Tui Mentri Y te, yaok thun hu labaih 200.000 urang Viet Nam metai kayua ruak baoh hatai, meblah labaih 33% dalam abih tih dom urang metai. Tui GS.TS.BS. Phạm Mạnh Hùng, Pho Akok Kapol Tim mạch học Việt Nam, urang ruak tim mach mbuan ba tal bien chung ralo jang dut haong urang khang kajap karei tuk njom dom janih ruak yau kum, COVID-19, ruak barah phoi kayua phe cau saong njom ruak jalan suan yawa…Yau nan ye, klauk jru caga ruak lac dom jalan meda daong pacang caga njom ruak, pambak truak ka urang ruak tim mach.

Tay Nguyen daok tame bilan tabung glong paik caphe - phun pala ralo di taneh praong jaik 640 ribau hecta. Thun ini, caphe brei hu rilo asar baoh, pablei hu jien ralo saong oh tagok glong min hu jien, urang pala caphe biak chreih chrai. Tui Vien Ilamo Ky thuat Ngak nong pala glai Tay Nguyen langik lagaih phun caphe tamuh siam,  brei rilo baoh asar siam bingi, tui kuhria mboh rilo jang thun 2024. Caphe pablei mek jien tame hu tani tanat, daong ka urang ngak nong mek hu kein laba 300 trieu dong sa hecta. 

Tukvak jaik ini, di rilo bein pala durian di tinh Dong Thap tamuh ruak karei ngak caduk, dhar phun durian thu lagu saong metai samar. Urak ini, tui kuhria khat lahik kayua ruak palai pajua kayua ruak ini. Dahlau di nan, tinh kakei bhap bini bhian rivang iek bein piah samar thau ruak saong samar cakak dhar hala la-iu, metai hadei di nan cuh klak. Tui nan, khan brei karja bhum palei jaik abih hu thau piah tacei pato pandar jru ruak birao luh tagok akaok, gam pruh jru di dhar cakak, pacang bimao njom tapa dhar phun karei.

Ong Dư Thái Bình, Pho Yam ndoc Công ty TNHH Dư Thái Bình di xã Năm Căn, tỉnh Cà Mau lac po raong aring mek hu yai Nhat pakacah “ Padang pakat glong” aring Ca Mau, alin “ patao aring Ca Mau” ka Phan vien Roh duah Thuy san Nam Song Hau daok khik harak, daong tame yaih khan angan Aring Ca Mau. Aring  nan praong trak labaih 1,82 kilo, bong aring praong jaik 20cm hu klauk jru formol, piah khik hu tamo.

Piah caga ribuk ka 15 meda ngak kan kandah tal bhum Nam Bo dalam dom harei anak tal, So Ngak nong saong Moi truong Ban raya HCM, iew Kong ti TNHH mot thanh vien Khik ba tame pandar Danak dak ribaong kraong bhum gah Meraong negar brei kuhria peih tathuak ia binek Dau Tieng, njauk tui iek tani tanat; bhian khan brei thau, hu dom jalan pacang caga piah plaik njiak takik khat lahik.

Tui kuhria birau abih, urang metai saong lahik dalam mbang apui khuah chung cu di Hồng Công (Trung Quốc) daok rilo veik, takik abih 36 urang metai, 279 urang lahik saong 29 urang ba tame sang iek ruak, dalam nan hu 7 urang ruak trak. Apui khuah  di sang chung cu glong Wang Fuk Court di Tai Po. Dom urang jakar  khan brei thau  ka apui khuah di quận Tai Po tagok pakat 5 lac pakat glong abih di apui khuah pak Hồng Công. Canh sat saong bol lin daong padam khuah pasang iek, duah thau ngak brei cambaic laic.

Hajan praong dui atah  ngak ia dauk biak dalam di ralo labik di Đông Nam Á, ba tal yaok pluh ribau urang panduan nao labik karei saong metai di rilo taneh ia. Di Malaysia yaok ribau urang brei panduan ba nao labik karei tuk ia sua rilo labik daok di bhap bini. Hajan ribuk rah tabiak di Thai Lan, hu 33 urang metai. Dalam tuk nan, di Indonesia hajan praong ngak ia dauk saong glut jaleih ba tal 13 urang metai dalam adit ini.

Dalam thun 2024, hu labaih 50.000 urang kumei, uranaih di dunya ( yaok 10 minit hu sa urang, sumu 137 urang yaok harei) gaok pametai ka ayut cuai atau urang dalam sang pametai. Tui Jabat LHQ pacang caga Matuy saong Toi pham saong Jabat Urang kumei LHQ, bruk pametai urang kumei yaok pluh ribau yaok thun. Dom urang ilamo mboh lac bruk oh tani tanat kinh te, taong paoh, panduan ba nao labik karei saong tatik hu blei sang daok salamat ba tal dak harei dak mbuan gaok bala taong paoh pametai urang kumei./.