# Phaok Thủ tướng Nguyễn Xuân Phúc bahrau hu panuac kết luận saong tacei pato hadei di Nyaom biai ka bruk di cư tự do, grap tanat labik daok ka bhap bani di dom  tỉnh bhum Tây Bắc saong Tây Nguyên. Phaok Thủ tướng caong khin Ủy ban bhap bani dom tỉnh bhum Tây Bắc, Tây Nguyên dalam thun 2014 pataom tame pasang iek veik dom baoh sang di cư tự do oh ka hu rami ramik tani tanat, dahlau di abih nan lac 10.000 baoh sang daok ngak pah, oh hu taneh pala drak di dom tỉnh Đắk Nông, Đắk Lắk saong Gia Lai piah hu jalan langyah kan kandah, suh sah di bhap bani ka bruk iek glang pren yava, bac megru. Pasang iek veik quy hoạch taneh riya, rami ramik labik daok ka bhap bani; pakauk oh brei pablei salih taneh ngan haong mblang taneh hu karja daong brei ka urang kathaot, bhap bani urang bangsa takik.

# Dalam sa bilan ini mai, di tinh Dak Lak rah tabiak 14 mbang radaih thaok gauk , ngak brei 14 urang metai, 8 urang njauk rambuac. Dut saong tukvak ini thun dahlau, bala angaok jalan mbak di Dak Lak trun 10 urang metai, 11 mbang bala saong 14 urang njauk rambuac. Ngan saong kadha Thun Salamat nagaok jalan mbak  negar 2014 nan lac “Khik catang bruk ngak mbang gah pajeng ba di radaih saong pasang iek radaih pajeng trak”, dom pakat chức năng tỉnh Dak Lak hu patagok bruk pasang iek, pataom tame taong phạt dom bruk pajeng ba biak rilo manuac tapa tanut ba tabiak, radaih pajeng rilo jang piah takik bruk radaih thaok gauk angaok jalan dalam tỉnh..

# Kapul pasang iek Hội đồng Bangsa Quốc hội kayua ong Danh Út, Phaoak Akaok Hội đồng dang akaok kapul bahrau hu van ngak bruk haong Ủy ban bhap bani tỉnh Ninh Thuận ka bruk peih ngak sarak, hukum dalam bruk pato pakai, pandar urang jakar, công chức, viên chức urang bangsa takik. Taong abih urang jakar công chức, viên chức pakat tỉnh, huyện urang bangsa takik dalam tỉnh kuhria tal puac thun 2013 hu labaih 2.620 urang. Chất lượng kapul urang jakar, công chức, viên chức urang bangsa takik dom pakat dak harei dak siam jang, daong ngak brei jayak bruk chính trị di puk palei. 

# Kapul Chữ thập đỏ huyện pambuak saong Jabat lambaok Tầm nhìn dunya huyen Bac Binh, tỉnh Binh Thuan birau peih bruk sơ cấp cứu saong pacang caga ribuk ia sua thun 2014 di palei An Thạnh, xã Bình An nan lac labik hu ralo urang bangsa takik. Tame pasram hu 70 baoh sang palei An Thạnh saong 40 dam dara xung kich di 7 xã dalam Danak dak patagok bhum Bình Tân, Sông Lũy, Sông Bình, ban sit Lương Sơn, Phan Tiến, Bình An, Phan Điền. Kadha pasram pataom tame bruk tacei pato pacang caga ribuk, dauh daong urang njauk bala, dom  bruk daong sơ cấp cứu chip, pandaun ba bhap bini plaik njiak ia ribuk nao labik hu salamat.

# Dalam 2 harei 19 saong 20-8, dom gah dalam nan hu Bộ Chỉ huy quân sự tỉnh Đồng Nai, Sở Lao động - thương binh saong xã hội, bol lin tăng cường di Quân khu 7 hu peih bruk kuac rok lubang dhar dom liệt sĩ ndih trun di labik Bein Điều (xã Long Thọ, huyện Nhơn Trạch) di thun 1967. Akaok mereip, duah mboh hu  jaik 70 kadung talang liệt sĩ gam haong dom janih pandap yau dép râu, yuen, bình đông piah caik ia menyum… Kayua meng tuk jaleih trun tal ini biak livik, talang liệt sĩ tuk kuac rok tagok oh daok tamo, rilo meng phui bruk abih. Dalam dom harei anak tal, bruk duah talang liệt sĩ pak labik Bein Điều meda patui veik. Dom talang meda hu ba tame dar di Nghĩa trang liệt sĩ huyện Nhơn Trạch, hadei di tuk  salah blaoh bruk roh duah saong pataom mek. 

