Khaw tin dalam taneh ia:

#  Sang iek ruak meta Trung ương saong Kapul ORBIS dunya birau mbaoh tangin tame harak pambuak bruk “Paglaong bruk iek ruak meta ka uranaih”, daong pabak bruk iek ruak meta hu siam mekre, asar glaong saong siam ka uranaih.. Danak dak “Paglaong bruk iek ruak meta ka uranaih” kayua Rajaei Canada daong jien piah Sang iek ruak Meta Trung ương paglaong bruk iek ruak meta ka uranaih, gam daong pato megru  ilamu chuyên môn gah ruak meta ka uranaih di Việt Nam. Tukvak danka dak meng bilan 10 thun 2013 mbiah tal bilan 12 thun 2017 ngan saong phun jien abih tih jaik 1 triệu 200 ribau đola Mỹ. Tapa nan, danak dak daok hu daong 60 mbang blaic raih meta ka uranaih oh abih jien gam peih Bilik iek ruak meta siam mekre – Pasak Meta uranaih, Sang iek ruak Meta Trung ương.

 #  Rija Quán Thế Âm 2014 barau peih pakak harei kabroi 17/3 di Baha Quán Thế Âm, quận Ngũ Hành Sơn, ban sit Đà Nẵng. Tui mban peih ngak Rija, thun ini taphia adat vía Đức Bồ Tát Quán Thế Âm meda hu dom adat tế xuân likau ka taneh ia siam mekre, bhap bini salamat, Pháp đàn, đọc kinh likau tui Phật giáo Nam tông…Dalam 3 harei rah tabiak rija daok hu dom bruk ilimo thể thao pamơrơ bhapbini saong tuai damuai yau : Hội hoa đăng, pakacah gilai mengkan, parang iek thư pháp, daoh bài chòi, mein vo thuat mengkan. Hu thau, Rija Quán Thế âm nan lac sa dalam 15 rija praong dalam taneh ia, pabak bruk ilimo, agama di bhapbini; lac tuk piah yaih khan thaot binguk saong pandap du lich di ban sit Đà Nẵng.

# Ragu ragam Tây Nguyên oh ka patagok hu abih pren khang di nyu bo dom urang ngak bruk gah ragu ragam nan lac urang bangsa takik daok pak labik nan hu biak takik ngak ka gilang ragu ragam mengkan Tay Nguyen dang anak bruk mbuan si lahik nao. Ini lac bruk sangka praong hu ba tabiak dalam nyaom biai “ khik ramik saong patagok ragu ragam dom bangsa Tay Nguyen dalam tuk mbeik drei tame” kayua Hội nhac sy Biet Nam barau tabiak biar harei 17/3 dalam dom bruk di harei pataom ragu ragam Tay Nguyen saong dom tinh gah meraong daok rah tabiak di ban sit Pleiku, tinh Gia Lai. Tapa ginum biai, urang mboh lac, dahlau di abih njauk paglaong bruk ngak saong akaok sahaneng di dom urang ngak bruk gah ragu ragam, abih di nyu nan lac dom nhac sy paneh tapak piah hu dom kadha siam, lagaih haong urang pang jang yau bhapbini bangsa takik daok di Tay Nguyen. Taphia nan, njauk sangka rilo jang tal bruk pato pakai parilo urang hu ilamu, pabak jien padai, ba mbuan lagaih piah khik ramik saong patagok ragu ragamc dom bangsa Tay Nguyen di tuk mbeik drei tame khang yau urak ini.

 # Di Tỉnh Dak Lak, pandiak bhang thu lagu daok rah tabiak di angaok taneh praong. Labaih 2000 hecta phun pala di 8 huyện thu lagu trak, dalam nan hu jaik 700 hecta ralo meng phun padai, tangei metai thu abih, jaik 1 ribau meteh hecta thu lagu, ralo di dom huyện M’Drak, Krong Bong saong Krông Ana…ngak khat lahik labaih 40 tỷ đồng. Kayua pandiak bhang dui atah, ia dalam dom danao, binek, kraoh di tỉnh Dak Lak  trun daok biar, rilo binek ia thun tal ala. Tui kuhria caga di Pasak khí tưởng thủy văn tỉnh Dak Lak, langik pamdiak bhang meda daok dui atah, rilo labik mbuan thu lagu khang. Yau nan ye,  gah ngak nong tacei pato: mikva urang ngak nong njauk brei pandar ia patak pataom piah caga pandiak bhang dui atah.

# Tỉnh Bình Thuận barau tabiak panuac lac hu jit kum menuk ada dalam xa Nam Chinh, huyen Duc Linh, hadei di tuk labik ini rah tabiak bruk menuk metai rilo saong tapa dut iek mboh hu virut kum A H5N1. Chi cuc thu y tinh Binh Thuan hu pambuak bruk saong huyen Duc Linh ba nao cuh klak 6.800 drei menuk dalam sruh jit ruak saong pruh jru pametai anek ruak di labik nan. Taphia di nan, ba tabiak rilo bruk pacang caga jit ruak plaih pambak praong; peih bruk pruh jru pametai anek ruak di sruh jit saong dom labik taphia nan, dut iek, pasang iek jit ruak di yaok sang dalam labik hu jit. Saong daok peih bruk pathau khan brei bhapbini thau bruk pacang caga jit ruak.

