# Meng harei 30 bilan 12 thun 2015 tal harei 4 bilan 12 thun 2016, Sở Du lịch Hà Nội pambuak saong Pasak Khik ramik drap ar Thăng Long - Hà Nội padang ngak danak dak “Hadar veik Ha Noi” di Hoàng thành Thăng Long, padang ngak veik dom ilamu siam gheih di Ha Noi meng kan. Danak dak hu bruk parang iek thaot binguk, ilamu dak phố meng kan, sang meng kan, dom pandap ngak meng tangin di urang Thăng Long, pandap mbang Ha Noi, darak, khan ao ngui cuk di Ha Noi meng kan, dom adat cambat di Thăng Long - Hà Nội.

 # Di Sang parang iek Ha Noi, 15 urang kumei cih thaok binguk mai meng klau bhum Bắc-Trung-Nam hu parang iek thaot binguk ngan saong  kadha “Sambo mau 6”. Parang iek 80 blah thaok binguk meng rilo janih karei di gauk yau: sơn dầu, sơn mài, acrylic, fabric…;dalam nan, thaot cih meng sơn dầu ralo di abih. Ini lac bruk hu peih ngak yaok thun, mbang ini mbang ka 6 tapa nan brei dom urang kumei cih thaok binguk hu pataom mbaok jeng yau brei mboh dom hatai sahaneng ka nghe thuat  saong raidiuk. Parang iek tal harei 22 bilan 12.

# Pala lanh ngak merai, menyim khan bai nan lac bruk gheih karei di urang bangsa Mông daok di tỉnh Cao Bằng. Urang kumei bangsa Mông tuk umo praong jeng dara brei thau tro merai menyim khan bai ka baoh sang di drei. Ngak tabiak khan bai lanh njauk brei ngak meng tangin. Bruk  menyim nan njauk brei kham, tani tanat, yau nan ye, tangin urang kumei Mông tuk halei jeng pan dom gol merai. Menyim khan bai lanh yau brei mboh bruk gheih tangin, tari tariang, brei mboh bruk naih joi, gheih ghang di urang kumei. Khan bai lanh  menyim bloh piah jhik khan ao, ngak siuk me-om, kadung saong dom janih karei karei biak takre meta. 

# Harei pataom Sap daoh anek saih, sinh viên thun 2015 tui kadha Sắc màu ASEAN meda rah tabiak meng harei 25 - 27/12  di Sang bac Đại học Bách khoa Ban raya HCM kayua Sang Ilamu sinh viên Ban raya peih ngak. Harei pataom nan brei ka anek saih, sinh viên di dom sang bac, cao đẳng, trung cấp, pachreih anek saih, sinh viên negar langiu daok bac di Ban raya Ho Chi Minh. Dom kadha pakacah nan pok meyaom ilamu , taneh ia, anek manuac, bruk jum pataom pambuak talei rohim di dom taneh ia ASEAN.

# Sở Ilamu, Thể thao saong Du lịch tỉnh Sóc Trăng birau peih bruk pakacah palao gom ia ndung bak ilamu di urang bangsa Khmer, pacheih hu 11 kapul mai meng dom  huyện, ban sit. Ong  Lâm Vĩnh Phương, Phó akok Sở ilamu, Thể thao saong Du lịch tỉnh Sóc Trăng lac: Bruk pakacah ini yau brei mboh bruk sangka di Đảng saong Karja ngak siam sarak bangsa jeng yau rik tame ngak kaya meda ilamu siam gheih di Sóc Trăng jeng yau dalam bhum taneran kraong Cửu Long.

 # Tukvak  20 tuk 40 minit  melam som saong melam angar yaok adit kuhria meng harei 28 bilan 12, bộ phim “Mạch ngầm vùng biên ải” atah 34 tập hu papar sap papar binguk anagok riyak VTV 1 di Rayo papar binguk Viet Nam. Asar kadha di bộ phim nan brei mboh bhum taneh praong daok bilau di bhum taphia negar. Dom urang nao suan jalan medil lac oh mai veik hu jalan ngak menuac siam. Dom suh sah dalam hatai di urang klak sang nao, oh huac hagait tuk duah mboh haniam phol dalam raidiuk di drei. Sa dalikan anit ranam biak pandik pandua min jeng biak druat druai./.