Rajaei bahrau hu bruk mbaoh sarak brei mesraiy jien ngan haong urang hadei abih mahu pandar jru phil. Tui nan urang hadei abih mahu pandar jru phil meng ginup umo 12 thun ba tagok hu salah blaoh bruk ngak abih mahu pandar jru phil hu mesraiy phun jien meng Gilang pariak tui Sarak rahra piah ba drei tame pato pakai bruk ngak pakat gap mbiah, pato pakai mala 3 bilan. Dom labik ngak mbang pablei salih meda pandar urang ngak bruk lac urang hadei abih mahu pandar jru phil jeng hu mesraiy phun jien tagok tal 200 trieu dong.

Uy ban MTTQ Viet Nam tinh Tay Ninh birau peih Nyaom biai taom mbaok cu tri haong dom urang lambaok vakil HĐ bhap bini vaktu 2026-2031 di xã Thuận Mỹ, huyện Châu Thành, tỉnh Long An klak). Di var taom mbaok, rilo cu tri xã Thuận Mỹ  brei thau pataom tame dom jalan langyah tani tanat bruk pablei baoh thanh long saong hadang nan lac dua kaya praong di bhum palei; buh jien tame, paglong dom jalan mbak nao mai dalam bhum palei khut tayak; langyah catang dom bruk meblak taneh riya; tui nan hu sarak pachreih doanh nghiep buh jien tame ngak bruk ka bhap bini.

Di var taom gaok urang buh phieu di labik palih ruah ka 1 dac khu Thổ Châu di tinh An Giang, dom urang buh phieu ba tagok panuac caong khin lac brei aval drah ngak jalan peih samar nduac tapak meng Thổ Châu tal phuong Rạch Giá piah brei kein lagaih ka bruk nao mai, pablei salih. Gam haong nan roh duah pabak dom sarak hu pambuak tal bruk bayar jien bao hiem y te piah rahra hu pandar rilo jitvu y te jang. Langiu bruk ba tagok panuac caong khin padang sang bac THPT, urang buh phieu samar drah caga radaih pataom mek hareik harom piah khik kajap bruk khik hacih sa-at alam langik.

Kong an  tinh Lam Dong daok pakajap ho so piah langyah 2 urang ba khaw tin suan ka bruk buh phieu palih ruah urang ka Quoc hoi mbang XVI saong urang HĐ bhap bini dom pakat vaktu 2026 -2031. Dom urang nan taduan lac pandar Facebook angan drei tame dom kapol nyaom ba kadha tagok ndem jhak bruk palih ruah bau cu. Dua urang kayua kurang sahaneng, oh duah thau khaw tin dahlau tuk ba tagok mang xa hoi.

Meng bilan 12/2025 tal ini, Kong an ban raya Ho Chi Minh hu taong bhat jaik 600 bruk ngak suan hukum salamat jalan pasei. Tukvak anak tal, kapul kong an Ban raya patui veik pambuak khang, langyah tani tanat dom bruk ngak suan, daong khik kajap abih ka danak dak jalan pasei dalam bhum. Taphia nan, jabat brei tabiak bruk kuhria brei pagam majam camera pasang iek di dom canah jalan radaih saong jalan pasei hu radaih nao mai rilo saong bhian rah tabiak bruk peih nduac suan.

Rajaei Malaysia khan brei thau sarak angan urang umo ala 16 thun oh brei pei tai khian mang xa hoi, min hu pandar tai khoan kayua amaik ame atau urang raong ba khik iek peih brei. Rajaei Malaysia urak ini daok pambuak haong internet peih gak iek rilo piah duah thau saong pacang urang umo ala 16 thun peih tai khoan mang xa hoi.

Dahlau dom bruk rah tabiak srau kadau di tasik Hormuz ngak kan kandah tal majam pabak menyek dalam dunya, Akaok Mentri Nang luong Thai Lan brei mboh Thai Lan hu srap gap dom kadha kuhria pacang caga samar chip piah khik kajap oh rah tabiak bruk kurang xang menyek dalam negar. Dalam bruk kurang trak, Thai Lan brei patagok bruk srau menyek diesel sinh hoc saong blei tame xang menyek tinh chế, gam haong nan meda hu anak meta taoh talaih tanut khí tathuak nerak piah caik dahlau ka bruk pabak.

Sa kapol hu 24 tieu bang di Mỹ payua harak yak karja Tong thong Donald Trump dalam mbang yak bak akaok meti piah  cagar veik jien je di dunya 10% birau hu pandar ngan haong kaya pablei tabiak negar langiu. Hukum harei 20/2 di Tong thong Trump kak jien je 10%  ngan haong kaya pablei tabiak negar langiu. Yau nan min, Akok mentri Jien padai Mỹ khan lac jien je ini tagok tal 15% dalam tukvak anak tal./.