# Dalam mbang nao rivang bal Osaca, biar harei (19/3) akaok negar Trương Tấn Sang hu mbang taom gaok haong urang dang akaok Kapul hữu nghị Nhật-Việt bhum Kansai haong 7 urang dang akaok Kapul hữu nghị Nhật-Việt. Pok panuac di mbang taom gaok, akaok negar brei thau lac thun 2013, dua negar bahrau peih ngak dalam prong prang pahadar 40 thun harei dak padang talei pambuak bruk nao mai saong peih ngak siam thun Hữu nghị Việt Nam - Nhật Bản. Taphia di bruk patagok talei pambuak bruk nao mai di dua raja-ei, Việt Nam biak iek prong bruk peih prong talei pambuak bruk nao mai di dom puk palei dalam dua negar, mong ini yau sa bruk ngak prong di talei pambuak bruk nao mai Việt-Nhật.

 #Di Liên bang Thụy Sỹ, dalam danak dak nao rivang taneh ia ini, biar harei 19 bilan 3 tui mong Viet Nam, Akok Quoc hoi Nguyen Sinh Hung hu taom gaok Akok Hội đồng Karja ( Thượng viện) Liên bang Thụy Sỹ Han-nét-giơ-mần saong hu mbaok dalam mbang nyaom di Hạ viện, Thượng viện. Akok Quoc hoi Nguyen Sinh Hung ndom lac, mbang rivang di kapul piah jhul pakhang talei rohim, pambuak bruk khang kajap saong Thụy Sỹ jeng yau Nghị viện Thụy Sỹ, caong khin peih tabiak rilo kadha pambuak bruk bahrau dalam talei rohim di dua taneh ia jang yau pambuak bruk  khu vực saong dunya.

# Biar harei 19/3, Thủ tướng Nguyễn Tấn Dũng hu taduan raok Thái tử Na Uy Haakon Magnus saong Công nương Mette Marit daok rivang negar Việt Nam. Pak van taduan raok, Thủ tướng Nguyễn Tấn Dũng brei thau, lac sa negar gaok ralo kanjah jhak meng mesruh metak, min ngan haong bruk kham merat meng pren khang di drei, bruk daong ba di manuac sia dunya, Việt Nam mek hu ralo jak jemng dalam bruk cakrok patagok kinh tế-xã hội; paglaong rai diuk mbang ngui daok dang ka bhap bani. Thủ tướng hu panuac dhal phol Na Uy hu daong brei ODA ka Việt Nam, saong caong khin Na Uy patui veik daong ODA di tanut glaong abih ka Việt Nam. Việt Nam meda khik iek, pandar siam phun jien ODA di ayut sahabat dunya brei peih ngak dom mục tiêu patagok.

 #Phó Thủ tướng Nguyễn Xuân Phúc birau ginum biai saong dom mentri, dom gah, dom palei saong urang lambaok vakil Trung ương Giáo hội Phật giáo Việt Nam ka bruk peih ngak Đại lễ Phật đản Liên hợp quốc – Vesak 2014 di Việt Nam. Di var ginum biai nan, Phó Thủ tướng iew dom mentri, dom gah tacei pato  Giáo hội Phật giáo Việt Nam peih ngak Đai le dalam siam mere, patak pataom, plaih palai pajua, plaih bruk phản cảm, oh caik ka kol kanyah jhak pagam pambak tame piah neh rabha bangsa, agama. Đại lễ Vesak Liên hợp quốc 2014 caga peih ngak di baha Bái Đính, Ninh Bình meng harei  7 tal harei 12 bilan 5, ngan saong kadha “Agam Phật rik daong peih ngak hu jak jeng dom bruk ribau thun di Lien hợp quoc”.

# Mentri Pato megru bahrau hu harak payua dom Sở pato megru ka bruk peih ngak ka uaranaih ngak randap haong sap negar langiu dalam dom cơ sở pato mầm non. Bruk peih ngak iek ka uranaih mầm non ngak randap haong ngoại ngữ hu peih ngak biak njuan njaih, thoải mái tapa dom bruk ma-in, kadha daoh, thaik binguk…, ba mai bui sambai, chreih chai ka uranaih tuk ngak randap haong sa sap ndom bahrau min oh pambak hagait tal bruk pato danak dak pato pakai mầm non. 

# Pachreih Adit pakat negar ngak siam bruk an toàn vệ sinh lao động – pacang caga khuah patuh mbang ka 16, harei kabroi (19/3), urang dang akaok  tỉnh Đắc Lắc hu nao rivang saong alin brei pandap ka dom urang ngak njauk bala tuk ngak bruk, mức độ thương tật 81% tagok. Dalam adit ini, kapul liên ngành di tỉnh jeng peih bruk pasang iek jaik 30 doanh nghiệp dak padang, khai thác khoáng sản, ngak tabiak vật liệu xây dựng, ngak tabiak kaya glai, dak padang thủy điện. 

Khaw tin dunya:

# Bruk duah sruh kapal haok di Hãng kapal haok Malaixia lahik di harei 8 bingun bilan 3 meng blaoh yau oh daok jalan halei piah duah. Rajaei mailaixia saong mỹ thei jeng jia lac, sruh kapl haok nan salih jalan par tui bruk kuhria dahlau, min dom mbang pasang iek saong duah thau 239 urang ndik haok nan  gam saong dom urang tui duh kapl haok nan jeng oh mboh kadha halei pambuak tal khủng bố. Dom urang ngak praong di Malaixia pan kaok dom bruk duah daong brei thau, bruk praong  urak ini nan lac patrun bruk duah, tui nan iew dom taneh ia brei thau dom tín hiệu ra-đa gah bol lin ka sruh kapal haok nan. 

# Mentri Yasa Hàn Quốc Ri-ô Khin Chê (Ryoo Kihl-jae) bahrau brei thau, urak ini oh ka njauk tukvak daong khak drak brei ka Cộng hòa dân chủ Bhap bani Triều Tiên, dalam tukvak sa kapul cứu trợ dân sự daok jak ba bruk rik daong ka Triều Tiên. Dahlau di nan, Mentri Yasa Hàn Quốc ndom lac danak dak daong ba angaok nan nyu suan hukum pakauk bruk pablei salih tapa jalan negar, hu peih ngak meng bilan 5-2010 hadei di tuk sa sruh gilai di Hải quân Hàn Quốc karam bo Hàn Quốc lac kayua Triều Tiên ngak.

# Tòa án Hukum negar Thái Lan birau peih mbang langyah iek bruk Tổng tuyển cử harei 2 bilan 2  meng blaoh nn nyu njauk hukum halei oh. Phiên tòa hu peih tabiak tui caong khin di jabat Thanh tra karja iew tòa án Hukum Thái Lan oh taduan bruk palih ruah bo tui hukum, rajaei saong ủy ban palih ruah taneh ia brei peih bruk tổng tuyển cử hadei di tuk Thủ tướng brei panuac yah klak hạ viện./.