# Viện Pasteur ban raya Hồ Chí Minh pambuak saong Sở y tế ban raya birau brei pasang iek bruk brei daok karei, pasang iek ngan saong dom urang medil lac njom Ebola dalm bhap bini. Di pasak y tế caga ruak quận Thủ Đức saong quận 9. Viện Pasteur saong Sở y tế ban raya hu pang jalan langyah tuk hu urang njom virut Ebola dalam bhap bini jeng yau dom tavak tavaiy , dom panuac caong di dom urang y tế.

# Urak ini tỉnh Trà Vinh daok pataom tame ngak pasiam 5 labik ar pacang atah abih tih labaih 2.600 m; ngak bahrau 2 ar atah jaik 1.800m; saong pasiam veik 2 ar atah 2.400m. Taong abih phun jien peih ngak labaih 2 tỷ đồng. Langiu 9 ar pacang ini, tỉnh jeng daok ngak jaik salah blaoh ar pacang labik An Phú Tân – Tam Ngãi atah 3.200m, taong abih phun jien buh tame 1,6 tỷ đồng khik caga ka labaih 3.000 ha phun mbang baoh dalam tỉnh. Ong Trần Văn Thành, daok pak xã Tam Ngãi, huyện Cầu Kè – hu sang daok di labik hu ia ndik tuh mai brei thau:

(Băng: Karja oh ka ngak ar pacang ini adei sa-ai khaol dahlak rambah ralo, mbang ndih oh bingi, aia tapa ar, ai hluh nduac.  Urak ini karja ngak ar pacang ini khaol dahlak mboh biak siam, oh daok kuhria huac hagait tra”.) 

Khaw tin dunya:   

# Mentri An Ninh negar Lào brei thau, 6 bilan akaok thun, dom gah chức năng di Lào chap mek hu labaih 400 mbang pabeli salih matuy, chap mek hu labaih 22 ribau asar jru kich thich, labaih 18 kilogam heroin, 32 kg jru phien saong 1 ribau 200 kilogam cần sa. Langiu di nan, 6 bilan tapa, dom gah chức năng di Lào jeng hu ramik pasiam 12 pasak cakak jru phien di negar, cakak jru phien saong pato bruk ngak ka 65 ribau urang pandar matuy. 

# Bol lin Inđônêsia bahrau ba  tabiak 30 ribau lin daong ka gah cảnh sát khik caga an ninh labik Tòa án Hiến pháp, labik bo harei (21-8) hu tabiak panuac brei thau ka bruk yak kết quả bầu cử Tổng thống. Urang tabiak panuac di bol lin pal phao krong Inđônêsia brei thau, jabat ini daok caga nao khik kajap bruk an ninh dalam negar, dalam saong hadei di tuk hu  kết quả xét xử hu brei thau. Dalam tuk nan, Tổng thống urak ini di  Inđônêsia, ong Dút-hô-y-ô-nô (Bambang Yudhoyono) hu panuac ieu dom urang ủng hộ  2 ứng cử viên Tổng thống taduan tui panuac ba tabiak di  Tòa án Hiến pháp di harei 21/8.

# Bruk sraw kadau mboh oh ka padeih di ban Phơ-gu-sơn (Ferguson), bang Mít-xu-ri (Missouri) negar Mỹ dalam harei 20 bilan 8. Labik ini jeng daok mboh bruk taong gauk di dom urang trun jalan saong cảnh sát hadei di bruk sa urang likei kalik njuk metai kayau cảnh sát  cuk di harei 9 bilan8.  Dom urang ngak praong di ban nan brei thau, cảnh sát pacang sraw kadau hu  pandar hơi cay saong baoh patuh ngak having akaok piah  giải tán manuac pataom gauk rilo hadei tuk urang trun jaln glam patau, glam klaok saong bom xăng tame cảnh sát. Karja ban Phơ-gu-sơn hu tabiak panuac iew dom urang trun jalan brei ladam trun./.