Khaw tin tuk 19g harei 3/2 saong 6h30 harei 4/2 

          #/ Tapa kadung jien kayua urang kathaot, UB bhap bini tỉnh Kon Tum hu buh brei 4 tỷ 500 triệu đồng dong ka jiak 17.900 boh sang kathaot song jiak si kathaot raok tết. Yaom dong ka yaok boh sang kan lac 500 ribau đồng song sang jiak si kan 200 ribau đồng. Langiu di nan, karja song dom kapul nyaom dalam tinh jeng ieu pataom hu yaok ribau pok pandap meng dom đơn vị, DN, urang ngak pahla, yaok pok pandap yaom meng 200 ribau tagok brei ka dom boh sang kan kandah song mik va urang bangsa taikk dok di bhum atah bayah.

# Công an tỉnh Quảng Trị pambuak bruk saong dhar gilang pariak Thương mại cổ phần Đầu tư  saong Phát triển Quảng Trị peih bruk alin 100 sruh radaih jhuak chuyên dụng duh ka bruk ngak di cảnh sát khu vực. Bruk alin radaih jhuak chuyên dụng piah rik daong patagok  pandap ngak bruk, patak pataom jien công vụ, paglaong bruk pasram rup pabhap, pasiam pren yava ka dom urang jakar, urang công an bhapbini; taphia di nan, ba bruk randap gauk di urang công an saong bhapbini, caik thoat binguk gheih ka tuai du lich dalam saong langiu taneh ia tuk mai ravang, mein di Quảng Trị.

#/ Dalam tuk vak meng thun 2016 tal thun 2020, tỉnh Thừa Thiên - Huế  hu buh tabiak 6 tỷ 300 triệu đồng ka 50 labik  bưu điện văn hóa xã piah padang ngak, ramik pasiam veik, blei pandap panda thiết bị, piah khik ka yaok labik bưu điện văn hóa xã  hu meng 500 baoh tapuk tagok, song 4 máy tính hu pagam internet pabak khau tin  ka bhap bini dalam palei. Dom labik bưu điện văn hóa xã di Thừa Thiên - Huế dak harei dak jeng pasak khau tin, dong ka bhap bini pagolng ilamu, patagok KTXH di puk palei 

# Tui kuhria mboh di Sở Công Thương Đắc Lắc, bruk blei pandap pandar di puk palei tuk Tết Nguyên đán meda tagok jaik 20%. Kayua yau nan ye, dom doanh nghiệp praong dalam tỉnh  hu  caga ginup pandap saong khik caga yaom tuk halei jeng bair jang meng 5 - 10%  duk saong yaom di darak pasal. Danakdak khik kajap yaom daok hu Sở Công thương peih ngak pataom tame 11 janih pandap  yau ye : pandap mbang menyum, kaya ikan, njam patam baok traoh. Ông Phạm Thái, akaok Sở Công thương tỉnh Đắc Lắc brei thau : Sở Công thương hu tacei pato dom pasak pablei salih bruk pabak pandap panda. Tal tukvak ini, meda ndom lac  pandap hu caga ginup, abih di nyu lac 11 janih pandap ngak mbang ngak huak bo tỉnh hu tacei pato saong pambuak bruk pabak ginup tal dom huyen saong bhum atah bayah. Meyah labik halei kurang pandap ye  dalam 24 tuk njauk pabak ka bhapbini dom pandap ngak mbang ngak huak ini. 

#/ Di tỉnh Bến Tre, Tỉnh ủy, Hội đồng bhap bini, Ủy ban bhap bini song Ủy ban Mặt trận negar tỉnh peih bruk taom gaok 100 chức sắc hadah krah di dom agama. Phó Bí thư Tỉnh ủy Bến Tre cong khin dalam thun 2016, dom chức sắc song bhap bini hu đạo patui ngak siam sarak di đảng hukun di karja, kham merat hu mbaok tame bruk jak ba, bruk pakacah gauk, gam song bhap bini dalam tỉnh mek hu jak jeng dom tanut patagok KTXH thun 2016. .

