom menyek tagok glong kayua meriak gauk di Trung Dong.

Hadei rilo mbang brei padeih  ngak bruk piah pasang iek khut gah ky thuat jamraih khan brei thau di sang mac dien hat nhan praong abih di dunya, dom urang ilamo Nhat Ban duah tabiak bruk nan. Kashiwazaki-Kariwa lac sang mac dien hat nhan praong di dunya kayua TEPCO peih ngak. Sang mac daok atah ban ine Tokyo 220km gah Tây Bắc saong lac sa dalam 54 ging phan ung kareik pabah mbang hadei rah tabiak bala di sang mac dien hat nhan Fukushima Daiichi di bilan 3 thun 2011.