# Phaok thủ tướng Vũ Văn Ninh bahrau mbaoh tangin tame harak Quyết định brei pabak phun jien blei asar pajaih pabak tame gilang khik piah di negar. Cambaih laih nan lac, pabak 149 tỷ đồng meng jien khik caga di kadung jien Trung ương thun 2014 ka Mentri ngak nong saong patagok palei pala piah blei pabak 4.040 tấn asar pajaih padai, 353 tấn asal pajaih tangeiy saong 110 tấn asal pajaih njam patam tame khik piah di negar. Phaok thủ tướng tacei lac bruk khik ramik saong pandar phun jien nan brei ngak njauk tui adat hukum.

# Tui Mban tacei jalan Tây Nguyên, dom tỉnh Kon Tum, Gia Lai, Đắk Lắk, Đắk Nông, Lâm Đồng buh jien padai tame padang ngak birau, pasiam veik yaok ribau dut bilik bac, kik kapal saong brei dom bo tapuk, katap, kalam ka anek saih bangsa takik, anek di baoh sang dalam sarak karja, piah pabak ka bruk bac da-a di bhap bini dalam thun bac birau 2014 -2015. Tui kuhia, dom tỉnh Tây Nguyên urak ini hu labaih 6.271 sang bac dom pakat, ngan saong 97.409 duk bilik bac, brei ka labaih 1,4 triệu anek saih dom pakat phổ thông, dalam nan anek saih bangsa takik meblah labaih 32%.

# Kuharia tal urak ini, Kapul urang nong huyện Ia Grai,tỉnh GiaLai hu pambuak bruk haong Phòng Giao dịch Gilang pariak sarak kajar hu daong palagaih ka 2.900 baoh sang urang nong mesre jien patagok bruk ngak mbang pala drak ngan haong yaom phun jien brei mesre abih tih labaih 43 tỷ đồng. Kapul bhian pambuak bruk haong Phòng Giao dịch pasang mong bruk khik ramik saong pandar phun jien mesre di 11 tổ dalam dom xã Ia Grăng, Ia Hrung, Ia Dêr, Ia Pếch.

# Harei 22/8, 257 anek saih sang kan kathaot, bangsa Khmer yam tapa kan kandah bac da-a naih joi di dom sang bac THPT di tỉnh Sóc Trăng hu Kapul Pachreih bac tỉnh peih bruk jao brei paok jien bac “Lương Định Của” thun 2014 akaok thun bac birau. Tui nan, yaok adei hu taduan paok jien bac yaom 1 trieu 5 rituh ribau đồng. Paok jien bac kayua công ty Xổ số Kiến thiết Sóc Trăng, Gilang pariak Patagok sang Bhum taneran kraong Cửu Long dhar Sóc Trăng saong Doanh nghiep tư nhân Hua daong jien.  Ini lac bruk hu Kapul pachreih bac tỉnh Sóc Trăng peih ngak yaok thun, piah pachreih dom saih bac yam tapa kan kandah bac megru naih joi patagok dom caong khin di drei, harei hadei hu jeng urang siam, rik daong ka palei negar.

# Meng akaok thun tal ini, dalam tỉnh Bạc Liêu hu labaih 7.000 baoh sang kathaot hu daong brei ngan haong yaom jien labaih 20 tỷ đồng. Patui veik ngak siam bruk patrun kathaot, dom ngành, dom puk palei pak Bạc Liêu meda ba tabiak tiêu chí patrun kathaot saong tanut taong yaom pakacah tổ chức cơ sở đảng hacih sa-at, khang kajap saong lac tiêu chí ngak siam bruk ngak di yaok urang jakar, urang đảng. Tapa nan, pamedeih tagok tinh thần trách nhiệm saong peih ngak hu siam jang bruk ngak ini, ba bruk patruh eik patrun kathaot hu tame dalam saong khang kajap.

# Dalam 5 thun anak tal ( 2015 -2019), tỉnh Kiên Giang hu jalan buh tame 178 tỷ đồng piah pato bruk ngak, dalam nan Trung ương hu daong labaih 10 tỷ đồng sa thun, daok veik meng kadung jien karja tỉnh. Tui Sở Lao động Thương binh saong Xa hoi tỉnh Kiên Giang, pato bruk ngak pambuak saong quy hoạch bruk ngak nong, cong nghiep, dich vu - dulich saong padang ngak palei pala birau di tỉnh tal thun 2020. Dahlau di abih, pato bruk ngak piah tame ngak bruk ka dom khu, cụm cong nghiep, khu dulich di tỉnh, rik tame trun kan kathaot khang kajap, salih birau raidiuk urang ngak kong.

# Tui kuhria mboh di gah y tế tỉnh Hậu Giang, meng akaok thun tal ini hu labaih 100 urang pandiak tabiak darah, saong labaih 560 urang njauk ruak tangin takai cambuai; ruak pandiak tamuh mban jaik 300 urang, hu labaih 30 urang  dương tính haong ruak sởi. Anak bruk yau nan, Pasak Y tế dự phòng tỉnh Hậu Giang hu tacei pato dom tuyến y tế cơ sở jhul pakhang bruk meyaih khan, pruh jru pametai anek ruak; jak ba bhap bani khik caga vệ sinh môi trường, puh ramik jalan dhuan, kuac kraong ribaong, danao kandong aia piah pametai anek ruak, pacang cakak jit ruak pambak prong.

Khaw tin dunya:

# Pahadar 69 thun harei dang tagok mesruh metak di bhap bini dom bộ tộc negar Lào (23/8/1945 – 23/8/2014), Akok Mentri Thông tin, Ilamu saong Du lịch Lào Bò-sẻng-khăm Vông-đa-la hu kadha bac anak dom urang ngak praong di Rajaei saong dom học giả dalam taneh ia. Iew taong abih xã hội, abih di nyu nan lac vien roh duah; dom pasak pato megru saong dom sang bac, njauk brei hu rilo jang dom bruk jhul pakhang bac megru janih mon lich su; pakhng bruk pato rairah dam dara thau anit saong iek praong sajarah.

# Uỷ ban chữ thập đỏ dunya harei 22/8 brei thau, jabat ini hu peih ngak taong abih bruk njauk ngak piah peih jalan ka sa kapul radaih pajeng pandap daong di Nga tame bhum taneh Ucraina. Urang dang akaok Ủy ban chữ thập đỏ dunya pak châu Âu saong Trung Á, ong Lôran Cocba (Laurent Corbaz) pok sap iew taong abih dom gah njauk jhul samar dom adat hukum piah pandap daong meda samar nao tal tangin bhap bani gah timur Ucraina daok cang bruk daong.

# Dua harei hadei di mbang rah tabiak bruk glut jaleih taneh khang ngak metai yaok pluh urang di ban Hi-rô-si-ma (Nhật Bản), harei 22/8, hajan khang daok tuh trun ngak ka bruk duah labaih 50 urang lahik brei padeih. Urang ngak praong di ban ini huac lac hajan khang oh khaong yau nan mbuan rah tabaik glut jaleih taneh veik. Kuhrai tal harei 22/8, hu takik di nyu 39 urang metai. Dom urang daong duah menuac njauk bala brei thau, kan si diuk hu dom urang dalam 50 urang njauk gluh haluk kateik ala meng 3 harei ini mai ..