# Pahadar 70 thun harei padang Rayo sap ndom Việt Nam, harei 25/8, pak bal raya Hồ Chí Minh hu rah tabiak van pataom mbaok. Mai pataom mbaok hu labaih 300 urang jakar, urang vak, kỹ thuật viên, phát thanh viên, công nhân viên …. Dalam bui sambai chreih chrai, dom rairah urang jakar,  urang vak, kỹ thuật viên, phát thanh viên, công nhân viên ba gauk hadar veik dakrai sajarah hadah hadai 70 thun di Rayo Sap ndom Việt Nam. Ong Nguyễn Sỹ Ẩn, umo 82 thun, urang vak di rayo sap ndom Việt Nam samar taong Mỹ hadhar veik: Tuk nan kaol khamang palaik bom, cuh palai dom baoh tatua yau tatua Giẽ, blaoh trun Nam Định njauk palai taong abih. Klau adei sa-ai nao 3 sruh radaih jauk. Khaol dahlak ba tu sa baoh ắc quy, sa máy ghi âm, trak jaik 10 kg, gam tui dom pandap cá nhân, gaok glah piah tahanek lisei… Khaol dahlak meng hatai khang, kham merat yaok harei njauk hu kadha vak payua mai ka Đài, phỏng vấn, thu thanh piah ka nyu samu.

# Harei 25/8 tỉnh Sóc Trăng peih bruk pahadar 70 thun Harei padang tapon nyom bol pan phao kraong Sóc Trăng (25/8/1945-25/82015) song taduan mek angan Anh hùng tapon nyaom bol pan phao krong tuk vak salih bahrau. Tapa 70 thun dak padang, mesruh metak saong praong tagok, tapon nyom bol pan phao kraong Sóc Trăng song Đảng bộ, bhap bini dalam tỉnh mek hu rilo ja yah praong, rik dong tame ja yah di taneh ia dalam bruk mesruh metak, dak padang song khik caga taneh ia VN xã hội chủ nghĩa.

# Pahadar 70 thun Cách mạng bilan 8 saong Harei negar 2/9, Mentri ilamo padhih saong rivang ma-in peih mbang parang iek ka dom jak jeng gah Kinh tế - Xã hội thun 2015. Parang iek  nan hu angan ieu lac “Salih bahrau, mbeik drei tame saong patagok”, hu mbaok di 28 mentri, ngành, dom kapul nyaom di Trung ương; 30 tỉnh, bal saong khối doanh nghiep. Hu labaih 80 gian hàng, hu parabha jeng dom asal kadha karei di gauk piah brei mboh dom jak jeng praong gah kinh tế - xã hội di negar dalam70 thun tapa, abih di nyu lac dalam samar salih bahrau saong mbeik drei tame dunya.

#  Bruk dam dara halan hatain kayua rai duik bhap bini di urang đoàn dam dara tỉnh Sơn La hu ba mai rilo siam lagaih. 3 thun ini mai, tỉnh Đoàn Sơn La hu pambuak bruk iek ruak song brei jru ka labaih 12.000 urang, tui yaom jien abih tih labaih 800 triệu đồng. Urang đoàn dam dara cơ sở jeng hu pachreih ba, rik dong padang ngak 128 baoh sang anit ranam, sang jum pataom ka dom sang kan kathaot, tal bac gam bac gam dok ka anek saih bhum glong, bhum kan kandah.

# Pak bal Vũng Tàu, Mentri Thông tin Truyền thông pambuak haong Ủy ban bhap bani tỉnh Bà Rịa - Vũng Tàu peih pakak mbang parang iek bản đồ saong parang iek tư liệu “Trường Sa, Hoàng Sa di Việt Nam: dom bằng chứng dak rai sajarah saong adat hukum”. Mbang parang iek hu tư liệu, harak ba-ar, pandap panda saong jaik 100 blah bản đồ. Nan lac pataom veik dom  tư liệu hu ba tabiak blaoh meng dahlau mai di dom urang roh duah, urang bac megru dalam negar saong dunya. Langiu di nan, dom tư liệu hu yaom abih bo mban tổ chức ba tabiak parang iek nan lac dom Châu bản triều Nguyễn pambuak pagam tal quyền ngak bo di Việt Nam angaok dua baoh pulao Hoàng Sa, Trường Sa.

# Tui akaok Chi cục Thú y tỉnh Bình Dương, tapa 2 mbang pasang iek 32 sang mac ngak pandap mbang rong glang dalam tỉnh, urak ni oh ka mboh bruk pandar dom janih pandap oh brei pandar dalam pandap mbang rong glang athur. Taphia di nan, gah thú y jeng hu  pasang iek veik 552 trang trại rong pabui prong dok di dom huyện, thị dalam tỉnh Bình Dương, min oh ka mboh labik halei ba janih oh brei pandar tame bruk rong pabui. Tui jabat thú y Bình Dương, janih oh brei pandar dalam pandap mbang rong glang hu Salbutamol song Clenbutrerol…ngak brei ruak boh hatai menuac urang tuk mbang njauk atau pandar dom janih chất ni.

# Piah pabak hatai caong iek glang pren yava jang yau pasiam bruk iek ruak ka bhap bani dalam bhum, pak nyaom biai “Pato pathram urang jakar y tế Bhum taneran kraong Cửu Long” sang bac Đại học Y dược Cần Thơ peih ngak bahrau ini lambaok ka dom tỉnh dalam bhum taneh Taneran kraong Cửu Long thei jeng hu panuac caong patagok jang chỉ tiêu pato megru tui yaok labik pandar. Tui urang dang kaok dom tỉnh, hu 5 chuyên ngành kan si likau bruk ngak nan lac (lao, phong, tâm thần, pháp y và blaic gaih phẫu bệnh).  Kayua nan ye, dom puk plei hu patrun điểm pilih ruah  piah pacheih urang tame bac saong mai palei ngak bruk, taphia di nan njauk hu jalan định hướng chuyên khoa dom ngành ini njauk dalam tukvak bac pak sang bac piah ka tỉnh mbuan laghaih pachreih dom urang bac mai ngak bruk veik di puk palei.

# Labaih 7,6 tỷ đồng lac yaom jien bhap bini huyện Thoại Sơn, tỉnh An Giang rik dong meng akaok thun tal ni. Pok jien ni hu pandar piah padang ngak, pasiam veik 5 jalan mbak palei pala atah labaih 6km, padang ngak 10 danak dak jalan mbak. Urak ni huyện hu ngak salah bloh sa boh tatua palei pala, yaom 186 triệu đồng song dok padang ngak sa boh tatua tra, yaom 500 triệu đồng. Langiu di bruk rik dong jien ndua, drap ar, bhap bini huyện Thoại Sơn dok halan hatain rik dong yaok ribau harei ngak bruk, tapa nan jhul pakhang bruk padang ngak palei pala bahrau dalam huyện./.