# Page harei ini 14/4, mbang nyom 27, Uy mban Thuong vu Quoc hoi mbang XIII hu peih tabiak. Mbang nyom ini rah tabiak dalam 10 harei meng harei 14 tal harei 24 bilan 4 pataom tame ginum biai rilo kadha praong ka bruk dak padang hukum piah sap pagap ka mbang nyom 7, Quoc hoi mbang XIII di bilan 5 anak tal. Mbang nyaom ini, Uy mban Thuong vu Quoc hoi brei panuac ka dom asar kadha yau: Brei tabiak Sarak di Quoc hoi ka bruk salih birau danak dak, tapuk pato bac pho thong saong Dư thao Danak dak salih birau danak dak, tapuk pato bac pho thong hadei thun 2015; Danak dak padang ngak hukum, hukum thun 2015, pasiam danak dak padang ngak hukum, hukum mbang XIII saong thun 2014 di Quoc hoi; brei panuac ka bruk mek phiếu palih ruah, buh phiếu palih ruah ngan saong urang hu Quoc hoi, Hoi dong bhap bini palih ruah atau tut angan; bruk dom bajat di Quoc hoi, taduan bhap bini.

# Harei 13/4, Ủy viên mitri chính trị, Phó Thủ tướng Nguyễn Xuân Phúc hu nao ravang sang bac Dai  học Y dược Huế. Sang bac Đại học Y dược Huế daok pato pakai jaik 10 rabau sinh viên daok bac 20 ngành saong chuyen ngành đại học.. Gam saong bruk pato pakai sinh viên dalam taneh ia, sang bac đại học Y dược Huế daok hu pato labaih 140 sinh viên dom taneh ia Lào, Phần Lan, Italia, Bỉ, Đức, Hà Lan… Phó Thủ tướng Nguyễn Xuân Phúc taong yaom bruk pato pakai bo sang bac Đại học Y dược Huế ngak hu, kakei sang bac caik hatai paglaong jang chat luong pato pakai, njauk haong angan Anh hùng lao động.

Băng : (Taphia bruk pato pakai ka labaih 9.700 sinh viên, sang bac pato hu rilo bac sy ka bhum glaong, bhum atah bayah. Chất  lượng Đại học y khoa Huế dahlak mboh biak siam. Di dunya ini hu 2 sang bac catang di abih, sa nan lac Đại học luật, dua lac Đại học y, abih rilo tukvak bac da-a di abih, kayua nyu pambuak tal anek menuac. Drei njauk khik chat luong ini.

          # Taduan panuac da-a di Ban chấp hành Trung ương Đảng Cộng sản Việt Nam, harei kabroi ( 13/4), ong Bun – Nhăng Vô – La – Chít, Uỷ viên  Mentri chính trị, Thường trực Ban Bí thư, Phó Akok negar Cộng hoà Dân chủ Bhap bini Lào saong diuk di ong, gam saong dom urang jakar hu mai rivang huyen kaoh pulao Phú Quốc. Kapul hu mai rivang Cảng Bãi  Vòng,  Phú Quốc.  Ini lac sa dalam dom pabah lam nge praong di abih dalam huyện pulao Phú Quốc hu padang ngak di bilan 4 thun 2003, kuhria tui phun jien buh tame ngak jaik 50 tỉ đồng, khik brei hu salamat ka gaiy gilai praong 600 mã lực tame pataok. Biar harei nan, ong Bun – Nhăng Vô – La – Chít  gam saong kapul urang jakar mai rivang saong cuh gilau di sang guk lin peih paha gah meraong negar Việt Nam.

  # Harei 13/4 nan  lac harei 14/3 saka ia bilan pak tinh Bac Ninh rah tabiak rija Đền Đô 2014, pahadar 1004 thun harei patao Lý Thái Tổ - Lý Công Uẩn tagok rai  ngak patao (15-3-1010 - 15-3-2014).   Rija Đền Đô thun ini hu rilo bruk ilimo daoh tamia, padhih yau ye : daoh quan ho, daoh tuong, parang iek sinh vat canh, pakacah taong blong, cau long, bong ban…gam saong rilo bruk mein ye : tram menuk, mein buh gauk, co tuong… Piah khik caga an ninh trat tu ka rija, mban peih bruk hu langyah catang bruk urang pablei yaom glaong, katek greik tuai damuai, dom urang pablei pandap anak pabak mbang Đền.

       # 3 thun tapa, tỉnh Quảng Ngãi buh tame 450 tỷ đồng peih ngak Danak dak padang ngak palei pala birau, tapa nan hu labaih 20 xã mek hu meng 10 tal 14 tiêu chí palei pala birau, daok veik hu meng 5 tal 9 tiêu chí. Jiak abih dom palei brei buh jien pataom tame padang ngak jalan mbak cơ sở hạ tầng bo oh ka iek praong bruk padang jaln ngak mbang pala drak, paglaong jien mek tame ka mikva. Tỉnh Quãng Ngãi kham merat tal thun 2015 hu 33 xã mek hu tiêu chí padang ngak palei pala birau. Min, phun buh tame ngak pabak jaik 8% bruk ngak, phun jien jak ba dalam bhap bini oh hu rilo yau nan ye kan ngak hu bruk ba tabiak.