# Trà Vinh hu buh jien tabiak daong jien brah ka labaih 5.000 sang kathaot dalam tuk tet Bính Thân. Yaom jien daong iek tui dom menuac di yaok sang piah dom urang nan blei brah tui caong khin di drei. Tui nan, yaok urang hu daong 15 kg, sumu yaom jien lac 12 rabau dong sa kg; abih tih yaom jien daong jaik 3 tỉ đồng. Langiu bruk hu daong brei jien brah, tapa Mặt trận negar tỉnh dom sang ini daok taduan hu jien meng 300 tal 500 rabau đồng atau dom pandap ngak mbang ngak huak karei kayua dom kapul nyaom, menuac urang rik daong.  

#/ Tui sở ngak nong song patagok palei pala tỉnh An Giang, dalam tinh trun pajaih padai bilan Đông Xuân 2015-2016 hu labaih 238.932 ha, samu 100,39% bruk ba tabiak. Urak ni mik va dalam tỉnh pataom tame iek glang padai dalam tuk langik tasik oh siam lagaih, rilo janih halak tamuh tabiak. Tapa pasang iek di urang jakar  kỹ thuật tỉnh An Giang mboh lac, jit ruak di  padai bilan Đông Xuân 2015 - 2016 tagok hasit. Meng akaok vụ tal ni, mblang taneh njom ruak lac 93.815 ha, hu dom jit ruak yau rầy nâu taneh njom ruak meng akaok vụ tal ni lac 15.405 ha, mblang padai urak ni njom  6.544 ha song mức độ hanjual.

Khaw tin dunya

# Tui kuhria mboh di Hiệp hội pablei brah tabiak taneh ia langiu di Thái Lan, abih tih sản lượng brah pablei tabiak di taneh ia ini dalam thun 2015 hu  9,8 triệu tấn saong trun dang ka 2 dalam dom taneh ia pablei brah tabiak taneh ia langiu praong abih di dunya. Akoaok Hiệp hội pablei brah tabiak taneh ia langiu Thái Lan, ông Cha-ro-en Lao-tham-ma-thạt (Charoen Laothammathat) brei thau, dalam thun 2015, Ấn Độ pablei tabiak taneh ia langiu hu labaih 10 triệu tấn brah, tapa mbaok Thái Lan piah jeng taneh ia pablei brah tabiak taneh ia lingiu praong abih di dunya. Năm 2016, Thái Lan kuhria pablei tabiak taneh ia langiu jaik 9 triệu tấn brah, mek tame jaik 4,3 tỷ đô la Mỹ.

#/ Gah y tế dunya brei thau lac padang sa kapul đặc nhiệm dunya pacang cakak virút Zika song daok huac lac jit ruak ba tal dị tật bẩm sinh di Nam Mỹ ini meda pambak tapa châu Phi song châu Á. Gah Y tế dunya samar tabiak bruk khẩn cấp di dunya ngan saong vi rút Zika, bac megru ilamu meng mbang jit ruak Ebola di Tây Phi njauk urang chỉ trích lac suai damuai tame bruk./.

# Dom phương tiện truyền thông Ôxtrâylia) brei thau, taneh ia hu duah mboh 2 urang njaom virút Zika di bang Niu Xao-uyên (New South Wales). Giáo sư Víc-ki Sép-pia (Vicky Sheppeard ), akaok jabat ka dom ruak njom mbak di Niu Xao-uyên brei thau, 2 urang ini  njaom virút Zika meng harei 29-01, hadei di tuk  mai veik taneh ia meng Caribê. Tui ông Sép-pia, kan hu bruk virút Zika njom mbak di Niu Xao-uyên kayua janih jamaok pambak ruak oh hu mboh di bang ini. Min, di dom bhum gah Brak Quyn-xlen (Queensland) di  Ôxtrâylia jeng hu janih jamaok ini./.