Pamaong tal Nyaom roya lambaok vakil dalam negar mbang ka XIV di Ndang, Viện Phim Viet Nam peih Danak dak peih dom phim Dien anh Katmang naih gheih. Danak dak daong pamedeih dom bruk naih gheih di luac jalan mesuh metak rambah rambup di bangsa negar Viet Nam dalam bruk peih paha, yasa taneh ia. Gam haong nan brei mboh labik dang, bruk hu makna di dien anh dalam bruk pathau khan ilamo di Ndang, daong ngak siam lagaih dom jalan di Ndang ka bruk padang saong patagok ilamo, menuac urang Viet Nam dalam jaman bahrau.

Jalan tapuk TPHCM birau hu sa bruk ngak birau lac Harei roya Tapuk saong ilamo melam. Harei roya pabak bruk ma-in sambai, duah thau ilamo di bhap bini ban raya tuk melam mai. Ong Lê Hoàng, Yam ndoc Jalan tapuk TPHCM, klak rabha, mong iek veik bur ngak tapa 10 thun blaoh, Jalan tapuk lac bruk kham merat di urang ngak praong di Ban raya HCM dalam bruk peih ngak labik ilamo bac tapuk duh ka bruk cakrok patagok di gah ngak tabiak tapuk saong lac labik piah bac, piah iek ilamo, jalan sahaneng di bhap bini ban raya.

Tui So Ilamo, Pahat padhih saong Jirah rivang ban raya Can Tho, dom labik, bein jirah rivang saong jitvu daong…dalam ban raya hi brei bruk ngak la labaih 16 ribau urang ngak bruk, dom urang ngak bruk hu tapa patao pakai hu labaih 70%. Ban raya Can Tho hu labaih 110 labik, dom labik jirah rivang; labaih 860 labik daok pandaok hu labaih 14.500 bilik. Thun 2025, jirah rivang Can Tho raok labaih 11 mbang tuai damuai, tagok 18% dut saong thun 2024, dalam nan tuai damuai mai daok veik hu jaik 5 trieu mbang.

Kapol FPT birau alin dom harak tai lieu nhan tao AI hu ngak jeng video ka jaik 900 anek saih di sang bac THCS Lê Hồng Phong saong  THPT Võ Thị Sáu, dac khu Côn Đảo, TPHCM. Bruk peih ngak danak dak ba harak tai lieu AI tal anek saih di dom bhum atah bayah, bhum ceik car, taphia negar saong kaoh pulao, bhian dui jaik gauk veik  ilamo saong paglong prein khang pandar taka so di urang dam dara. Ini lac ilamo hadah krah pamong tal bruk brei ka bhap bini di bhum ASEAN dom ilamo saong thau pandar kong nghe tri tue nhan tao.

Di tasik Mỹ Hòa, tinh Khanh Hoa bahrau peih tabiak Pakacah par kalang tachak angaok tasik pakat dunya, dui pachreih labaih 200 urang van dong vien dalam negar saong dunya. Hu angan “Kalang Mỹ Hòa – Uak tagok tasik hijao”, danak dak pamaong tal bruk pandar siam dom kein lagaih jirah rivang, pahat padhih tasik, gam haong nan yaoh khan thaik thaot Khanh Hoa lac labik mai jirah rivang chreih chrai, salamat saong siam mekre. Meng hu angin lagaih luac thun saong tasik jeng lagaih, Mỹ Hòa hu taong yaom lac labik njauk piah peih padang dom mbang pakacah par kalang tachak angaok tasik pakat dunya.

Kapol alat ragam likei K-pop BTS birau khan brei thau brei parang iek daoh tamia di bilan 4 anak tal saong dui atah tal bilan 7 ngan haong 79 var parang iek  di chau A, My saong chau Au. BTS brei padeih bruk ngak dalam tukvak 7 urang nao ngak bol lin tui hukum. Jabat khik iek khan lac dom urang alat ragam nan brei tabiak album birau di harei 20/3 anak tal, yaom lac album oh ka brei thau. Album birau abih di kapol urang daoh hu ba tabiak di thun 2022, pachreih hu jaik 17 ti dong.

Sa drei asaih kaya me-in hu pabah njauk jhik cagar meng klao jeng caok hia hu danei angan di dalam mang xa hoi Trung Quoc saong jeng sa kaya pablei nduac katuak di Nghĩa Ô, labik pablei rilo kaya ngak inem krung di tinh Chiết Giang, gah Par negar ini. Urang dalam mang brei angan la janih kaya me-in ini lac “Asaih caok hia”. Tui dom urang nan, pabah pablait trun saong mbaok meta “suhsah min maong anit ranam” di nyu gam tathrok klao gam ngak ka drei mboh la-i la-an tung tian.

Oh lac langik la-ar trun 8 do C, dom urang dalam Kalup kapol caluai ia bilan la-ar Berlin Seals glam drei trun binek ia Orankesee, di ban ien Berlin, piah hu tame caluai ia di bilan la-ar. Thun ini, brei mboh 40 thun peih bruk “ menei la-ar” di kalup kapol Berlin Seals. Dom urang di kalup kapol hu umo meng 12 thun tagok tal jaik 90 thun, caluai ia yaok hadei adit. Rilo urang hu mbaok tame bruk ini hu meng dom pluh 10 thun./.