        # Harei 13/4),di sang ilimo Sinh viên ban raya Hồ Chí Minh rah tabiak harei pataom lagu daoh Lạc Hồng thun 2014 ngan saong kadha "Tình ca biên giới". Ini lac bruk ngak pahadar 68 thun harei Wa Ho payua harak ka nyaom roya dom bangsa takik (19/04/1946 – 19/04/2014) saong harei ilimo Biet Nam (19/4). Harei pataom thun ini pachreih hu 125 diễn viên di 8 labik dalam ban saong 46 kadha. Dalam nan hu dom kadha ndung bak ilimo dom bangsa Biet Nam ye : tamia Cam, H’zen tagok apuh, sap daoh kreih glai Pac Bó, Sóc sờ bai Sóc Trăng, labik nan lac Trường Sa….  Sinh viên Văn Thị Chiêm – bangsa Cam, Khoa Ngữ văn, sang bac  Đại học Sư Phạm ban raya Hồ Chí Minh ndom lac : 

         (Băng: Lambaok vaikil ka Ký túc xá hu mbaok tame tame danakdak lagu daoh Lạc Hong harei ini, meda lac danakdak ini jeng ye dom danakdak ilimo dom bangsa karei,  nan ye tuk pataom mbaok tame danakdak ini dahlak jeng ye dom ayut karei bac megru hu  rilo alamu saong thau rilo jang ka ilimo dom bangsa karei. Tapa nan, jeng ba abih drei tabiak me-in.”

# Urak ini, dalm taneh daok 2 sruh jit ruak manuk ada H5N1 tapa 19 harei di ban sit Hà Giang, tỉnh Hà Giang. Mbiah tal ini, oh ka dauh mboh virut H7N9 di Việt Nam drei. Cục Y tế caga ruak hu brei dom kapul urang nao pasang ike di dom tỉnh jiak taphia negar saong dom labik rah tabiak jit ruak dalAm kan kandah. Urak ini jeng oh ka mboh hu thei ruak H7N9 dalam negar drei yau nan ye brei pataom tame pacang caga ruak saong abih di nyu nan lac bruk pasang iek, pacang dom jalan nyom virut tame pabah negar tame taneh ia drei. Gah Cục thú y hu brei labih 12 triệu mbang jru vaccin Re-6 ka dom tỉnh klauk caga samar jit ruak yau: Bắc Ninh, Nam Định, Lào Cai, Khánh Hòa, Tây Ninh, Thanh Hóa,  Nghệ An, Trà Vinh, Phú Thọ, Hải Dương, Bến Tre saong Bình Thuận.  

  Khaw tin dunya

         # Taduan panuac daa di Tong Bí thư Ban Chấp hành Trung ương Đảng bhapbini Cách mạng Lào, akaok taneh ia Cộng hòa Dân chủ bhapbini Lào Chum-ma-ly Xay-nha-xỏn saong diuk di ong, Tổng Bí thư mBan Chấp hành Trung ương Đảng Cộng sản Việt Nam Nguyễn Phú Trọng, diuk di ong saong kapul urang jakar pakat glaong Biet Nam hu nao ravang saong tadhau yuh Tết Bun-pi-may dom urang jakar dang akaok saong bhapbini Lào, meng harei  12 tal 13/4.  Dalam tukvak hu mbaok di Lào, Tổng Bí thư Nguyễn Phú Trọng saong diuk di ong hu nao ravang, tadhau yuh tet dom urang jakar dang akaok Đảng, karja Lào. Dalam dom mbang taom gaok nan, Tổng Bí thư Nguyễn Phú Trọng brei mboh hatai bui sambai h8u tapa ravang saong hu mbaok di tuk Tết Bun-pi-mày gam saong dom urang jakar dang akaok Đảng, karja Lào; jia lac tui bruk pan akaok ba jaln di Đảng bhapbini Cách mạng Lào, bhapbini Lào adei saai meda yam tapa dom kan kandah, tavak tavaiy mek hu rilo jak jeng praong jang.

       # Hàn Quoc birau brei thau, dom mbang ginum biai pakat chuyên viên ka sa thỏa thuận pablei salih tui hatai di Hàn Quốc-Trung Quốc tui kuhria hu peih tabiak di harei 15 bilan 4. Dua gah brei ginum biai ka dom kadha praong di harak thỏa thuận pablei salih tui hatai nan lac dom pandap, dịch vụ saong phun jien buh tame. Dom mbang ginum biai nan piah dui jaik gauk jang hatai sahneng di dua gah ka dom bruk praong dahlau di tuk ginum biai mbang 11 tui kuhria hu peih tabiak di bialn 5 anak tal pak Trung Quoc. Dalam ginum biai mbang 10 rah tabaik di bialn 3 meng blaoh, Han Quoc hu panuac caong samar brei peih bruk sản xuất di Trung QUOC, min gah Bac Kinh oh ka njuak hatai haong bruk ba tabiak nan

 # Harei kabroi 13-4 ,  di Thái Lan rah tabiak rija thac ia Xổng-cran (Songkran). Ini  lac rija mengkan dane angan di Thai Lan hu peih ngak yaok thun piah uan raok thun barau. Dalam dom harei ini, thei jeng pataom tame bruk thac ia saong hatai caong khin rao hacih dom duh-sa, dom bruk oh siam di thun dahlau saong caong khin dom bruk siam mekre hu mai ka thun barau. Dom canah jalan hu pacang veik piah urang pataom tame rija hu mbuan lagaih. Dom mbang tabiak jalan methuh rajaei jeng padheih di harei akaok thun di Thai Lan. Di harei rah tabiak rija, rilo mbang nao takai, pakacah urang kumei siam binai jeng hu peih tabiak. Rija Xổng-cran di Thái Lan bhian hu peih tabiak meng harei 13 tal harei 15 bilan 4 ./.

Thúy Linh