7 # Bahrau ini, kapul urang pasang iek di Ủy ban Thường vụ Quốc hội kayua ong  Phan Xuân Dũng, Ủy viên Ban Chấp hành Trung ương Đảng, Akok Ủy ban Khoa học, Công nghệ saong Môi trường di Quốc hội ba kaok mai ngak bruk di tỉnh Long An piah pasang iek bruk peih ngak dom jalan pacang caga biến đổi khí hậu, dom bruk praong ka gah khik caga alam moi truong dalam quy hoạch patagok kinh tế công nghiệp, nong nghiệp. Hadei nao pasang iek saong ngak bruk saong tỉnh Long An ong Phan Xuân Dũng, Akok Ủy Ban Khoa học, Công nghệ saong Môi trường di Quốc hội hu pang dom panuac caong khin di Long An piah langyah dom kan kandah dalam tuk peih ngak dom jalan khik caga alam moi truong saong lagaih pacang caga biên doi khi hau  di tỉnh. Dalam nan, bruk praong abih nan lac phun jien buh tame ngak dom danak dak  jaln m,bak, kraong ribaong, salih janih phun pala, athur raong, parabah veik bruk ngak pala drak, padap tanat raidiuk ka bhap bini dom palei, abih di nyu na lac labik tapen kraong Vàm Cỏ Đông, Vàm Cỏ Tây nan lac labik gaok kan kandah khang kayua bruk bien ndoi khi hau saong mbuan ia dauk, ia ndik dak harei dak glaong.

Khaw tin dunya

 # Harei 17/03, Hội đồng Nhân quyền Liên hợp quốc hu peih dom mbang ginum biai ka bruk khik caga saong jhul khang quyen anek menuac di Myanmar, Cộng hoà Dân chủ bhap bini Triều Tiên saong Iran. Việt Nam hu panuac lac, bhapbini dunya njauk pambuak bruk saong Myanmar tui jalan iek praong chủ quyền, độc lập di Myanmar, brei mboh bruk iek praong gauk saong peih bruk ginum biai dak padang saong pambuak bruk tapak piah pakhang saong patagok dom kein jak jeng bo taneh ia ini ngak hu dalam tuk tui jalan dân chủ hoá, langyah bangsa, patagok kinh te, khik caga quyền di bhapbini, abih di nyu nan lac di dom kapul nyaom xã hội yếu thế.  Di var ginum biai saong Uỷ mban pasang iek ka quyen anek menuac di  CHDC bhapbini Triều Tiên, lambaok vakil VN ndom lac dom gah njauk tui jalan ginum biai siam mekre, pambuak bruk tapak piah duah jalan ngak suai livik  siam lagaih, piah pasiam bruk dalam taneh ia saong dom bruk angaok ban dao Trieu Tien; pataom tame langyah bruk nhan dao, abih di nyu nan lac bruk pambuak tal quyen padai brah, pato megru saong y te di bhapbini, abih di nyu nan lac urang kumei saong uranaih saong bruk klaik menuac. Daok quyen anek menuac di Iran, lambaok vakil Viet Nam pok meyaom dom kham merat, dom panuac sanya di rajaei barau di Iran, mboh lac thau dom thoa thuan siam jaik ini ka danakdak nang luong di taneh ia ini saong dom taneh ia pambuak tal, meda peih tabiak sa tukvak pambuak bruk barau di Iran saong dunya, rik daong paglaong an ninh, hòa bình dalam khu vuc. Tui kuhria, Hội đồng Nhân quyền daok ginum biai dom dự thảo harak pambuak tal bruk khik caga saong jhul khang quyen anek menuac di dom taneh ia dahlau di tuk tamat nyaom biai  di harei 28/3/2014.

   # Trung Quốc birau hu panuac ieu daong patrun bruk catang tagok di kaoh pulao Trieu Tien hadei di tuk Cong hoa dan chu bhap bini Trieu Tien cuh iek 25 baoh tên lửa tầm biar tabiak bhum tasik biển Đông bo oh brei thau dahlau. Dom mbang cuh tên lửa rah tabiak nan dalam tuk Mỹ saong Hàn Quoc daok pasram kalin saong gauk saong tui kuhrai hu tamat di harei 18 bilan 4. Cong hoa dan chu bhap bini Trieu Tien  tuk halei jeng hu panuac oh njauk hatai bruk pasram kalin nan saong iek nan yau bruk “đe dọa an ninh” di taneh ia ini. Akaok bilan 2 meng blaoh, Cong hoa dan chu bhap bini Trieu Tien jeng hu dom mbang cuh tên lửa tầm biar tuk bruk pasram kalin saong Mỹ - Hàn hu peih tabiak./.