Khaw tin tuk 10g30 saong 14g30 harei 23/9

/ Đề án ba 600 phó akaok xã mai 64 huyện kan kathaot dalam negar kayua mintri Nội vụ pan akaok dok sa thun tra abih, salah. Javap jalei panuac tangi sua di dom jabat báo chí, ong Vũ Đăng Minh, Akaok Vụ Công tác thanh niên, Bộ Nội vụ lac Tuk peih ngak dự án ni, thau lac dom urang ini, lac pren khang prong di puk palei. Kayua yau nan ye, bruk di pakat ủy, karja puk palei brei pandar siam dom pren khang ni. Dalam tuk peih ngak dự án hu peih bruk trui iek, duah thau, pato pakai, paglaong ilamu piah brei ngak urang dang akaok khik ramik ka lagaih haong ilamu di yaok urang..

# Tổng Công ty Đường sắt Việt Nam brei thau ka bruk radaih apui duac duh ka Tết Bính Thân 2016. Lịch nduac radiah apui parabha jeng 3 tukvak : dahlau tet meng harei 25/1/2016 tal harei 6/2/2016,tuk padheih Tết meng 7/2/2016 tal 10/02/2016 saong hadei tết meng harei 11/02/2016 tal harei 25/02/2016. Thun ini, bruk pableih vé radaih apui hu paglaong jeng pablei vé radaih apui điện tử, urang ndik radaih apui meda eng drei ruah labik, tut angan, bayan jien tapa gilang pariak atau tapa dom labik pablei vé di jalan radaih apui Việt Nam.

/ 5 thun tapa, ban sit Đà Nẵng ieu pataom hu 42 tỷ đồng piah dong ba ka dom bruk pacang cakak biến đổi khí hậu, paduan ba jiak 370 boh sang tabiak truh labik hu bala meng lingik tasik, bhum taneh mbuan si glut jaleih glong, padang ngak sang pacang ribuk di dom xã, phường mbuan si njauk bala glong. Ong Phùng Tấn Viết, Phó Akaok UB bhap bini ban sit Đà Nẵng brei thau : Tapen dom bruk ngak hu, khol drei dok dom bruk oh ka hu, yaok urang yaom lac kham merat min oh ka samu tangin gauk

# Tết Trung thu thun ini, tỉnh Đắc Lắc peih rilo bruk ngak hu makna brei ka uranaih. Mban tacei pato danakdak ngak bruk kayua uarnaih meda peih danakdak melam roya ia bilan bak baoh kayua uranaih kathaot bhum taphia negar. Lingiu di nan, tỉnh brei labaih 2.000 paok pandap, yaok paok yaom meng 200 rabau tagok tal 1 triệu đồng ka uranaih kathaot, uranaih jaok jo dalam tỉnh. Amuk Từ Thị Khanh, akaok Jabat khik caga, iek glang uranaih, Sở Lao động Thương binh saong Xã hội tỉnh Đắc Lắc brei thau : patagok bruk jak ba dom mban, nganh, kapul nyaom doanh nghiep gam iek glang ka uranaih sang kan kandah. Trung thu thun ini kol dahlak pambuak bruk saong Tỉnh đoàn, uy mban bhapbini huyện Ea Súp peih sa melam roya ia bilan bak baoh biak praong ka uranaih bhum taphia negar.

/ Adit ilamu du lịch hamu takai kanyan Hoàng Su Phì, tỉnh Hà Giang hu peih tabiak dalam 3 harei meng harei 24 tal harei 26/9 di huyện Hoàng Su Phì. Adit ilamu du lịch hamu takai kanyan Hoàng Su Phì akaok meti hu peih tabiak song rilo bruk ngak yau: brei thau bruk xếp hạng ilamu phi vật thể pakat negar rija Quyá Hiéng di bangsa Dao xã Hồ Thầu, danak dak nghệ thuật bhap bini rija paling Yang glai di urang bangsa Dao di xã Pố Lồ; rija pok kakuh lisei bahrau, rija Gầu Tào di bangsa Mông xã Bản Péo. 

# Balai Thú y ban sit Kon Tum (tỉnh Kon Tum) brei thau, hadei di tuk duah mboh sruh jit saluah cambuai tapaok kakau di tapol limo di xã Đăk Cấm, ban sit Kon Tum, gah chức năng di balai hu langyah drah samal, oh caik pambak ptaong. Urak ini, tapol limo mbang menyum siam veik. Balai Thú y ban sit Kon Tum ngak biên bản saong pandar dom sang raong glang khik tamo tapol limo piah tui iek saong dut iek jit, pakauk bruk pablei salih, pajeng ba nao labik karei pablei.

/ Meng akaok thun tal ni, di Đồng Nai hu 4 urang metai kayua ruak pandiak tabiak darah, glong di abih dalam 20 tỉnh, ban gah merong. 2 urang metai bahrau di ni kayua ruak pandiak tabiak darah di tỉnh ĐN nan lac sa uranaih 6 bilan, song sa urang umo 57 thun. Urak ni dalam tỉnh hu 4.976 urang ruak di taong abih 11 huyện, thị, ban sit, tagok 176 mbang dut song tuk vak ni thun dahlau. Dalam nan ban sit Biên Hòa hu urang ruak pandiak tabiak darah glong abih dalam tỉnh labaih 1500 urang.

Patui di ini lac khaw tin dunya

# Harei kabroi 22/9) yaok ratuh rabau urang Islam meng grauk labik di dunya nao meng ban Méc-ca tal ban Mina daok jaik nan di Ảrập Xê-út piah ngak Rukun Ha-ji. Tui kuhria, jaik 2 triệu menuac mai ngak Rukun Ha-ji thun ini. Nao ngak Ha-ji, lac sa dalam 5 Rukun di urang Islam saong urang Islam njauk nao ngak takik di abih sa mbang dalam rai di drei.

/ Rajaei Mỹ meda dong 38 triệu đôla dalam 2 thun anak tal ka Cty jru Rê-gi-nơ-ron (Regeneron Pharmaceuticals) piah ngak jru pacang ruak Êbôla. Pok jien ni piah duah thau song ngak tabiak dom kháng thể đơn dòng, piah iek ruak Êbôla. Mbang tamuh jit ruak Êbôla di Ghinê thun 2013, bloh pambak tapa Libêria song Siêra Lêôn, ngak ka 28 ribau 220 urang njauk ruak song 11 ribau 291 urang metai.

# Akaok mintri Nội vụ 28 taneh ia dalam Liên minh châu Âu (EU) pataom gauk ginum biai di ban Brúc-xen (Bỉ), piah kham merat dui ka nyu katut panak dom kadha oh ka njauk gauk dalam parabha bruk taduan raok urang nhập cư. Mbang nyaom rah tabiak dalam tuk rajaei Hung-ga-ri daok patagok dom bruk pacang cakak urang nhập cư, dalam nan hu bruk brei adat ka quân đội tabiak pacang cakak./.