Page ini 28/2, mikva urang Cam Bani Aval daok di tinh Ninh Thuan saong Binh Thuan payak da-a mukkei harei ka 3, biar harei ini, dom halau janeng ong acar, katip, imem, po gru Bani tame sang megik bilan iek Ramưwan. Dahlau di nan, mikva hu nao ghur rak. Sa dalam dom adat akaok bilan Ramưwan. Var ini, urang ngak praong di HĐ bhap bini, UB bhap bini, UBMT Negar Viet Nam 2 tinh Ninh Thuan, Binh Thuan saong dom gah, kapol nyaom hu mai rivang, alin pandap ka dom sang megik, dom halau janeng Bani. Ong Car Bình daok di palei Bình Minh, xã Phan Hòa, huyen Bac Binh, tinh Binh Thuan khan lac: “Mukei thun ini, langik tasik lagaih. Mikva nao ghur mek harei bleik patau, njauk adat tuh ia mu, ia kruac blaoh mek hareik. Pambang mukkei blaoh tame bilan eik Ramưwan”.

Di tinh An Giang, 28 baoh sang megik saong Surao jumma-ah di urang Islam daok tame Bilan eik Ramadan tui saka Islam 1446 - Saka ia harei 2025. Ini lac bruk hu makna praong di urang Islam. Jaik tame bilan Ramadan, ong Haji Jacky, Akok Ban Đại diện Cong dong Islam tinh An Giang brei panuac thau dhar phol tal urang Đảng, Karja, Rajaei saong tinh hu caik hatai sangka tal urang Cam Islam, tuk halei jeng iek daong  bhap bini rahra hu lagaih yam tagok dalam raidiuk, dak padang baoh sang trei sir, haniem phol, patagok bhap bini khang kajap.

Tinh Kien Giang tuk halei jeng sangka ngak siam tui dom sarak daong patagok kinh te - xa hoi bhum urang bangsa Khmer. Urak ini taong abih xã bhum urang bangsa takik hu jalan mbak dalam palei nao mai lagaih, 90% baoh sang urang Khmer hu ia pandar hacih sa-at. Yaok thun, tinh ba mbuan lagaih  ka yaok ribau urang Khmer hu bac bruk ngak, duah hu bruk ngak. Tinh daok peih ngak rilo danak dak piah daong sang daok, taneh daok, jien buh tame ngak jalan mbak hatang, ba mbuan lagaih ka bhap bini ngak mbang cak rok patagok.

Urang ngak nong huyen Trần Văn Thời, tỉnh Cà Mau daok chreih chrai kayua bilan pala njam patam pala di taneh hamu padai paik hu rilo.Bruk ngak nan hu pachreih pambak praong kayua patagok jien mek tame saong patak pataom hu ia. Jabat Ngak nong huyen Trần Văn Thời pachreih urang ngak nong juai ngak padai 3 mbang dalam sa thun, salih tame nan pala njam patam piah patagok jien mek tame. Urak ini labik pataba ia mbak  Trần Văn Thời hu labaih 700 ha taneh pala njam patam di hamu, pagol sanya paik njam patam pablei hu ralo jien saong caga hu ia pruh.

Anak bruk ia mbak njom tame saong kuhrang ia taba di bilan thu, urang nong bangsa Khmer di tinh Soc Trang daok salih tapa pala samekai di hamu padai. Bruk ngak nan  ba mai kein laba glong, jien laba  duah hu meng 10 tal 20 trieu dong yaok kong taneh, glong jang rilo mbang dut saong padai. Bruk pala samekai oh lac tok daong ka urang ngak nong lagaih haong langik salih karei bo daok pambak praong tabika rilo labik karei dalam tinh Soc Trang, brei mboh kein laba jeng yau raidiuk siam mekre.

Jaik tame bilan Ramadan di urang Islam, Tổng thư ký Liên Hợp Quốc Antonio Guterres payua panuac ndem ka bruk sron mbon salamad saong iek praong gauk. Tui urang ngak praong LHQ, bilan Ramadan brei mboh hatung hatai gheih ghang, thau anit ka urang karei saong suak yakat. Ini lac piah pambuak baoh sang saong gauk dalam bhap bini rahra, thau sahaneng klah rabha haong urang takik hu patuah jamo yau drei. Thun ini, tame bilan eik Ramadan meng harei 1 bilan 3 di Ai Cap saong jaik abih dom taneh ia Arap.

 Urang ngak praong di Trieu Tien Kim Jong Un tui iek bruk cuh ten lửa di harei 26 bilan 2 saong khan lac meda taong meng hat nhan. Dalam rilo thun tapa, Trieu Tien hu tui ngak brei patagok bruk ngak tabiak ten lua hanh trinh chien luoc, hu pagam akaok siu hat nhan. Janih ten lua nan oh pakauk tui dom sarak di Hoi dong Bao an Lien Hop quoc.

Rajaei Mỹ urak ini daok kuhria caga buh tabiak 1 ty dola piah pabak bruk yaom baoh manuk tagok glong, piah blei baoh manuk tame meng negar langiu, caga jit manuk ada, daong urang ngak nong gaok kan kandah saong roh duah dom janih vaccine birau pacang caga ruak kum manuk ada. Kum manuk ada ngak trak damah  tal dom var raong di Mỹ sang ba tal yaom baoh manuk tagok 53% dalam sa thun tapa. Rilo kuan pablei pandap saong sieu thi di My ba tabiak adat yaok urang hu blei dom baoh manuk./.