Ba mikva tabiak bac di ar hamu, apuh tapa dom bruk ngak mbang hu mboh di meta, tacei pato ilamu ka mikva

Peih ngak dom sarak di Đảng saong karja ka bruk daong, buh jien tame ngak ka bhum urang bangsa takik, bhum ceik, bhap bani bangsa takik daok hu mbang tui dom nyaom sarak bangsa yau: Sarak karei tui bangsa saong kapul nyaom bangsa; sarak cak rok patagok kinh tế - xã hội tui bhum; sarak cak rok patagok kinh tế - xã hội tui bruk ngak, gah bruk ngak. Dalam nan hu 2 danak dak pakat negar, (lac Danak dak pakat negar patrun kathaot khang kajap saong danak dak padang ngak palei pala bahrau) saong dom danak dak hu jalan ngak daok pamaong tal.

Piah peih ngak, dom pakat dom gah hu patabiak rilo harak tacei pato saong peih ngak, mek hu dom jak jeng siam mekre, tapa nan rik daong paglaong akaok saneng di rahra, patagok manuac urang ngak bruk, pato pasram paglaong ilamu urang nai gheih, jeng yau cak rok patagok kinh tế - xã hội, khik kajap an ninh chính trị, khik saiam rai diuk bol bhap rahra di dom bhum urang bangsa takik. Rai diuk di mikva, abih di nyu lac bangsa biak takik manuac dak harei dak tagok.     

Min asal di bruk ngak mbang duah jien di mikva piah pamong tal patruh eik khang kajap ye oh ka hu buh jien tame ngak ka nyu siam. Kayua yau nan ye, baoh sang kathaot veik di bhum urang bangsa takik tuk halei jeng daok di tanut glaong. Kurang tacei pato, kurang bruk daong pala drak, dom baoh sang urang bangsa takik biak kan kandah jeng daok having akaok haong phun jien mesre. Urak ini, eik lipa hu patrun min piah ginup pandap panda kaya mbang, eng drei ngak tabiak ye daok lac bruk kan. Amuk Hồ Thị Minh- Phaok akaok Ban Bangsa tỉnh Quảng Trị ndom lac, jalan ngak lac meng bruk salih bahrau dalam akaok saneng di mikva: “khaol drei oh njauk cang miat tame dom sarak, siam di abih nan lac njauk caik ka mikva saneng mboh hu bruk njauk pandar ilamu tame bruk ngak mbang. Mikva njauk salih jalan saneng, daok drei hu bo brei ka manuac urang jeng oh hu, brei hadom jeng abih, siam di abih nan lac drei palih ruah phun pala anek athur raong, mong iek taneh riya di drei laghaih haong phun hagait.”

Ong Quàng Văn Hương- Phaok Akaok Hội đồng bangsa di Quốc hội ndom lac, dom puk palei njauk pataom tame bruk pato pathram rilo mbang, kayua lac ngan haong bhap bani bangsa takik, gam sa ilamu bac megru hu, gam sa phun jien yau nan njauk pandar yau habar ka nyu laghaih. Gaok mai, khaol drei njauk ba mikva tabiak bac di ar hamu, apuh tapa dom bruk ngak mbang hu mboh di meta, tacei pato ilamu ka mikva, oh njauk lac tok thau ba pataom gauk dalam hội trường: “Mikva bhian randap haong jalan ngak mbang klak, pala drak yau meng kan, piah cak rok patagok tui jalan ngak bahrau ye njauk pan tangin  tacei bruk. Mikva caong khin hu panduan jao, bruk nao mai kan kandah, hatai saneng daok biar nan ye njauk ngak ka nyu tani tanat, mikva caong khin bac megru min oh ginup điều kiện. Kayua khaol drei oh ka patagok hu pren khang daok kandauk dalam. Nan ye brei hu sarak ka nyu njauk meng ieu pataom hu prein khang di bhap bani, mai meng bruk ỷ lại nan, lac kayua sarak di khaol drei oh ka cambaih laih.”

Tukvak tapa, Hội đồng bangsa di Quốc hội hu panuac likau raja-ei peih ngak danak dak patagok phun jien brei mesre tapa Gilang pariak sarak karja; patagok yaom jien brei mesre meng 8 triệu đồng sa baoh sang tagok 15-20 triệu đồng sa baoh sang; patagok yaom jien daong tapak taneh pala drak, daong panduan salih bruk ngak meng 15 triệu tagok 20-30 triệu đồng; peih prong labik peih ngak, langiu di labik kan kandah, biak kan kandah (tui Sarak 54). Taphia di nan patagok jang phun jien brei ka baoh sang kathaot mesre, peih prong manuac urang taom gaok hu phun jien di Gilang pariak sarak karja ngan haong baoh sang jaik kathaot atau baoh sang bahrau tapa truh kathaot, caik ka dom urang ini meda tabiak truh kathaot khang kajap.

Gah jabat karja, Uỷ ban Bangsa jeng padang sarak karei tui jalan pataom veik dom sarak abih tukvak peih ngak, pasang iek veik manuac urang mbang tui sarak nan caik ka nyu oh kateik tagok gauk. Dom mentri, dom gah tuk ba tabiak dom sarak piah jhul khang bruk cakrok kinh tế xã hội di bhum urang bangsa takik, caong khin hu bruk pambuak gauk saong pasang iek di Ủy ban Bangsa. Bruk parabha pren khang ka dom puk palei njauk brei ngak dahlau ka bhum urang bangsa takik saong labik kan kandah hu baoh sang kathaot daok rilo, ba brei phun jien ka nyu laghaih, juai caik ka bhap kan kathaot njauk rik tame./.

Urang lang: Jasi – 28/12