Hu bhian randap blaoh haong bruk pato saong bac online nan ye gru pato saong anek saih jeng samar drah salih tapa jalan bac da-a bahrau. Yaom lac bac tapa online jeng hu dom kadha oh ka lagaih dut haong bac tapak di tal bac, min ngan haong dom gru pato, tuk pato bac online mboh lagaih ngak brei chreih chrai jang kayua pandar siam công nghệ thông tin. Gam haong nan, bruk bac tapa online rilo meng hu dom anai gru, cei gru pahadar veik ilamu saong brei ka anek saih bac gilac piah cang tal tuk nao bac veik meda peih bruk pasang iek, taong yaom. Gru Nguyễn Văn Đức, Sang bac PTTH Phan Đình Phùng, ban Hà Nội brei thau:

“Langiu di bruk pachreih dom adei khik kajap hatung hatai ye dom gru pato jeng brei ba tabiak dom kadha bac ngak brei chreih chai ka anek saih. Kadha bac nan brei daong hu ka dom adei pahadar gilac dom hagait bo dom adei bac dalam tukvak meng blaoh piah ka dom adei mboh lac bruk pataom veik dom kadha drei bac da-a nan saong ngak dom bài tập nan hu siam.”

Tui bruk ba tabiak daok jaik 4 adit tra lac tamat thun bac 2020-2021, Mentri Pato megru pachreih dom sang bac peih peih bruk pasang iek, taong yaom anek saih tui jalan tapak, tuk jit ruak tani tanat jang saong anek saih meda mai veik sang bac. Tui ong Nguyễn Xuân Thành, Akaok Vụ pato megru Trung học, Mentri pato megru, tuk halei oh ngak karei hu meng brei pasang iek, taong yaom anek saih tui jalan online. Yau nan min, ngak habar khik ka bahu bruk tantu, cambaih laih di kadha pakacah:

“Tuk dom sang bac brei pasang iek, taong yaom định kỳ meng jalan online, ye dom sang bac brei khik hu bruk tantu, cambaih laih saong taong yaom njauk prein bac di anek saih. Nan ye ngak yau habar piah tuk anek saih ngak kadha pasang iek nan, lac anek saih ngak oh njauk lac hu bruk daong di urang karei nan lac bruk biak praong. Ngan haong kadha pasang iek mbang ini  tapa online bo peih ngak angaok mac tính ye đề pakacah brei ngak habar piah taong yaom hu prein bac di anek saih saong abih di nyu nan lac hu jalan tui iek tukvak ngak kadha pakacah di dom adei.”

Tukvak thun bac bo Mentri pato megru ba tabiak di akaok thun bac nan lac tamat di harei 31/5/2021, dalam nan hu gam jalan caga haong bruk pato saong bac dalam tuk hu jit ruak. Patagok ilamu thun bac 2019-2020, gah pato megru daok kham merat yam tapa kan kandah piah ngak siam danak dak thun bac njauk tui bruk ba tabiak saong peih ngak hu siam mekre mbang pakacah bac tamat Trung học phổ thông saong palih ruah tame đại học, cao đẳng./.

Urang lang: Jasi - 11/5/2021